తాను లోకాన్ని వీడుతూ.. ఐదుగురి ప్రాణాలు నిలబెట్టిన శ్రీకాకుళం వీఆర్వో

శ్రీకాకుళం జిల్లాకు చెందిన ఓ యువతి తాను చనిపోతూ ఐదుగురికి పునర్జన్మనిచ్చింది. అవయవదానం ద్వారా వారి కుటుంబాల్లో వెలుగులు నింపింది. ఈ ఘటన వివరాల్లోకి వెళ్తే.. ఎచ్చెర్ల మండలం కొత్తపేట గ్రామానికి చెందిన బొడిగి మౌనిక.. శ్రీకాకుళం పట్టణంలోని రైతుబజార్ సమీపంలో ఉన్న సచివాలయంలో వీఆర్వోగా విధులు నిర్వర్తిస్తున్నారు. నవంబర్ 22న మౌనిక టూ వీలర్‌పై వెళ్తుండగా.. శ్రీకాకుళంలోని డే అండ్ నైట్ జంక్షన్ సమీపంలో ఉన్న వినాయక ఆలయం వద్ద ప్రమాదం జరిగింది. ఈ ఘటనలో ఆమె తలకు బలమైన గాయాలయ్యాయి. దీంతో అప్రమత్తమైన స్థానికులు ఆమెను హాస్పిటల్‌లో చేర్పించి, కుటుంబ సభ్యులకు సమాచారం ఇచ్చారు.

మౌనికకు తొలుత ముందుగా శ్రీకాకుళంలో చికిత్స అందించారు. అనంతరం మెరుగైన వైద్యం కోసం విశాఖపట్నంలో అపోలో హాస్పిటల్‌కు తరలించారు. అయితే ఆమె అప్పటికే బ్రెయిన్ డెడ్ అయినట్లు డాక్టర్లు ప్రకటించారు. దీంతో ఆమెను తిరిగి శ్రీకాకుళంలోని జెమ్స్ హాస్పిటల్‌కు తీసుకెళ్లారు. అక్కడి సిబ్బంది మౌనిక పరిస్థితి గురించి కుటుంబ సభ్యులకు వివరించారు. అవయవదానం గురించి వారికి అవగాహన కల్పించారు. తమ కుమార్తె ఇక బతకదని తెలిసిన కుటుంబ సభ్యులు తీవ్ర విషాదంలో మునిగిపోయారు. అయితే తమ బిడ్డ మరో ఐదుగురి ప్రాణాలు నిలబట్టే అవకాశం ఉందని తెలుసుకొని అవయవదానానికి ముందుకొచ్చారు. దీంతో మౌనిక అవయవాలను తరలించేందుకు ఆదివారం శ్రీకాకుళంలోని జెమ్స్ హాస్పిటల్ నుంచి గ్రీన్ ఛానెల్ ఏర్పాటు చేశారు. పోలీసులు, ఇతర ప్రభుత్వ అధికారుల సమన్వయంతో కొద్ది గంటల వ్యవధిలోనే ఆమె అవయవాలను తరలించారు.

మౌనిక గుండెను రోడ్డు మార్గం ద్వారా విశాఖప్నటం తరలించారు. అక్కడి నుంచి విమానంలో తిరుపతి స్విమ్స్‌కు తరలించారు. ఒక కిడ్నీని అదే హాస్పిటల్‌లోని ఓ రోగికి అమర్చగా.. మరో కిడ్నీని విశాఖలోని ఓ ప్రయివేట్ హస్పిటల్‌‌కు తరలించారు. రెండు కళ్లను రెడ్ క్రాస్‌కు అందించారు. విషాద సమయంలోనూ గొప్ప నిర్ణయం తీసుకున్న మౌనిక తల్లితండ్రులను అందరూ అభినందిస్తున్నారు. ప్రమాదవ శాత్తూ ప్రాణాలు కోల్పోయినా.. మరో అయిదుగురికి ప్రాణం ఇచ్చి ఆదర్శంగా నిలిచిన మౌనికకు కన్నీటితో వీడ్కోలు పలుకుతున్నారు.