శ్రీరామభక్తులకు షాక్.. అయోధ్య ప్రారంభోత్సవం రోజు ఎవరూ రావద్దని ట్రస్ట్ సెక్రటరీ విజ్ఞప్తి

అయోధ్యలో రామ మందిర ప్రారంభోత్సవానికి శరవేగంగా ఏర్పాట్లు జరుగుతున్నాయి. ప్రధాని నరేంద్ర మోదీ సహా వేలాదిమంది వీఐపీలు, వీవీఐపీలే కాకుండా కోట్లాది మంది హిందూ భక్తులు అయోధ్యకు వెళ్లి రాముడి దర్శనం చేసుకునేందుకు సిద్ధం అవుతున్నారు. ఈ క్రమంలోనే అయోధ్య రామ మందిర ఏర్పాట్లు చూస్తున్న శ్రీరామ జన్మ భూమి తీర్థ క్షేత్ర ట్రస్ట్ కీలక ప్రకటన చేసింది. అయోధ్యలో రాముడి విగ్రహానికి ప్రాణ ప్రతిష్ఠ జరిగే జనవరి 22 వ తేదీన భక్తులు ఎవరూ రావద్దని విజ్ఞప్తి చేశారు. జనవరి 22 వ తేదీన ఉత్తర్‌ప్రదేశ్‌లోని అయోధ్యలో ఉన్న రామాలయ గర్భగుడిలో రామ్‌లల్లాను ప్రతిష్టించనున్నారు. ఈ అయోధ్య రాముడి విగ్రహ ప్రతిష్టాపన మహోత్సవాన్ని తిలకించేందుకు దేశ, విదేశాల నుంచి భక్తులు అయోధ్య నగరానికి చేరుకోవడానికి ఏర్పాట్లు చేసుకుంటున్నారు. ఈ క్రమంలోనే అయోధ్య శ్రీరామ జన్మభూమి తీర్థ క్షేత్ర ట్రస్ట్ చేసిన ప్రకటన వారిని అయోమయంలో పడేసింది. లక్షల మందిలో భక్తులు అయోధ్యకు చేరుకునే అవకాశం ఉందని అధికారులు అంచనా వేస్తున్నారు.

ఈ క్రమంలోనే రామమందిర తీర్థ క్షేత్ర ట్రస్ట్ సెక్రటరీ చంపత్ రాయ్ కీలక ప్రకటన చేశారు. అయోధ్య నగరంలో ఉండే రద్దీని నివారించేందుకు జనవరి 22 వ తేదీన జరిగే ప్రతిష్ఠాపన వేడుకల కోసం అయోధ్యకు భక్తులు ఎవరూ రావొద్దని పిలుపునిచ్చారు. దేశంలో ఎక్కడ ఉన్న వారు అక్కడే సమీపంలో దేవాలయంలో ‘ఆనంద్ మహోత్సవ్’ పేరుతో ఉత్సవాలు జరుపుకోవాలని సూచించారు. తాజాగా ఓ టీవీ ఛానెల్‌కు ఇచ్చిన ఇంటర్వ్యూలో చంపత్ రాయ్ ఈ వ్యాఖ్యలు చేశారు. జనవరి 22 వ తేదీన మధ్యాహ్నం 12 గంటలకు అయోధ్య రాముడి గర్భగుడిలో రామ్‌లల్లా విగ్రహ ప్రతిష్ఠాపన అంగరంగ వైభవంగా జరగనుందని పేర్కొన్నారు. దీని కోసం ఇప్పటికే గర్భగుడితో పాటు రామ్‌లల్లా విగ్రహం సిద్ధంగా ఉందని స్పష్టం చేశారు. అయితే అయోధ్య రామాలయం మొత్తం నిర్మాణం పూర్తి కావడానికి మరో రెండు ఏళ్ల సమయం పట్టొచ్చని చంపత్ రాయ్ పేర్కొన్నారు. గర్భగుడి, రాముడి విగ్రహం మాత్రం పూర్తయ్యాయయని.. మిగితా పనులు పూర్తి కావడానికి సమయం పడుతుందని చెప్పారు. ఈ సందర్భంగానే జనవరి 22 వ తేదీన అయోధ్యకు రావొద్దని భక్తులకు విజ్ఞప్తి చేశారు. చిన్నా పెద్దా తేడా లేకుండా దగ్గరలో ఉన్న ఆలయాలు వెళ్లి పూజలు చేయాలని సూచించారు.

ఇక జనవరి 22 వ తేదీన అయోధ్యలో జరిగే రామమందిర ప్రారంభోత్సవానికి ప్రధాని నరేంద్ర మోదీ హాజరుకానున్నారు. ఈ కార్యక్రమం జరగడానికి వారం రోజుల ముందే.. ప్రాణప్రతిష్ఠ వేడుకకు సంబంధించిన వైదిక ఆచారాలు జనవరి 16 వ తేదీ నుంచే ప్రారంభం కానున్నాయి. ముడుపుల ఉత్సవంలో ప్రధాన క్రతువులను లక్ష్మీకాంత దీక్షిత్ నిర్వహిస్తారు. ఇప్పటికే అయోధ్యలో జరిగే వేడుకల కోసం అక్కడ టెంట్ సిటీల నిర్మాణం చేపట్టారు. ఇందు కోసం మెరుగైన భద్రతా చర్యలను అమలు చేస్తున్నారు.