అయోధ్య ట్రస్ట్ వద్దన్నది.. వీహెచ్‌పీ రమ్మన్నది.. అద్వానీ, జోషిలకు వింత పరిస్థితి

త్వరలోనే అయోధ్యలో దివ్యమైన రామ మందిర ప్రారంభోత్సవం జరగనుంది. ఈ క్రమంలోనే దేశవ్యాప్తంగా ప్రముఖులకు ఆహ్వానాలు అందుతోంది. ఇందులో భాగంగానే బీజేపీ కురువృద్ధులు, అయోధ్యలో రామ మందిర నిర్మాణం కోసం దశాబ్దాల పోరాటం చేసిన ఎల్‌కే అద్వానీ, మురళీమనోహర్ జోషిలను రామాలయ ప్రాణ ప్రతిష్ఠ రోజు రావద్దని ఆలయ కార్యక్రమాలను పర్యవేక్షిస్తున్న శ్రీరామ జన్మభూమి తీర్థ క్షేత్ర ట్రస్ట్ విజ్ఞప్తి చేసినట్లు తెలిసింది. ట్రస్ట్ విజ్ఞప్తికి అద్వానీ, జోషి అంగీకరించినట్లు ట్రస్ట్ ప్రధాన కార్యదర్శి చంపత్ రాయ్ తెలిపారు. ఈ అంశం తీవ్ర వివాదం కావడంతో విశ్వ హిందూ పరిషత్ స్పందించింది. స్వయంగా అద్వానీ, జోషిల ఇళ్లకు వెళ్లి.. అయోధ్య రామాలయ ప్రారంభోత్సవ కార్యక్రమానికి హాజరు కావాలని ఆహ్వానం అందించింది.

అయోధ్యలో రామ మందిర ప్రతిష్టాపన కార్యక్రమానికి ఎల్‌కే అద్వానీ, మురళీ మనోహర్ జోషిలను స్వయంగా కలిసి ఆహ్వాన పత్రిక ఇచ్చినట్టు విశ్వహిందూ పరిషత్ సభ్యుడు అలోక్ కుమార్ తెలిపారు. రామ మందిర నిర్మాణం కోసం ఎన్నో ఏళ్లుగా ఎంతో కృషి చేసిన అద్వానీ, జోషిలు ఈ కార్యక్రమానికి హాజరయ్యే అవకాశం లేదని మొదట ఆలయ ట్రస్ట్ తెలపడం తీవ్ర చర్చనీయాంశంగా మారింది. అయితే వారి వయసు, ఆరోగ్యం దృష్ట్యా ఈ వేడుకకు రావొద్దని వారిని కోరినట్లు శ్రీరామ జన్మభూమి తీర్థ క్షేత్ర ట్రస్ట్ ప్రధాన కార్యదర్శి చంపత్ రాయ్ వెల్లడించారు. ఈ విజ్ఞప్తికి అద్వానీ, జోషితోపాటు వారి కుటుంబ సభ్యులు కూడా అంగీకరించినట్లు చంపత్ రాయ్ తెలిపారు.

ఇక జనవరి 22 వ తేదీన అయోధ్య నగరంలో జరిగే రామ మందిర ఆలయ ప్రారంభోత్సవానికి ప్రధానమంత్రి నరేంద్ర మోదీ హాజరు కానున్నారు. ఇప్పటికే ఆయనకు ఆలయ ట్రస్ట్ ఆహ్వానం కూడా అందించింది. ప్రధాని కూడా హాజరు అవుతానని చెప్పినట్లు ట్రస్ట్ సభ్యులు వెల్లడించారు. జనవరి 15 వ తేదీలోపు రామాలయ ప్రారంభోత్సవానికి ఏర్పాట్లు మొత్తం పూర్తి చేస్తామని.. ఆ తర్వాతి రోజు నుంచి ప్రాణ ప్రతిష్ట పూజలు మొదలై.. జనవరి 22 వ తేదీ వరకు కొనసాగుతాయని చంపత్‌ రాయ్‌ పేర్కొన్నారు. మరోవైపు.. అయోధ్య రామ మందిర ప్రారంభోత్సవానికి దేశవ్యాప్తంగా ఉన్న హిందూ సంఘాల ప్రతినిధులు, ఆలయ పూజారులు, మఠాధిపతులు, రాజకీయ, సినీ ఇతర రంగాల ప్రముఖులకు సైతం ఇప్పటికే ఆహ్వానాలు వెళ్లాయి.