లింగ అసమానతపై సీజేఐ జస్టిస్ చంద్రచూడ్ సంచలన వ్యాఖ్యలు

లింగ అసమానతలపై సుప్రీంకోర్టు ప్రధాన న్యాయమూర్తి జస్టిస్ డీవై చంద్రచూడ్ కీలక వ్యాఖ్యలు చేశారు. ఇళ్లలో కొనసాగుతున్న లింగ అసమానతలను చట్టం ఎందుకు పరిష్కరించాల్సిన అవసరం ఉందో వివరించిన ఆయన.. గోప్యత అనేది హక్కుల ఉల్లంఘనకు దాపరికం కాదని అభిప్రాయపడ్డారు. భారత 19వ ప్రధాన న్యాయమూర్తి ఈఎస్ వెంకటరామయ్య స్మారకార్థం బెంగళూరులోని నేషనల్ లా స్కూల్ ఆఫ్ ఇండియా యూనివర్సిటీలో జరిగిన కార్యక్రమంలో సీజేఐ పాల్గొన్నారు. ఆ సందర్భంగా ఆయన మాట్లాడుతూ.. జస్టిస్ వెంకటరామయ్య కుమార్తె, జస్టిస్ బీవీ నాగరత్న సుప్రీంకోర్టు న్యాయమూర్తిగా ఉన్నారని, తదుపరి భారత మొదటి మహిళా ప్రధాన న్యాయమూర్తి కాబోతున్నారని చెప్పారు. బహిరంగ, వ్యక్తిగత ప్రదేశాల్లో వ్యక్తులను రక్షించడానికి చట్టం ఉద్దేశాన్ని విస్తరించాలని అన్నారు. లింగ వివక్షను పబ్లిక్‌, ప్రయివేట్ అనే విభజన కోణంలో చూస్తామన్నారు.

భారతీయ శిక్షాస్మృతి ప్రకారం.. ఇద్దరు లేదా అంతకంటే ఎక్కువ మంది ఘర్షణకు దిగి ప్రజా శాంతికి విఘాతం కలిగిస్తే, వారు నేరం చేసినట్లు చెబుతారు. ‘ఇది బహిరంగ ప్రదేశం అయితే మాత్రమే శిక్షార్హమైంది.. అందువల్ల, చట్టం సారాంశం ఘర్షణల స్వాభావిక యోగ్యత లేదా నేరం మాత్రమే కాదు అది ఎక్కడ జరుగుతోంది. సమగ్రమైన, రాజ్యాంగబద్ధంగా పాలించే సమాజం పబ్లిక్, ప్రయివేట్ అనే కోణాన్ని దాటి చూడాలి’అని ప్రధాన న్యాయమూర్తి అన్నారు. చాలా ఏళ్లుగా పబ్లిక్, ప్రైవేట్ అనే ఈ భావన మన చట్టాలపై స్త్రీవాద, ఆర్థిక విమర్శలకు ఆధారం అని ఆయన అన్నారు. ‘వ్యక్తీకరణ స్వేచ్ఛ నిజంగా ఉనికిలో ఉండాలంటే, ఈ రెండు ప్రదేశాలలో అది ఉనికిలో ఉండాలి’ అని ప్రధాన న్యాయమూర్తి వ్యాఖ్యానించారు. ‘ప్రైవేట్ స్థలంలో సోపానం విధానం కొనసాగితే.. పవిత్రత పేరుతో ఇంటిలో చట్టం మరో విధంగా కనిపిస్తే సమానత్వ వాగ్దానంలో మేము విఫలమవుతాం.. గోప్యత అంటే ఏమిటో అవగాహన బలహీనమవుతుంది. ఇది హక్కుల ఉల్లంఘనకు దాపరికం కాదు’ అని ప్రధాన న్యాయమూర్తి అన్నారు.

గృహిణి తన సేవకు వేతనం పొందని ప్రైవేట్ స్థలం ఇల్లు.. ఆర్థిక కార్యకలాపాలకు నియలమని చీఫ్ జస్టిస్ చంద్రచూడ్ అన్నారు. ‘అదేవిధంగా బహిరంగ ప్రదేశాలలో మహిళలు విలక్షణమైన సేవ, తరచూ లింగ వృత్తులకు పరిమితమై ఉంటారు.. ఇక్కడ ఇరుపక్షాలకు హక్కులు, ఉల్లంఘనలు ఉంటాయి. అయితే, చట్టం కేవలం దీనిని ఎంచుకుంటే అది పబ్లిక్ స్పేస్‌లో మాత్రమే జోక్యం చేసుకుంటుంది, అప్పుడు అన్యాయం జరుగుతుంది’ అన్నారు. ‘సమాజం మనకు నేర్పించిన ఊహలకు మించి మన మనసులను తెరవడానికి సిద్ధంగా ఉన్నప్పుడు న్యాయం అనే భావం అభివృద్ధి చెందుతుంది. మనకు విశాలమైన ఆలోచనలు ఉన్నప్పుడు మాత్రమే ఈ ప్రాథమిక అంచనాల నుంచి తప్పుకోవాల్సిన అవసరం మనకు అనిపిస్తుంది’ అని పేర్కొన్నారు. దేశంలో లింగ వేతన వ్యత్యాసంపై మాట్లాడుతూ.. ఈ సమస్య ముఖ్యంగా భారతీయ మహిళలకు, ప్రత్యేకించి అట్టడుగు వర్గాలకు చెందిన వారికి ఆపాదిస్తారు. వివిధ వృత్తిపరమైన రంగాలకు వారు గణనీయమైన కృషి చేసినప్పటికీ పురుషులతో పోలిస్తే మహిళలు వేతనాలలో అసమానతను ఎదుర్కొంటున్నారు’ అని అభిప్రాయపడ్డారు.