మళ్లీ మొదటికొచ్చిన రెజ్లింగ్ ఫెడరేషన్ వివాదం.. బజరంగ్ పూనియా సంచలన నిర్ణయం

రెజ్లింగ్ ఫెడరేషన్ ఆఫ్ ఇండియా - డబ్ల్యూఎఫ్ఐ మాజీ అధ్యక్షుడు, బీజేపీ ఎంపీ బ్రిజ్ భూషణ్ శరణ్ సింగ్‌కు వ్యతిరేకంగా రెజ్లర్లు కొన్ని నెలలపాటు తమ నిరసనను వ్యక్తం చేయడం దేశవ్యాప్తంగా తీవ్ర చర్చనీయాంశంగా మారింది. దేశ రాజధాని ఢిల్లీలోని జంతర్ మంతర్ వద్ద ఆందోళన చేయడం.. పార్లమెంటుకు ర్యాలీ తీయడం.. ఆ సందర్భంగా పోలీసులు ప్రదర్శించిన అత్యుత్సాహం దేశ వ్యాప్తంగా తీవ్ర సంచలనంగా మారాయి. అప్పటి డబ్ల్యూఎఫ్ఐ చీఫ్ బ్రిజ్ భూషణ్ శరణ్ సింగ్.. మహిళా రెజ్లర్లను లైంగికంగా వేధించాడని ఆరోపిస్తూ రెజ్లర్లు నెలల తరబడి నిరసన వ్యక్తం చేసి.. చివరకు సుప్రీంకోర్టును కూడా ఆశ్రయించారు. చివరికి డబ్ల్యూఎఫ్ఐకి ఎన్నికలు నిర్వహించాలని సుప్రీంకోర్టు ఆదేశాలు జారీ చేసింది. అయితే ఆ తర్వాత నిర్వహించిన డబ్లూఎఫ్ఐ అధ్యక్ష ఎన్నికల్లో బ్రిజ్ భూషణ్ శరణ్ సింగ్ సన్నిహితుడైన సంజయ్ సింగ్ ఎన్నిక కావడంతో సమస్య మళ్లీ మొదటికి వచ్చింది.

భారత రెజ్లింగ్‌ సమాఖ్య కొత్త అధ్యక్షుడిగా సంజయ్‌ సింగ్‌ ఎన్నికవడంతో రెజ్లింగ్‌లో మరోసారి తీవ్ర కలకలం సృష్టించింది. ఈ డబ్ల్యూఎఫ్ఐ చీఫ్ ఫలితాలపై తీవ్ర అసంతృప్తి వ్యక్తం చేసిన రెజ్లర్‌ సాక్షి మలిక్‌ ఇప్పటికే రెజ్లింగ్‌కు కన్నీటితో రిటైర్మెంట్ ప్రకటించగా.. తాజాగా మరో రెజ్లర్‌ బజ్‌రంగ్‌ పునియా సంచలన నిర్ణయం తీసుకున్నాడు. తనకు వచ్చిన పద్మ శ్రీ పురస్కారాన్ని వెనక్కి ఇస్తున్నట్లు సోషల్‌ మీడియా వేదికగా ప్రకటించాడు. ఈ సందర్భంగా ప్రధాని నరేంద్ర మోదీకి ఒక లేఖ రాశాడు. ‘‘ప్రియమైన మోదీజీ.. మీరు మీ పనుల్లో బిజీగా ఉంటారని తెలుసు. కానీ ఈ దేశంలో రెజ్లర్ల పరిస్థితిని మీ దృష్టికి తీసుకొచ్చేందుకు ఈ లేఖ రాస్తున్నా. డబ్ల్యూఎఫ్‌ఐ మాజీ చీఫ్ బ్రిజ్‌భూషణ్‌పై లైంగిక వేధింపుల ఆరోపణలు చేస్తూ ఈ ఏడాది జనవరిలో మహిళా రెజ్లర్లు ఆందోళన చేసిన విషయం మీకు తెలుసు. వారికి నేను కూడా మద్దతు తెలుపుతూ నిరసనలో పాల్గొన్నాను. అయితే చర్యలు తీసుకుంటామని ప్రభుత్వం హామీ ఇవ్వడంతో మేము ఆందోళన విరమించాం. కానీ నెలలు గడిచినా బ్రిజ్‌భూషణ్‌పై ఎఫ్‌ఐఆర్‌ నమోదు చేయకపోవడంతో మేం మళ్లీ రోడెక్కాల్సి వచ్చింది. న్యాయం కోసం మా పతకాలను గంగా నదిలో కలిపేద్దామనుకున్నాం. అప్పుడు కూడా బ్రిజ్ భూషణ్‌పై చర్యలు తీసుకుంటామని ప్రభుత్వం హామీ ఇచ్చింది. కానీ తాజాగా డబ్ల్యూఎఫ్‌ఐ చీఫ్‌గా సంజయ్ సింగ్ ఎన్నిక కావడంతో రెజ్లింగ్‌ సమాఖ్య మళ్లీ బ్రిజ్‌భూషణ్‌ చేతుల్లోకి వెళ్లింది. న్యాయం కోసం ఎక్కడికెళ్లాలో మాకు అర్థం కావట్లేదు. దీన్ని భరించలేక సాక్షి మలిక్‌ ఇప్పటికే రిటైర్మెంట్‌ ప్రకటించింది. 2019 లో నాకు పద్మ శ్రీ అవార్డు దక్కింది. అర్జున, ఖేల్‌రత్న వంటి అవార్డులు కూడా వచ్చాయి. డబ్ల్యూఎఫ్ఐ ఎన్నిక నన్ను ఎంతో నిరాశకు గురి చేసింది. అందుకే నా పద్మ శ్రీ అవార్డును మీకే (ప్రధాని మోదీ) తిరిగి ఇచ్చేయాలని నిర్ణయించుకున్నా’’ అంటూ బజరంగ్ పునియా తన లేఖలో ప్రధానికి వివరించాడు.

బ్రిజ్‌భూషణ్‌పై లైంగిక వేధింపుల ఆరోపణలు చేస్తూ స్టార్ రెజ్లర్లు వినేశ్‌ ఫొగాట్‌, సాక్షి మాలిక్, బజ్‌రంగ్‌ పునియా సహా చాలా మంది రెజ్లర్లు ఇప్పటికే రెండు సార్లు ఉద్యమం చేశారు. అయితే బ్రిజ్ భూషణ్ సన్నిహితుడు అయిన సంజయ్‌ సింగ్‌ ప్రస్తుతం డబ్ల్యూఎఫ్‌ఐకి అధ్యక్షుడు కావడంతో ఈ వేధింపులు ఇలాగే కొనసాగుతాయని రెజ్లర్లు తీవ్ర ఆవేదన వ్యక్తం చేస్తున్నారు.