ఏక్‌నాథ్ షిండేకు అజిత్ పవార్ షాక్.. మహారాష్ట్ర ముఖ్యమంత్రిగా దేవేంద్ర ఫడ్నవీస్?

 మహారాష్ట్ర అసెంబ్లీ ఎన్నికల ఫలితాల్లో మహా వికాస్ ఆఘాడీ కూటమిని మట్టికరిపించి.. అధికార మహాయుతి కూటమి ఘన విజయం సాధించిన విషయం తెలిసిందే. అయితే ప్రభుత్వ ఏర్పాటుపై ఇప్పుడు బీజేపీ, షిండే శివసేన, అజిత్ పవార్ ఎన్సీపీలు తీవ్ర కసరత్తు చేస్తున్నాయి. కానీ ముఖ్యమంత్రి ఎవరు అనేదే ఇప్పుడు మిలియన్ డాలర్ల ప్రశ్నగా మారింది. ఇక దేవేంద్ర ఫడ్నవీస్ సీఎం అవుతారని బీజేపీ నేతలు, కార్యకర్తలు చెబుతుండగా.. ప్రస్తుత ముఖ్యమంత్రి ఏక్‌నాథ్ షిండేనే మళ్లీ సీఎం పీఠంపై కూర్చుంటారని షిండే శివసేన వర్గం పేర్కొంటోంది. ఎక్కువ సీట్లు వచ్చిన పార్టీకే సీఎం పదవి ఇవ్వాల్సిన రూల్ ఏమీ లేదని.. ఇప్పటికే సీఎం ఏక్‌నాథ్ షిండేనే.. ఎన్నికల ఫలితాల వెల్లడి రోజు పేర్కొనడం గమనార్హం. ఇక అజిత్ పవార్‌ సీఎం కావాలని.. ఆయన వర్గం ఎన్సీపీ నేతలు డిమాండ్ చేస్తుండటం విశేషం.

ఇక మహారాష్ట్ర అసెంబ్లీ గడువు రేపటితో ముగియనుంది. దీంతో ఆలోగా కొత్త ప్రభుత్వం ఏర్పాటు కావాల్సి ఉంది. ఈ నేపథ్యంలోనే సీఎం ఎంపిక రసవత్తరంగా మారింది. ఇలాంటి పరిణామాల నేపథ్యంలోనే అజిత్ పవార్ కీలక అడుగు వేసినట్లు తెలుస్తోంది. సీఎం ఎవరు అనేదానిపై దేవేంద్ర ఫడ్నవీస్, ఏక్‌నాథ్ షిండేల్లో.. దేవేంద్ర ఫడ్నవీస్ వైపే అజిత్ పవార్ మొగ్గు చూపుతున్నట్లు తెలుస్తోంది. ఈ క్రమంలోనే తాజాగా తన వర్గం ఎమ్మెల్యేలతో అజిత్ పవార్ భేటీ అయ్యారు. ఈ సమావేశంలో దేవేంద్ర ఫడ్నవీస్‌ను సీఎం చేసేందుకు అజిత్‌ పవార్‌తో పాటు ఆయన ఎమ్మెల్యేలంతా మద్దతు పలికినట్లు తెలుస్తోంది.

ముఖ్యమంత్రి సీటు ఎవరికి అని నిర్ణయించడానికి ఏదైనా ఫార్ములాను అనుసరిస్తున్నారా అని మీడియా అడిగిన ప్రశ్నకు స్పందించిన అజిత్ పవార్.. అలాంటిదేమీ లేదని తెలిపారు. బీజేపీ నుంచి ఫడ్నవీస్‌ను, శివసేన నుంచి ఏక్‌నాథ్ షిండే, తన పార్టీ తరఫున తాను.. అసెంబ్లీలో ఆయా పార్టీల నేతగా ఎన్నికున్నారని పేర్కొన్న అజిత్ పవార్.. తాము ముగ్గురం కూర్చొని సీఎం సీటు గురించి మాట్లాడుకుంటామని వెల్లడించారు.

మంగళవారంతో మహారాష్ట్ర శాసనసభ గడువు ముగిసేలోపు.. ప్రభుత్వాన్ని ఏర్పాటు చేయకపోతే రాష్ట్రపతి పాలన విధించే అవకాశాలు ఉన్నాయి. ఈ నేపథ్యంలోనే కొత్త ప్రభుత్వాన్ని ఏర్పాటు చేసేందుకు మహాయుతి వేగంగా చర్యలు చేపడుతోంది. ఈ క్రమంలోనే దేవేంద్ర ఫడ్నవీస్, ఏక్‌నాథ్ షిండే, అజిత్ పవార్‌లతో బీజేపీ అగ్రనేత, కేంద్రమంత్రి అమిత్‌ షా భేటీ కానున్నారు. రొటేషన్ పద్ధతిలో ముఖ్యమంత్రి పదవి కేటాయించడంపైనా ఈ భేటీలో చర్చలు జరపనున్నట్లు తెలుస్తోంది. శనివారం విడుదలైన మహారాష్ట్ర అసెంబ్లీ ఎన్నికల ఫలితాల్లో 149 స్థానాల్లో పోటీ చేసిన బీజేపీ 132 చోట్ల విజయం సాధించింది. ఈ నేపథ్యంలోనే మేజిక్ ఫిగర్ 145కు 13 సీట్ల దూరంలో ఆగిపోయింది. ఇక కూటమిలో ఉన్న ఏక్‌నాథ్ షిండే, అజిత్ పవార్ ఇద్దరిలో ఎవరు మద్దతిచ్చినా దేవేంద్ర ఫడ్నవీస్ సీఎం కావడానికి అవకాశాలున్నాయి. ఇక ఏక్‌నాథ్ షిండేకు చెందిన శివసేన పార్టీకి 57, అజిత్ పవార్ ఎన్సీపీ 41 సీట్లు సాధించాయి.