ఏపీ వైద్య ఆరోగ్య శాఖ పనితీరు భేష్.. కేంద్ర మంత్రి ప్రశంసలు

కురిపించారు.ఆరోగ్య రంగంపై ఏపీ ప్రభుత్వం ప్రత్యేక దృష్టి సారించడం స్ఫూర్తిదాయకమని కేంద్ర మంత్రి కొనియాడారు. ఈ సందర్భంగా ముఖ్యమంత్రి జగన్, వైద్య ఆరోగ్య శాఖ మంత్రి విడదల రజనిని ప్రత్యేకంగా అభినందిస్తున్నట్టు ఆయన తెలిపారు. ఈ విషయంలో కేంద్రం తరఫున సంపూర్ణ సహకారం అందిస్తామని ఆయన హామీ ఇచ్చారు. కేంద్ర, రాష్ట్ర ప్రభుత్వాల పరస్పర సహకారంతోనే ప్రజలకు మరింత మేలు జరుగుతుందని మాండవీయ అభిప్రాయపడ్డారు.

ఆరోగ్యవంతమైన ప్రజలతో ఆరోగ్యవంతమైన సమాజం ఏర్పడుతుందని పేర్కొన్నారు. శుక్రవారం విజయవాడ జీజీహెచ్‌లో క్రిటికల్ కేర్ బ్లాక్ నిర్మాణానికి శంకుస్థాపన చేశారు. అనంత‌రం గుంటూరు జిల్లా మామిళ్లపల్లిలో ఫ్యామిలీ డాక్టర్ ప్రోగ్రాంను ఆయన పరిశీలించారు. తర్వాత మంగళగిరి ఎయిమ్స్‌ను ఆయన సందర్శించారు. ఈ సంద‌ర్భంగా ఆయన ఆరోగ్యకరమైన సమాజం దేశాన్ని సమృద్ధిగా మారుస్తుంది అని పేర్కొన్నారు. ఆరోగ్య సేవలు అందరికీ అందుబాటులో ఉండాలని, ఆయుష్మాన్ ఆరోగ్య మందిరాలలో 10 రకాల టెస్టులు జరుగుతాయని కేంద్ర ఆరోగ్య మంత్రి చెప్పారు.

ఆసుపత్రులు నిర్మించినా అందుకు తగినంత వైద్యులు ఉండాలని మెడికల్ కాలేజీలు తీసుకొచ్చామని మాండవీయ వెల్లడించారు. దేశంలో ప్ర‌స్తుతం ప్ర‌భుత్వ‌, ప్రైవేటు మెడిక‌ల్ క‌ళాశాల‌లో 1.07 ల‌క్షల సీట్లు దేశంలో అందుబాటులో ఉన్నాయ‌ని తెలిపారు. అలాగే, దేశమంతటా 3 నుంచీ 4 లక్షలు టెలి కన్సల్టేషన్లు జరుగుతున్నాయని వివరించారు. ప్రధాన మంత్రి నరేంద్ర మోదీ నేతృత్వంలో ఆధునిక భారత నిర్మాణం జరుగుతోంది అని మన్‌సుఖ్ మాండవీయ పేర్కొన్నారు. ఆయుష్మాన్ భారత్ హెల్త్ మిషన్ ఏపీలో చాలా బాగా పని చేస్తోంద‌ని కితాబిచ్చారు. రాష్ట్రానికి కేంద్ర ప్రభుత్వం నుంచి పూర్తి స్ధాయి మద్దతు ఉంటుంద‌ని,, రాష్ట్రం ఆరోగ్య సేవలకు చేసే ఖర్చుకు నిధులు ఇవ్వడానికి కేంద్రం వెనుకాడబోదు అని మన్సుఖ్ మాండవీయ స్పష్టం చేశారు. ఈ కార్యక్రమంలో ఆరోగ్య మంత్రి విడదల రజని, ఎంపీ సత్యవతి, స్థానిక ఎమ్మెల్యే మల్లాది విష్ణు, రాష్ట్ర వైద్య ఆరోగ్య శాఖ ఉన్నతాధికారులు పాల్గొన్నారు.