అమరావతి ఉద్యమానికి నేటితో 4 ఏళ్లు పూర్తి.. ఎటూ తేలని నిర్ణయం
Andhra Pradesh Telugu | Suryaa Desk | Published : Sun, Dec 17, 2023, 06:42 PM
ఆంధ్రప్రదేశ్ రాజధానిగా అమరావతి ఒక్కటే కాకుండా 3 రాజధానులు ఏర్పాటు చేస్తామని ముఖ్యమంత్రి జగన్ మోహన్ రెడ్డి.. అసెంబ్లీలో ప్రకటన చేసి 4 ఏళ్లు పూర్తి అయింది. శాసన రాజధానిగా అమరావతి, న్యాయ రాజధానిగా కర్నూలు, పరిపాలన రాజధానిగా వైజాగ్‌ ఉంటుందని ప్రకటించారు. సీఎం ప్రకటనతో అమరావతి ప్రాంతంలో పెద్ద ఎత్తున నిరసనలు, ఆందోళనలు వ్యక్తం అయ్యాయి. ఇక అప్పటి నుంచి నిరాహార దీక్షలు, నిరసన దీక్షలు చేస్తూనే ఉన్నారు. ప్రతీ గ్రామంలో నిరసన శిబిరాలు ఏర్పాటు చేసి అమరావతినే ఏకైక రాజధానిగా ఉంచాలని డిమాండ్ చేస్తున్నారు. రకరకాల పద్దతుల్లో తమ ఆకాంక్షలను తెలియజేశారు. రాష్ట్రంలో పాదయాత్ర చేయడమే కాకుండా ఢిల్లీలో కూడా ఆందోళన వ్యక్తం చేశారు.
ఒకవైపు ఆందోళనలు చేస్తూనే మరోవైపు.. కోర్టుల్లో న్యాయపోరాటం చేస్తున్నారు. ఈ క్రమంలోనే పరిపాలన వికేంద్రీకరణ, సీఆర్డీయే చట్టం రద్దు బిల్లులు చెల్లవని ఆంధ్రప్రదేశ్ హైకోర్టు స్పష్టం చేసింది. ఆ లోపే జగన్ సర్కార్ బిల్లులను ఉపసంహరించుకోవడం విశేషం. మరోవైపు.. హైకోర్టు తీర్పును సుప్రీం కోర్టులో ఏపీ ప్రభుత్వం సవాల్ చేసింది. రాజధానిలో ఆర్ -5 జోన్‌ను కూడా అమరావతి ప్రాంత రైతులు సవాల్ చేశారు. సీఎం క్యాంప్ కార్యాలయాన్ని అమరావతి నుంచి విశాఖ తరలిస్తున్నామని చెప్పి.. ఆ ముసుగులో ప్రభుత్వ కార్యాలయాలను తరలిస్తున్నారని హైకోర్టులో రైతులు పిటిషన్ దాఖలు చేశారు.
|
|