ఆరోగ్యంపై స్పీచ్ ఇస్తూ... గుండెపోటుతో ఐఐటీ ప్రొఫెసర్ మృతి
national | Suryaa Desk | Published : Sun, Dec 24, 2023, 08:41 PM
విద్యార్ధులను ఉద్దేశించి ప్రసంగిస్తూ ఓ ఫ్రొఫెసర్ వేదికపైనే గుండెపోటుతో కుప్పకూలిపోయారు. విషాదకర ఈ ఘటన ఐఐటీ కాన్పూర్లో శుక్రవారం చోటుచేసుకొంది. కాన్పూర్ ఐఐటీలో సీనియర్ ప్రొఫెసర్ సమీర్ ఖండేకర్ (53) విద్యార్థి వ్యవహారాల విభాగం డీన్గా, మెకానికల్ ఇంజినీరింగ్ హెడ్గా బాధ్యతలు నిర్వహిస్తున్నారు. శుక్రవారం ఏర్పాటు చేసిన పూర్వ విద్యార్థుల సమ్మేళనంలో ఆయన పాల్గొన్నారు. ఈ సందర్భంగా ఆయన ఆరోగ్యం గురించి ప్రసంగిస్తుండగా.. ఒక్కసారిగా ఛాతిలో నొప్పి మొదలైంది. ఒళ్లంతా చెమటలు పట్టి అస్వస్థతకు గురయ్యారు.
ఏం జరుగుతోందో తెలుసుకునేలోపు కూప్పకూలిపోయారు. దీంతో అక్కడున్న వారంతా షాక్కి గురయ్యారు. వెంటనే సమీర్ ఖండేకర్ను ఆస్పత్రికి తరలించారు. కానీ, అప్పటికే ఆయన చనిపోయినట్టు వైద్యులు ధ్రువీకరించారు. సమీర్ హఠాన్మరణంపై సహ ప్రొఫెసర్లు దిగ్భ్రాంతి వ్యక్తం చేశారు. ప్రస్తుతం మృతదేహాన్ని ఐఐటీ కాన్పూర్ ఆరోగ్య కేంద్రంలో భద్రపర్చినట్లు అధికారులు తెలిపారు. కేంబ్రిడ్జ్ యూనివర్సిటీలో చదువుతున్న ఆయన కుమారుడు ప్రవాహ్ ఖండేకర్ వచ్చిన తర్వాత అంత్యక్రియలు నిర్వహించనున్నట్టు వెల్లడించారు. ఇదిలా ఉండగా, ఐదేళ్లుగా సమీర్ అధిక కొలెస్ట్రాల్ సమస్యతో బాధపడుతున్నారని ఓ సహచర ప్రొఫెసర్ వెల్లడించారు. ఐఐటీ మాజీ డైరెక్టర్ అభయ్ ఖండేకర్ మాట్లాడుతూ.. సమీర్ హఠాన్మరణం తనను తీవ్ర దిగ్భ్రాంతికి గురిచేసిందని, ఆయన గొప్ప ఉపాధ్యాయుడు, పరిశోధకుడని అన్నారు.
|
|