జనసేనలోకి వైసీపీ ఎమ్మెల్సీ?.. ఆ రెండు సీట్లలో ఒకటి పక్కానా!

ఏపీలో ఎన్నికలకు మరో మూడు నెలల సమయం మాత్రమే ఉంది. దీంతో రాజకీయాలు ఆసక్తికంరగా మారుతున్నాయి.. పార్టీల్లోకి చేరికలు మొదలయ్యాయి. ఈ క్రమంలో విశాఖకు చెందిన వైఎస్సార్‌సీపీ ఎమ్మెల్సీ పార్టీ మారబోతున్నట్లు ప్రచారం జరుగుతోంది. ఎమ్మెల్సీ వంశీకృష్ణ శ్రీనివాస్‌ జనసేనలో చేరబోతున్నారంటూ సోషల్‌ మీడియాలో జోరుగా ఊహాగానాలు వినిపిస్తున్నాయి. జనసేన అధినేత పవన్ కళ్యాణ్ ఇవాళ కాకినాడకు వస్తున్నారు.. వంశీ పవన్‌తో భేటీ కాబోతున్నట్లు కొందరు ప్రచారం చేస్తున్నారు. తన వర్గం కార్పొరేటర్లతో మంతనాలు జరుపుతున్నారని.. పవన్‌తో భేటీ తర్వాత వంశీకృష్ణ జనసేన పార్టీలో చేరే అవకాశాలున్నాయంటున్నారు. వంశీ భీమిలి లేదా విశాఖ సౌత్ నుంచి జనసేన అభ్యర్థిగా పోటీ చేయాలని నిర్ణయించుకున్నట్లు ప్రచారం జరుగుతోంది.

మంగళవారం సాయంత్రం వైఎస్సార్‌సీపీ జిల్లా అధ్యక్షుడు కోలా గురువులు శివాజీపాలెంలోని వంశీకృష్ణ కార్యాలయానికి వెళ్లి చాలాసేపు ఆయనతో మంతనాలు జరిపారు. సోషల్‌ మీడియాలో వంశీ గురించి జరుగుతున్న ప్రచారం చూసి తాను వ్యక్తిగతంగా ఆయనతో మాట్లాడేందుకు వచ్చానని గురువులు అంటున్నారు. పార్టీ మారే ఆలోచన లేదని వంశీకృష్ణ తనకు చెప్పారన్నారు. పక్కనే ఉన్న వంశీకృష్ణ స్పందన కోరగా.. బుధవారం మాట్లాడుకుందామంటూ వెళ్లిపోయారు. వైఎస్సార్‌సీపీ ఎమ్మెల్సీ వంశీకృష్ణ శ్రీనివాస్‌ పార్టీ మార్పు వ్యవహారంపై మంత్రి గుడివాడ అమర్నాథ్ స్పందించారు. ఆయన పార్టీ మారుతున్న సమాచారం తన దగ్గర లేదని.. పార్టీ ఆయనకు చాలా అవకాశాలు ఇచ్చిందని.. ఎమ్మెల్సీ పార్టీ మారితే రాజకీయంగా ఆత్మహత్య సదృశ్యమే అవుతుందన్నారు. ఈ పరిణామాలతో వైఎస్సార్‌సీపీ నేతల్లో ఉత్కంఠ మొదలైంది. ఆయన ఎలాంటి నిర్ణయం తీసుకుంటారన్నది ఆసక్తికరంగా మారింది.

గతంలో గ్రేటర్ విశాఖ ఎన్నికల్లో కార్పోరేటర్‌గా గెలిచిన వంశీకృష్ణ శ్రీనివాస్ జీవీఎంసీ మేయర్ పదవి దక్కుతుందని భావించారు. అయితే ముఖ్యమంత్రి జగన్ మాత్రం సామాజిక సమీకరణాలతో ఆయనకు బదులుగా హరికుమారికి అవకాశం కల్పించారు. అప్పటి నుంచి వంశీకృష్ణ శ్రీనివాస్ అసంతృప్తిగా ఉన్నారు. దీంతో ఆయనకు గతేడాది ఎమ్మెల్సీ ఎన్నికల్లో స్ధానిక సంస్ధల కోటాలో విశాఖ నుంచి పదవి దక్కింది.