రిపబ్లిక్ డే వేడుకల చీఫ్ గెస్ట్‌గా ఫ్రాన్స్ అధ్యక్షుడు.. బైడెన్ గైర్హాజరీతో మేక్రాన్‌కు ఆహ్వానం!

జనవరి 26 వ తేదీన గణతంత్ర దినోత్సవ వేడుకలను ఘనంగా నిర్వహించేందుకు కేంద్ర ప్రభుత్వం సిద్ధమవుతోంది. ఈ క్రమంలోనే ఏటా రిపబ్లిక్ డే సందర్భంగా విదేశీ నేతలను ఆహ్వానించడం సంప్రదాయంగా వస్తోంది. అయితే వచ్చే ఏడాది గణతంత్ర వేడుకలకు ఫ్రాన్స్ అధ్యక్షుడు ఇమ్మాన్యుయేల్‌ మేక్రాన్‌ హాజరు కానున్నారు. ఈ మేరకు ఫ్రాన్స్ అధ్యక్షుడిని 2024 గణతంత్ర వేడుకలకు ముఖ్య అతిథిగా ఆహ్వానించినట్లు కేంద్ర ప్రభుత్వ అధికారిక వర్గాలు శుక్రవారం వెల్లడించాయి. అయితే ఈ రిపబ్లిక్ డే వేడుకలకు అమెరికా అధ్యక్షుడు జో బైడెన్‌ను అంతకుముందు ఆహ్వానించినట్లు భారత్‌లోని అమెరికా రాయబారి ఎరిక్‌ గార్సెట్టి వెల్లడించారు. అయితే పలు కారణాల వల్ల ఈ గణతంత్ర దినోత్సవ వేడులకు హాజరు కాలేనని జో బైడెన్‌ చెప్పినట్లు తెలుస్తోంది. ఈ నేపథ్యంలోనే ఫ్రాన్స్‌ అధ్యక్షుడు ఇమ్మాన్యూయేల్ మేక్రాన్‌ను ఆహ్వానించినట్లు సమాచారం.

అయితే ఈ ఏడాది జులైలో పారిస్‌ వేదికగా జరిగిన ఫ్రాన్స్‌ జాతీయ దినోత్సవ బాస్టిల్‌ డే పరేడ్‌లో ప్రధాని నరేంద్ర మోదీ ముఖ్య అతిథిగా పాల్గొన్నారు. మరోవైపు ఈ ఏడాది సెప్టెంబర్‌లో భారత్‌ వేదికగా ఢిల్లీలో జరిగిన జీ 20 సదస్సులో ఇమ్మాన్యూయేల్‌ మేక్రాన్‌ పాల్గొన్నారు. భారత్‌ ఫ్రాన్స్‌ సంబంధాలను మరింత బలోపేతం చేసే దిశగా ప్రధాని నరేంద్ర మోదీతో చర్చలు జరిగాయని ఆ సమయంలో ఇమ్మాన్యూయేల్ మేక్రాన్ తెలిపారు. బాస్టిల్‌ డే పరేడ్‌కు ప్రధాని నరేంద్ర మోదీ హాజరుకావడాన్ని తమ దేశ ప్రజలు గౌరవంగా భావించారని మేక్రాన్ పేర్కొన్నారు. మరోవైపు.. 2023 గణతంత్ర వేడుకలకు ఈజిప్ట్‌ అధ్యక్షుడు అబ్దుల్‌ ఫతా అల్‌సీసీ ముఖ్య అతిథిగా హాజరయ్యారు.

2024 రిపబ్లిక్ వేడుకలకు అమెరికా అధ్యక్షుడు జో బైడెన్‌ హాజరు కావాల్సి ఉంది. ఇటీవలే ఢిల్లీలో జరిగిన జీ 20 శిఖరాగ్ర సదస్సు సందర్భంగా నిర్వహించిన ద్వైపాక్షిక చర్చల్లో భాగంగా జో బైడెన్‌తో ప్రధాని నరేంద్ర మోదీ మాట్లాడారని.. గణతంత్ర వేడుకలకు ముఖ్య అతిథిగా హాజరు కావాలని అధ్యక్షుడిని ఆహ్వానించినట్లు మన దేశంలోని అమెరికా రాయబారి ఎరిక్‌ గార్సెట్టి గతంలో వెల్లడించారు. మోదీ ఆహ్వానాన్ని బైడెన్‌ కూడా సానుకూలంగా స్పందించినట్లు కూడా చెప్పారు. అయితే ఈసారి గణతంత్ర వేడుకలకు బైడెన్ హాజరుకాకపోవచ్చని వార్తలు వస్తున్న నేపథ్యంలో తాజాగా ఇమ్మాన్యూయేల్ మేక్రాన్‌ను ఆహ్వానించినట్లు కేంద్ర ప్రభుత్వం తెలిపింది. తన మిత్ర దేశాల నేతలను ఆహ్వానించడం భారత్‌ ఆహ్వానించడం 1950 నుంచి సంప్రదాయంగా వస్తోంది.