భారతీయులకు గుడ్‌న్యూస్ చెప్పిన మలేషియా.. వీసా లేకుండా ఆ దేశంలోకి ఎంట్రీ

విదేశాలకు వెళ్లాలంటే వీసా తప్పనిసరి. కానీ, ఆ అవసరం లేకుండా భారతీయులు తమ దేశంలో పర్యటించే సౌలభ్యాన్ని థాయ్‌లాండ్, వియత్నాం, శ్రీలంకలు కల్పించాయి. తాజాగా, ఆ దేశాల సరసన మలేషియా కూడా చేరిపోయింది. భారత్‌, చైనా నుంచి వచ్చే పర్యాటకులకు వీసా లేకుండానే తమ దేశంలోని సందర్శనకు అనుమతి ఇచ్చింది. ఈ మేరకు మలేషియా ప్రధాని అన్వర్‌ ఇబ్రహీం ఆదివారం జరిగిన పీపుల్స్ జస్టిస్ పార్టీ వార్షిక సమావేశంలో ప్రకటన చేశారు. పెట్టుబడులు, పర్యాటకాన్ని ప్రోత్సహించే ఉద్దేశంతో మలేషియా ప్రభుత్వం ఈ నిర్ణయం తీసుకుంది.

దేశం ఆర్థికంగా ముందుకెళ్లాలంటే పర్యాటక రంగ అభివృద్ధి ముఖ్యమని మలేషియా ప్రధాని అన్వర్‌ ఇబ్రహీం పేర్కొన్నారు. ఇందులో భాగంగానే చైనా, భారత్‌ పౌరులకు వీసా లేకుండానే మలేషియాలో పర్యటించేందుకు అనుమతులు ఇస్తామని స్పష్టం చేశారు. డిసెంబర్‌ 1 నుంచి ఇది అమల్లోకి వస్తుందని తెలిపారు. వీసా లేకుండా తమ దేశంలోకి ప్రవేశించిన తర్వాత 30 రోజుల పాటు ఉండొచ్చని ఆయన చెప్పారు. కానీ, వీసా సౌలభ్యం భద్రత ప్రకియకు లోబడి ఉంటుందని పేర్కొన్నారు. భారత్‌, చైనా నుంచి వచ్చే పర్యాటకులు, పెట్టుబడిదారులను ప్రోత్సహించేందుకు వీసా విషయంలో కొన్ని సడలింపులు చేస్తామని గత నెలలోనే ప్రకటించిన ఆ దేశ ప్రధాని అన్వర్‌.. తాజాగా అందుకు సంబంధించిన నిర్ణయం తీసుకోవడం విశేషం.

ఇదిలా ఉండగా.. భారతీయులకు వీసా అవసరం లేకుండానే పర్యటించే సౌలభ్యాన్ని ఇటీవల థాయిలాండ్‌, శ్రీలంక, వియత్నాం ప్రభుత్వాలు కూడా కల్పించాయి. నవంబర్‌ 10 నుంచి థాయిలాండ్‌ అమల్లోకి తీసుకురాగా.. వచ్చే మే 10వరకు ఈ సౌలభ్యం అందుబాటులో ఉంటుందని తెలిపింది. అయితే, డిమాండ్‌ను బట్టి కొనసాగించే అవకాశం ఉంటుందని థాయ్ ప్రభుత్వం వెల్లడించింది.

అటు, శ్రీలంక సైతం అక్టోబరు నుంచి భారతీయులను వీసా లేకుండా అనుమతిస్తోంది. భారత్‌ సహా ఏడు దేశాల పర్యాటకులకు ఈ వెసులుబాటు కల్పించింది. వచ్చే ఏడాది మార్చి 31వరకు ఇది అందుబాటులో ఉంటుంది. ఈ నెల ప్రారంభంలో వియత్నాం పర్యాటక శాఖ మంత్రి న్గుయిన్ వాన్ జంగ్ మాట్లాడుతూ.. చైనా, భారతదేశం వంటి ప్రధాన మార్కెట్‌ల కోసం స్వల్పకాలిక వీసా మినహాయింపులను కల్పించి, పర్యాటక రంగాన్ని పునరుద్ధరింపజేయాలని పిలుపునిచ్చారు. ప్రస్తుతం ఆ దేశానికి జర్మనీ, ఫ్రాన్స్, స్వీడన్, ఇటలీ, స్పెయిన్, డెన్మార్క్, ఫిన్లాండ్ దేశస్థులు వీసా లేకుండా వియత్నాంకు వెళ్లొచ్చు.