ఏపీ సీఎస్‌కు అచ్చెన్నాయుడు లేఖ,,,,తహసీల్దారు ముర్షావలి అంశంపై ప్రస్తావన

ఏపీ సీఎస్ జవహర్‌రెడ్డికి ఏపీ టీడీపీ అధ్యక్షుడు అచ్చెన్నాయుడు లేఖ రాశారు. శ్రీ సత్యసాయి జిల్లా మడకశిర తహశీల్దార్‌ ముర్షావలి అవినీతి అంశంపై మాట్లాడినందుకు సస్పెండ్ చేశారని.. ఏకారణంతో అయినా లంచం తీసుకోవడం సమర్థనీయం కాదన్నారు. అయితే ముర్షావలి లేవనెత్తిన సమస్యపైనా ప్రభుత్వం దృష్టిపెట్టాల్సిన అవసరం ఉందన్నారు. ప్రభుత్వంలో ప్రస్తుతం ఉన్న పరిస్థితులు ఎంత దారుణంగా ఉన్నాయో ముర్షావలి వివరించారన్నారు.

వ్యవస్థలు ఎంత నిర్వీర్యం అయ్యాయో తద్వారా తెలుస్తోందన్నారు. వీడియో ద్వారా ముర్షావల్లి వెల్లడించిన సమస్య పరిష్కారంపై ప్రభుత్వం దృష్టిపెట్టకుండా సస్పెండ్ చేయడం విడ్డూరంగా ఉందన్నారు. ప్రభుత్వ చర్య చూస్తుంటే వ్యాధికి కాకుండా వ్యాధి లక్షణాలకు చికిత్స చేస్తున్నట్లు ఉందన్నారు. ముర్షావలి సస్పెన్షన్ ఆర్డర్‌ను ఉపసంహరించుకుని. సమస్యకు మూలంపై ప్రభుత్వం దృష్టిపెట్టాలన్నారు. ముర్షావలి ప్రకటన ద్వారా పరిస్థితుల గురించి తెలుసుకొని.. అటువంటి ఘటనలు పునరావృతం కాకుండా ప్రభుత్వం తగు చర్యలు చేపట్టాలన్నారు.

శ్రీసత్యసాయి జిల్లా మడకశిర తహసీల్దారు ముర్షావలి ఇటీవల ఓ రైతును ప్రశ్నించిన వీడియో వైరలైన సంగతి తెలిసిందే. మెళవాయి వీఆర్‌వో అవతలి వ్యక్తి నుంచి లంచం తీసుకుని, తనకు అన్యాయం చేస్తున్నాడని ఓ రైతు ఇటీవల తహసీల్దారుకు ఫిర్యాదు చేశారు. వీఆర్వో లంచం అడిగారంటూ ఓ రైతు తనకు మొర పెట్టుకోవడానికి రావడంతో తహసీల్దారు ముర్షావలి స్పందించారు. మంత్రులు, ఉన్నతాధికారులు పర్యటనలకు వస్తే రూ.లక్షల్లో ఖర్చవుతోందని.. ఈ డబ్బు నా జీతం నుంచి ఖర్చు పెట్టాలా అంటూ ఆవేశంగా మాట్లాడారు.

రాముడి కాలంలోనే లంచాలున్నాయని.. ఏ ముఖ్యమంత్రి, ప్రధానమంత్రి ఉన్నా అంతే అరంరాకె. 2 నెలల కిందట తాను వచ్చిన కొత్తలో ఓ మంత్రి ఇక్కడికి వస్తే నలుగురు వీఆర్‌వోలు రూ.1.75 లక్షలు ఖర్చుచేశారన్నారు. ఒక్క రూపాయీ రాలేదని.. ఇటీవల రాష్ట్రస్థాయి మహిళా అధికారి ఒకరు వచ్చారని.. ఆమె తినడానికి భారీ మెనూ ఇచ్చారన్నారు. దానిని చూస్తే భయపడిపోతారని.. అవి మడకశిరలో దొరకవన్నారు. ఓ మెనూ చదివి.. ఈ ఖర్చు తహసీల్దారు భరిస్తారా? అంతా వీఆర్‌వోలతోనే తెప్పిస్తామన్నారు. వీటికి లంచంగా తీసుకున్న డబ్బే ఇస్తామన్నారు. కొన్ని పుండ్లు అందరికీ చూపించలేమని.. డాక్టర్‌కు మాత్రమే చూపిస్తామన్నారు. ఈ వ్యాఖ్యల్ని తీవ్రంగా పరిగణించిన కలెక్టర్‌ అరుణ్‌బాబు ముర్షావలీని సస్పెండ్‌ చేస్తూ ఉత్తర్వులిచ్చారు. దీంతో అచ్చెన్నాయుడు స్పందించారు.. తహసీల్దారుకు మద్దతు తెలిపారు. అలాగే సీపీఐ కూడా ఈ అంశంపై స్పందించింది.

అధికారుల అవినీతికి సీఎం జగన్‌, మంత్రులే కారకులన్నారు సీపీఐ రాష్ట్ర కార్యదర్శి రామకృష్ణ. సీఎం, మంత్రులు, అధికారుల పర్యటనలకయ్యే ఖర్చులను కింద స్థాయి అధికారులు, సిబ్బంది సమకూర్చాలంటూ ఒత్తిడి పెంచడం అవినీతికి అస్కారం ఇవ్వడమే అన్నారు. కేవలం మడకశిర తహసీల్దార్‌ను సస్పెండ్‌ చేయడంతో సమస్యకు పరిష్కారం లభించినట్లు కాదన్నారు. వాస్తవానికి తహసీల్దార్‌ ఉన్నది ఉన్నట్లు చెప్పారని.. తనపై ఉన్న ఒత్తిడిని తెలియజేశారన్నారు. సీఎం జగన్‌, మంత్రులు పెద్ద ఎత్తున అవినీతికి పాల్పడుతుంటే కింది స్థాయి అధికారులు అవినీతిలో కూరుకుపోవడంలో వింతేముందన్నారు.