మూడో ప్రపంచ యుద్ధం ప్రారంభమైనట్టే.. ఉక్రెయిన్ మాజీ ఆర్మీ చీఫ్ సంచలన వ్యాఖ్యలు

ఇటీవలి కాలంలో రష్యా ఉక్రెయిన్ మధ్య భీకర పోరు సాగుతోంది. అమెరికా ఇచ్చిన అధునాతన ఆయుధాలతో రష్యాపై ఉక్రెయిన్ దాడులు చేస్తుండగా.. ఉత్తరకొరియా సైన్యాన్ని ఉపయోగించుకుని.. తన వద్ద ఉన్న అత్యాధునిక ఆయుధాలతో ఉక్రెయన్‌పై రష్యా విరుచుకుపడుతోంది. ఈ సమయంలోనే యుద్ధంలో ఉక్రెయిన్‌పై విధించిన ఆంక్షలను అమెరికా ఎత్తేయడంతో జెలెన్‌స్కీ సైన్యం రష్యాపై భీకర దాడులు చేస్తోంది. ఈ క్రమంలోనే అమెరికా అందించిన అత్యాధునిక క్షిపణులను ఇటీవల రష్యాపై ప్రయోగించడంతో.. పుతిన్ తీవ్ర ఆగ్రహంతో ఉన్నారు. ఈ నేపథ్యంలోనే రష్యా చరిత్రలోనే తొలిసారి.. ఖండాంతర బాలిస్టిక్ క్షిపణిని పుతిన్.. ఉక్రెయిన్‌పై ప్రయోగించారు. మూడో ప్రపంచ యుద్ధానికి ఇదే ఆరంభం అనే ఊహాగానాలు వస్తున్న వేళ.. ఈ పరస్పర దాడులు జరగడం సంచలనంగా మారింది.

ఉక్రెయిన్, రష్యా యుద్ధంలో తాజాగా చోటు చేసుకుంటున్న పరిణామాలను చూస్తుంటే ఇప్పటికే మూడో ప్రపంచ యుద్ధం మొదలైనట్లు భావిస్తున్నట్లు ఉక్రెయిన్‌ సైనిక మాజీ కమాండర్‌ ఇన్‌ చీఫ్‌ వాలెరీ జలుజ్నీ పేర్కొన్నారు. ప్రస్తుతం బ్రిటన్‌లో ఉక్రెయిన్ రాయబారిగా ఉన్న వాలెరీ జలుజ్నీ.. ఓ అవార్డు ప్రదానోత్సవ కార్యక్రమంలో ఈ వ్యాఖ్యలు చేశారు. ఇటీవల ఉక్రెయిన్‌-రష్యా మధ్య పరస్పర క్షిపణి దాడులతో తీవ్ర ఉద్రిక్త పరిస్థితులు నెలకొంటున్నాయని తెలిపారు. ఇక ఉక్రెయిన్‌కు మద్దతిస్తోన్న అమెరికా.. మరోవైపు.. రష్యా దూకుడు చర్యలతో ఈ యుద్ధం మరింత ముదిరే ప్రమాదం కనిపిస్తోందని వెల్లడించారు. ఈ పరిణామాలన్నీ మూడో ప్రపంచ యుద్ధం ప్రారంభం అయినట్లు భావించవచ్చని అన్నారు. ఈ యుద్ధంలో రష్యా మిత్రదేశాలు కూడా పాల్గొనడం మూడో ప్రపంచ యుద్ధానికి సంకేతాలు అని తెలిపారు.

రష్యాకు మద్దతుగా ఉత్తర కొరియా సైనికులు ఉక్రెయిన్‌పై పోరాటం చేస్తున్నారని తెలిపిన జలుజ్నీ.. ఇరాన్‌ తయారు చేసిన డ్రోన్లను రష్యా ప్రయోగించడంతో.. ఉక్రెయిన్‌లో ప్రాణ నష్టం పెరిగిపోతోందని పేర్కొన్నారు. ఉత్తర కొరియా సైన్యం, చైనా ఆయుధాలు రష్యా-ఉక్రెయన్ యుద్ధంలో కీలక పాత్ర పోషిస్తున్నాయని వాలెరీ జలుజ్నీ పేర్కొన్నారు. ఇవన్నీ చూస్తుంటే 2024లో మూడో ప్రపంచ యుద్ధం మొదలైందనే మనం భావించవచ్చని జలుజ్నీ అభిప్రాయం వ్యక్తం చేశారు. అయితే ఈ సంక్షోభం మరింత వ్యాప్తి చెందకుండా సరైన చర్యలు తీసుకోవాలని ఉక్రెయిన్‌ మిత్రదేశాలకు ఆయన విజ్ఞప్తి చేశారు. ఈ యుద్ధాన్ని ఇంతటితే ఆపడం సాధ్యమేనని.. కానీ కొన్ని కారణాల వల్ల తమ మిత్రపక్షాలు దాన్ని అర్థం చేసుకోవడం లేదని ఆవేదన వ్యక్తం చేశారు. ఉక్రెయిన్‌కు ఇప్పటికే అనేక మంది శత్రువులు ఉన్నారనేది వాస్తవం అని పేర్కొన్నారు.