ఏపీ రాజకీయాల్లోకి టాలీవుడ్ డైరెక్టర్ ఎంట్రీ?.. అక్కడి నుంచి ఎంపీగా పోటీ!
Andhra Pradesh Telugu | Suryaa Desk | Published : Fri, Jan 05, 2024, 09:16 PM
ఏపీలో ఎన్నికలకు సమయం దగ్గరపడుతోంది.. మరో రెండు, మూడు నెలల్లో ఎన్నికల జరగడం ఖాయంగా కనిపిస్తోంది. ఈ క్రమంలో పరిణామాలు వేగంగా మారుతున్నాయి.. పార్టీలన్నీ ఎన్నికల మూడ్‌లోకి వెళ్లిపోయాయి. ఇప్పటి నుంచే అభ్యర్థుల ఎంపిక, ప్రచారం, మేనిఫెస్టో సహా ఇతర అంశాలపై ఫోకస్ పెట్టాయి. ఈ క్రమంలో టాలీవుడ్ డైరెక్టర్ ఏపీ రాజకీయాల్లోకి ఎంట్రీ ఇవ్వబోతున్నారనే చర్చ జరుగుతోంది. తాజాగా ఆయన పర్యటనతో సోషల్ మీడియాలో ఊహాగానాలు మొదలయ్యాయి.
సినీ దర్శకుడు వీవీ వినాయక్ సొంతూరు తాడిపూడి వచ్చారు. సర్పంచి నామా శ్రీనివాసు, జడ్పీ వైస్‌ ఛైర్మన్‌ శ్రీలేఖ, వైఎస్సార్‌సీపీ నేతలు కలిసి స్వాగతం పలికారు. తాడిపూడి పక్కనే ఉన్న ఏలూరు జిల్లా పోలవరం మండలం మహాలక్ష్మిపేటలో జరిగే గొంతెలమ్మ పండగకు విచ్చేశారు. ఆయన రానున్న ఎన్నికల్లో పోటీ చేస్తారా, లేదా ఇతర రాజకీయ పరిణామాలపై నాయకుల మధ్య చర్చ జరిగినట్లు తెలుస్తోంది. ఒకవేళ పోటీ చేస్తే ఎక్కడ నుంచి చేయొచ్చు అనే దానిపై కూడా మాట్లాడుకున్నట్లు సమాచారం.
వీవీ వినాయక్ వైఎస్సార్‌సీపీలో చేరతారనే ప్రచారం మొదలైంది. కాకినాడ, ఏలూరు లోక్‌సభ నియోజకవర్గాల్లో.. ఎంపీ అభ్యర్థిగా పోటీ చేస్తారనే టాక్ మొదలైంది. ఆ దిశగానే ఆయన పర్యటనకు వచ్చారనే ఊహాగానాలు వినిపిస్తున్నాయి. అయితే వీవీ వినాయక్ మాత్రం ఇప్పటి వరకు పొలిటికల్ ఎంట్రీపై ఎలాంటి కామెంట్స్ చేయలేదు. సోషల్ మీడియాలో మాత్రం ఆయన రాజకీయాల్లోకి రావడం ఖాయం అంటూ కొందరు చెబుతున్నారు.
|
|