చేయని తప్పుకు 48 ఏళ్లు శిక్ష.. చివరికి నిర్దోషిగా తేలడంతో భారీగా నష్టపరిహారం

ఓ వ్యక్తి తాను చేయని తప్పుకు 48 ఏళ్లు శిక్ష అనుభవించాడు. అక్రమ కేసులో ఇరుక్కుని తన జీవిత కాలాన్ని జైలులోనే గడిపాడు. చివరికి 48 ఏళ్ల తర్వాత అసలు ఆ కేసుకు.. ఆ వ్యక్తికి సంబంధం లేదని కోర్టు గుర్తించింది. దీంతో దాదాపు 5 దశాబ్దాల తర్వాత జైలు నుంచి విడుదల అయ్యాడు. అయితే ఈ కేసులో ఏ తప్పు చేయకున్నా సుదీర్ఘ కాలం జైలు శిక్ష అనుభవించినందుకు కోర్టు.. ఆ వ్యక్తికి నష్ట పరిహారం చెల్లించాలని ప్రభుత్వానికి ఆదేశాలు జారీ చేసింది. ఈ ఘటన అమెరికాలో చోటు చేసుకుంది.

అమెరికాలోని ఓక్లహోమాకు చెందిన 70 ఏళ్ల గ్లిన్ సైమన్స్.. ఇటీవల జైలు నుంచి విడుదల అయ్యాడు. ఆయన తన 22 ఏళ్ల వయసులో తనకు సంబంధం లేని కేసులో దోషిగా తేలి.. 1974 లో జైలుకు వెళ్లాడు. అప్పటి నుంచి సుదీర్ఘ న్యాయ పోరాటం చేయగా.. చివరికి 48 ఏళ్ల తర్వాత 70 ఏళ్ల వయసులో నిర్దోషిగా రుజువయ్యాడు. అయితే ఏ తప్పూ చేయకపోయినా 48 ఏళ్ల పాటు జైలు శిక్ష అనుభవించి చివరికి నిర్దోషిగా విడుదలైన గ్లిన్ సైమన్స్‌ను విడుదల చేస్తూ కోర్టు కీలక విషయాలు వెల్లడించింది. అత్యంత విలువైన యవ్వన ప్రాయం మొత్తం గ్లిన్ సైమన్స్ జైలులో గడిపాడని.. అది కూడా ఎలాంటి తప్పు చేయకుండానేనని తెలిపింది. ఇందుకు గ్లిన్ సైమన్స్‌కు 1.75 లక్షల డాలర్లు అంటే భారత కరెన్సీలో రూ.1.45 కోట్ల నష్ట పరిహారం చెల్లించాలని ప్రభుత్వాన్ని ఓక్లహోమా కంట్రీ జిల్లా కోర్టు తాజాగా తీర్పును వెలువరించింది. గ్లిన్ సైమన్స్‌కు చెందిన అత్యంత విలువైన సమయాన్ని వెనక్కి తీసుకురాలేమని.. అయితే ఆయనకు జరిగిన నష్టాన్ని ఈ డబ్బుతో పూడ్చాలని పరిహారాన్ని అందిస్తున్నట్లు కోర్టు తెలిపింది.

అయితే అమెరికాలో చేయని తప్పుకు అత్యధిక కాలం శిక్ష అనుభవించింది గ్లిన్‌ సైమన్స్‌ అని నేషనల్‌ రిజిస్ట్రీ ఆఫ్‌ ఎగ్జోజనరేషన్స్‌ అధికారులు వెల్లడించారు. 1974 డిసెంబర్‌లో ఓక్లహోమాలోని ఓ లిక్కర్‌ స్టోర్‌లో ఒక హత్య జరిగింది. లిక్కర్‌ స్టోర్‌‌లోకి చొరబడిన ఇద్దరు దుండగులు.. స్టోర్‌లో ఉన్న క్లర్క్‌ను కాల్చి చంపారు. అనంతరం అక్కడ ఉన్న మద్యం సీసాలను ఎత్తుకెళ్లారు. అయితే అప్పుడు గ్లిన్‌ సైమన్స్‌ వయసు 22 ఏళ్లు కాగా.. సైమన్స్‌తోపాటు డాన్‌ రాబర్ట్స్‌ అనే వ్యక్తి ఇద్దరు కలిసి ఈ హత్య చేశారని పోలీసులు తేల్చారు. దీంతో కోర్టు వారికి జైలు శిక్ష విధించింది. అయితే తాము ఎలాంటి నేరం చేయలేదని.. స్టోర్ క్లర్క్‌ను చంపలేదని గ్లిన్ సైమన్స్, డాన్ రాబర్ట్స్.. ఎంత మొర పెట్టుకున్నా ఎవరూ వినిపించుకోలేదు. అయితే 2008లో డాన్‌ రాబర్ట్స్‌ బెయిల్‌పై విడుదలయ్యాడు. అయితే ఈ కేసును మళ్లీ విచారణ జరపాలని గ్లిన్ సైమన్స్‌ కోర్టులో పిటిషన్లు దాఖలు చేయగా.. స్పందించిన కోర్టు పోలీసులకు ఆదేశాలు జారీ చేసింది. దీంతో కేసును రీ ఓపెన్ చేసిన పోలీసులు మళ్లీ విచారణ జరిపి.. చివరికి ఆ హత్యను గ్లిన్ సైమన్స్‌ చేయలేదని గుర్తించారు. దీంతో కోర్టు అతడిని నిర్దోషిగా ప్రకటించింది.

కోర్టు తనను నిర్దోషిగా ప్రకటించడంతో గ్లిన్ సైమన్స్‌ మంగళవారం జైలు నుంచి విడుదల అయ్యాడు. తాను నేరం చేయలేదు కాబట్టి శిక్షను ధైర్యంగా ఎదుర్కొన్నానని.. ఎప్పటికైనా నిర్దోషిగా విడుదలవుతానన్న నమ్మకంతో ఇన్నేళ్లు వేచి ఉన్నట్లు సైమన్స్‌ చెప్పాడు. మొత్తం 48 సంవత్సరాల ఒక నెల 18 రోజుల పాటు తాను జైలు శిక్ష అనుభవించినట్లు చెప్పాడు. తన జీవితంలో ఎంతో విలువైన సమయం జైలుపాలయ్యిందని సైమన్స్ ఆవేదన వ్యక్తం చేశాడు.