ఇది అపార్ట్మెంట్ కాదు ఒక నగరమే.. ఒకే భవనంలో 20 వేల మంది నివాసం.
international | Suryaa Desk | Published : Fri, Dec 22, 2023, 11:36 PM
సాధారణంగా నగరాల్లో ఎక్కువగా అపార్ట్మెంట్లు ఉంటాయి. ఈ అపార్ట్మెంట్లు తక్కువ స్థలంలో ఎక్కువ మంది నివసించేలా నిర్మిస్తారు. దీని వల్ల ఎక్కువ స్థలం వేస్ట్ కాకుండా ఎక్కువ మంది ఉండే అవకాశం ఉంటుంది. అయితే ఒక భవనంలో మాత్రం ఏకంగా 20 వేల మంది నివాసం ఉంటున్నారు. చైనాలోని హాంగ్జౌ నగరంలో ఉంది ఈ భవనం. దీని పేరు ది రీజెంట్ ఇంటర్నేషనల్ అపార్ట్మెంట్. అయితే ఒక లగ్జరీ హోటల్ ఏర్పాటు చేద్దామని.. ఈ భారీ భవనాన్ని నిర్మించగా.. దాన్ని తర్వాత అపార్ట్మెంట్గా మార్చారు. 20 వేల మంది నివసిస్తున్నారు అంటే అది ఒక అపార్ట్మెంట్ లాగా కాకుండా ఒక చిన్న నగరాన్ని తలపించేలా ఉంటుంది.
చైనాలోని హాంగ్ జౌ నగరంలో ఉన్న ఈ ది రీజెంట్ ఇంటర్నేషనల్ అపార్ట్మెంట్ భవనం చూడటానికి ఎస్ ఆకారంలో ఉంటుంది. ఇందులో దాదాపు 39 అంతస్తులు ఉంటుంది. ఈ భవనం ఎత్తు 206 మీటర్లు. అయితే ఇందులో నివసించేవారికి కావాల్సిన అన్ని సౌకర్యాలు అదే భవనంలో అందుబాటులో ఉంటాయి. ఆ బిల్డింగ్ దాటి బయటికి వెళ్లకుండా భారీ ఫుడ్ కోర్టు, స్విమ్మింగ్ ఫూల్, సెలూన్లు, సూపర్ మార్కెట్లు, ఇంటర్నెట్ కేఫ్ ఇలా కావాల్సిన అన్ని సదుపాయాలు ఉంటాయి.
ప్రఖ్యాత సింగపూర్ శాండ్స్ హోటల్ డిజైనర్ అలీసియా లూ ఈ భవనాన్ని డిజైన్ చేశారు. 2013 లో ది రీజెంట్ ఇంటర్నేషనల్ భవనం ప్రారంభం అయింది. అయితే అప్పట్లో ఈ భవనం ఒక ప్రముఖ కట్టడంగా వార్తల్లో నిలిచింది. ఈ ది రీజెంట్ ఇంటర్నేషనల్ అపార్ట్మెంట్ను చూసేందుకు చాలా మంది తరలివచ్చేవారు. ప్రస్తుతం ది రీజెంట్ ఇంటర్నేషనల్ అపార్ట్మెంట్లో బిజినెస్మెన్లు, సోషల్ మీడియా ఇన్ఫ్లూయెన్సర్లు సహా వివిధ రంగాలకు చెందినవారు నివసిస్తున్నారు.
ఈ అపార్ట్మెంట్లో ఉన్న చిన్న రూంలకు నెలకు 220 డాలర్లు అంటే మన కరెన్సీలో రూ.18 వేలు అద్దె వసూలు చేస్తున్నారు. ఇక బాల్కనీ సదుపాయంతో విశాలంగా ఉన్న గదులకు నెలకు 550 డాలర్లు అంటే రూ. 45 వేలు అద్దె చెల్లిస్తున్నారు. ఈ అపార్ట్మెంట్కు సంబంధించిన వీడియోలు సోషల్ మీడియాలో తెగ వైరల్ అవుతున్నాయి. ఆ ఫొటోలు, వీడియోలను బట్టి చూస్తే రీజెంట్ ఇంటర్నేషనల్ అపార్ట్మెంట్ అద్దెదారులతో కిటకిటలాడుతున్నట్లు తెలుస్తోంది. సుమారు 20 వేల మంది ఈ అపార్ట్మెంట్లో నివాసం ఉండొచ్చని నెటిజన్లు అభిప్రాయపడుతున్నారు. ఈ అపార్ట్మెంట్ మొత్తం విస్తీర్ణం 2.6 లక్షల చదరపు మీటర్లు కావడంతో చైనాలోని అతి పెద్ద కట్టడాల్లో ఇది ఒకటిగా నిలిచింది.
|
|