యువత ఎక్కువ సమయం ఫేస్‌బుక్, ఇన్‌స్టాగ్రామ్‌లో మునిగిపోతున్నారు: రాహుల్ గాంధీ

దేశంలో రోజు రోజుకూ నిరుద్యోగం పెరిగిపోతోందని కాంగ్రెస్ అగ్రనేత రాహుల్ గాంధీ తెలిపారు. ఇటీవల పార్లమెంటులో జరిగిన భద్రతా వైఫల్యం దేశంలో మరో కొత్త ప్రశ్నను లేవనెత్తిందని పేర్కొన్నారు. నిరసన కారులు పార్లమెంటులోకి ప్రవేశించి స్మోక్ దాడి చేయడం.. ప్రభుత్వానికి వ్యతిరేకంగా నినాదాలు చేయడం వెనుక కారణం ఏంటని ప్రశ్నించుకుంటే.. దేశంలో పెరిగిపోతున్న నిరుద్యోగితే కారణం అని సమాధానం వచ్చిందని రాహుల్ గాంధీ వెల్లడించారు. ఈ క్రమంలోనే దేశంలో నిరుద్యోగం పెరిగిపోయి.. యువత సోషల్ మీడియా వైపు చూస్తున్నారని తెలిపారు. ఉద్యోగాలు లేక గంటల తరబడి ఫేస్‌బుక్, ఇన్‌స్టాగ్రామ్‌ల మత్తులో పడిపోతున్నారని తీవ్ర ఆవేదన వ్యక్తం చేశారు.

పార్లమెంటు నుంచి ప్రతిపక్షాలకు చెందిన దాదాపు 150 మంది ఎంపీలను బహిష్కరించడాన్ని నిరసిస్తూ ప్రతిపక్ష ఇండియా కూటమి పార్టీలకు చెందిన నేతలు దేశ రాజధాని ఢిల్లీలోని జంతర్ మంతర్ వద్ద శుక్రవారం భారీ నిరసన కార్యక్రమం చేపట్టారు. ఈ సందర్భంగా రాహుల్ గాంధీ మీడియాతో మాట్లాడారు. ఈ సందర్భంగా మీడియాపై రాహుల్ గాంధీ అసహనం వ్యక్తం చేశారు. దేశంలో పెరిగిపోతున్న నిరుద్యోగంపై మీడియా మాట్లాడటం లేదని.. కానీ సస్పెండైన ఎంపీలు పార్లమెంటు బయట చేసిన నిరసనను తాను వీడియో తీసినందుకు తనను ప్రశ్నిస్తోందని అసంతృప్తి వ్యక్తం చేశారు. పార్లమెంటులోకి ఆగంతకులు ప్రవేశించి స్మోక్ దాడి చేయడంతో బీజేపీ ఎంపీలు పరుగులు తీశారని.. ఈ ఘటనలో భద్రతా ఉల్లంఘన అనే ప్రశ్న తలెత్తిందని.. అయితే అసలు వారు ఎందుకు నిరసన తెలపాల్సి వచ్చిందనే మరో ప్రశ్న కూడా ఈ సమయంలో ఉత్పన్నమైందని.. అందుకు దేశంలో రోజు రోజుకూ పెరిగిపోతున్న నిరుద్యోగమే కారణమని రాహుల్ గాంధీ తెలిపారు.

ఇక తాను యువత మీద ఒక చిన్న సర్వే చేయించినట్లు రాహుల్ గాంధీ వెల్లడించారు. నగరాల్లో ఉండే యువత ఒక రోజులో ఎన్ని గంటలు సోషల్ మీడియాలో గడుపుతున్నారు అనే దానిపై నిర్వహించిన సర్వేలో ఆసక్తికరమైన ఫలితాలు వచ్చినట్లు తెలిపారు. 24 గంటల్లో యువత ఏడున్నర గంటల పాటు ఫేస్‌బుక్, ఇన్‌స్టాగ్రామ్‌ వంటి సోషల్ మీడియాలో సమయం గడుపుతోందని.. ఆ విషయం తెలిసి తాను షాక్‌కు గురయ్యానని రాహుల్ గాంధీ చెప్పారు. దీనికి ప్రధాన కారణం.. కేంద్రంలో అధికారంలో ఉన్న నరేంద్ర మోదీ సర్కార్.. యువతకు ఉద్యోగాలు ఇవ్వకపోవడం వల్లే జరిగిందని పేర్కొన్నారు. దేశ యువతకు సెల్ ఫోన్లు చూసుకుంటూ కాలం గడిపే అవకాశాన్ని ప్రధాని నరేంద్ర మోదీ ఇచ్చారని ఎద్దేవా చేశారు. ఇది నరేంద్ర మోదీ ప్రభుత్వం తప్పేనని.. అందుకే నిరుద్యోగ యువత పార్లమెంటు హౌస్‌లోకి దూకుతున్నారని రాహుల్ గాంధీ తీవ్ర విమర్శలు చేశారు. ఇక దేశంలో పెరిగిపోతున్న నిరుద్యోగం గురించి మాట్లాడుతుంటే.. ప్రతిపక్షాలకు చెందిన 150 మందిని పార్లమెంటు నుంచి బయటకు గెంటేశారని.. ఇది ఏదో ఒక వ్యక్తికి జరిగింది కాదని, దేశంలోని 60 శాతం ప్రజల గొంతుక అని రాహుల్ గాంధీ తెలిపారు.