దేశంలో మరో కొత్త కొవిడ్ వేరియంట్.. కేరళలో గుర్తింపు

కరోనా వైరస్ దాదాపుగా అంతం అయిపోయిందని ప్రపంచం భావిస్తున్న తరుణంలో ఇప్పుడిప్పుడే మళ్లీ కొత్త వేరియంట్లు పుట్టుకు రావడం మరోసారి యావత్ మానవాళిని భయంలోకి నెట్టేస్తోంది. దేశంలో మరోసారి కొవిడ్ కేసుల్లో పెరుగుదల కనిపిస్తున్న వేళ.. కేరళలో కొత్త వేరియంట్ నమోదు కావడం భయపెడుతోంది. కేరళలో వెలుగు చూసిన ఈ జేఎన్.1 సబ్‌వేరియంట్‌ తొలిసారి అమెరికాలో గుర్తించగా.. ప్రస్తుతం చైనాలో భారీగా కరోనా కేసులు నమోదు కావడానికి కారణం అయింది. అయితే మన దేశంలో మాత్రం తొలిసారి ఈ జేఎన్.1 వేరియంట్‌ను గుర్తించారు.

ఈ జేఎన్.1 సబ్‌వేరియంట్‌ను బీఏ.2.86 వేరియంట్‌గా కూడా పిలుస్తారు. ఈ జేఎన్.1 సబ్ వేరియంట్ మొదటిసారిగా సెప్టెంబర్ 2023 లో అమెరికాలో వెలుగు చూసింది. ప్రస్తుతం ఈ కొత్త వేరియంట్ గుర్తించడంతో దక్షిణాది రాష్ట్రాల్లో తీవ్ర ఆందోళన పెరుగుతోంది. ఈ కొవిడ్ సబ్-వేరియంట్ జేఎన్.1ను డిసెంబర్ 8 వ తేదీన కేరళలో కనుగొన్నారు. 79 ఏళ్ల మహిళలో లక్షణాలు కనిపించడంతో ఆమె శాంపిళ్లను తీసుకుని ల్యాబ్‌కు పంపించి పరీక్షించగా ఈ కొత్త వేరియంట్‌ను గుర్తించారు. ఈ వేరియంట్ వేగంగా వ్యాప్తి చెందడంతో పాటు మనుషుల రోగ నిరోధక వ్యవస్థపై తీవ్ర ప్రభావం చూపిస్తుందని డాక్టర్లు చెబుతున్నారు.

గతంలో సింగపూర్‌లో కూడా ఈ జేఎన్.1 సబ్ వేరియంట్‌ కేసును గుర్తించారు. ఓ భారత పర్యాటకుడిలో కూడా ఈ వైరస్‌ను కనుగొన్నారు. తమిళనాడులోని తిరుచిరాపల్లి జిల్లాకు చెందిన ఓ వ్యక్తిలో ఈ వేరియంట్‌ను కనుగొన్నారు. అయితే ఆ తర్వాత దేశంలో మళ్లీ ఎక్కడా ఈ వేరియంట్ కనిపించలేదు. తాజాగా కేరళలో వెలుగులోకి రావడంతో ఆ రాష్ట్ర వైద్యారోగ్య శాఖ అప్రమత్తమైంది. కొవిడ్ వేరియంట్ అయిన బీఏ.2.86 కు జేఎన్.1 సబ్ వేరియంట్. ఈ వేరియంట్ ద్వారా ఇప్పటి వరకు ఆస్పత్రిలో చేరడం, తీవ్రమైన అనారోగ్యానికి గురికాలేదని ఇన్సాకాగ్ చీఫ్ ఎన్‌కే అరోరా వెల్లడించారు. మరోవైపు.. దాదాపు 7 నెలల తర్వాత భారత్‌లో కోవిడ్ కేసులు పెరుగుతున్నాయి. ఇప్పటికే పలు దేశాల్లో జేఎన్.1 వ్యాప్తి పెరుగుతుండటం తీవ్ర ఆందోళన కలిగిస్తోంది.