బ్రిజ్ భూషణ్‌కు షాక్.. డబ్ల్యూఎఫ్ఐ కొత్త ప్యానెల్‌ రద్దుచేసిన కేంద్రం

భారత రెజ్లింగ్ సమాఖ్య నూతన కార్యవర్గాన్ని రద్దుచేస్తూ కేంద్రం సంచలన నిర్ణయం తీసుకుంది. బ్రిజ్ భూషణ్ శరణ్ సింగ్ సన్నిహితుడు సంజయ్ సింగ్ డబ్ల్యూఎఫ్ఐ నూతన అధ్యక్షుడిగా ఎన్నిక కావడంపై దుమారం రేగుతున్న వేళ కేంద్ర క్రీడల శాఖ ఈ నిర్ణయం తీసుకోవడం గమనార్హం. డబ్ల్యూఎఫ్ఐ ఎన్నికల్లో 47 ఓట్లకు 40 ఓట్లు గెలుచుకుని సంజయ్ సంచలన విజయం సాధించారు. అధ్యక్షుడిగా ఎన్నికైన వెంటనే ఆయన ఈ ఏడాది చివర్లో ఉత్తర్ ప్రదేశ్‌ గోండాలోని నందిని నగర్‌లో నేషనల్స్ జరుగుతాయని ప్రకటించారు. ఈ ప్రకటనను తొందరు పాటు చర్యగా అభివర్ణించిన క్రీడల శాఖ.. రెజ్లర్లకు తగిన నోటీసు ఇవ్వకుండా తీసుకున్న నిర్ణయంగా ప్రకటించింది. ‘కొత్తగా ఏర్పాటు చేసిన డబ్ల్యూఎఫ్ఐ ప్యానెల్ పూర్తిగా మాజీ ఆఫీస్ బేరర్ల అధీనంలో ఉన్నట్టు, స్పోర్ట్స్ కోడ్‌ను పూర్తిగా ఉల్లంఘించినట్టు కనిపిస్తోంది’' అని కేంద్ర క్రీడల మంత్రిత్వ శాఖ ఒక ప్రకటనలో పేర్కొంది. మాజీ ఆఫీస్ బేరర్ల అధీనంలో రెజ్లింగ్ సమాఖ్య కార్యకలాపాలు నడుస్తున్నట్టు భావించాల్సి వస్తోందని, గతంలో క్రీడాకారుపై లైంగిక వైధింపులకు పాల్పడ్డారనే ఆరోపణల అంశం ప్రస్తుతం కోర్టు విచారణ ముందు ఉందని తెలిపింది.

సంజయ్ సింగ్ గతంలో ఉత్తర్ ప్రదేశ్ రెజ్లింగ్ సమాఖ్య ఉపాధ్యక్షుడిగా ఉన్నారు. డబ్ల్యూఎఫ్ఐ ఎగ్జిక్యూటివ్ కౌన్సిల్‌ జాయింట్ సెక్రటరీగా 2019 నుంచి ఉన్నారు. డబ్ల్యూఎఫ్ఐ కొత్త అధ్యక్షుడిగా ఆయన ఎన్నిక కావడంపై రెజ్లర్లు నిరసనకు దిగారు. సాక్షి మలిక్ తాను రిటైర్ అవుతున్నట్టు ప్రకటించగా, బజ్‌రంగ్ పునియా 'పద్మశ్రీ' అవార్డును తిరిగి ఇచ్చేస్తూ ప్రధానికి లేఖ రాశారు. పారా రెజ్లర్ విరేంద్ర సింగ్ కూడా తన పద్మశ్రీ వెనక్కి ఇచ్చేస్తానని ప్రకటించారు. క్రీడల శాఖ నిర్ణయంపై సంజయ్ సింగ్‌ను ప్రశ్నించగా.. తనకు ఇప్పటి వరకూ ఎటువంటి లేఖ అందలేదని అన్నారు. ‘నేను విమానంలో ఉన్నాను.. నాకు ఎటువంటి లేఖ అందలేదు... ఆ లేఖను చూసిన తర్వాత స్పందిస్తాను.. ఓ యాక్టివిటీ ఆపమన్నట్టు నేను విన్నాను’ అని తెలిపారు.