చంద్రబాబు నన్ను జోక్యం చేసుకోవద్దన్నారు.. ఎంపీ కేశినేని నాని సంచలనం

విజయవాడ టీడీపీలో రాజకీయాలు ఆసక్తికరంగా మారాయి. ఎన్టీఆర్ జిల్లా తిరువూరులో చంద్రబాబు సభకు సంబంధించి కేశినేని బ్రదర్స్ మధ్య వివాదం మొదలైంది. ఈ క్రమంలో రెండు వర్గాల మధ్య ఘర్షణ కూడా జరిగిన సంగతి తెలిసిందే. ఈ క్రమంలో విజయవాడ ఎంపీ కేశినేని నాని.. వచ్చే ఎన్నికల్లో విజయవాడ ఎంపీ అభ్యర్థిపై సోషల్ మీడియాలో పెట్టిన పోస్ట్ చర్చనీయాంశమైంది. 'అందరికీ నమస్కారం.. నిన్న సాయంత్రం చంద్రబాబుగారి ఆదేశాల మేరకు మాజీ మంత్రివర్యులు ఆలపాటి రాజా గారు ,ఎన్టీఆర్ జిల్లా టీడీపీ అధ్యక్షులు మాజీ మంత్రివర్యులు నెట్టం రఘురాంగారు మరియు మాజీ ఎంపీ కృష్ణా జిల్లా టీడీపీ అధ్యక్షులు కొనకళ్ల నారాయణ గారు నన్ను కలసి 7 వ తేదీన తిరువూరు పట్టణంలో జరిగే సభకు వేరే వారిని ఇంచార్జ్ గా చంద్రబాబు గారు నియమించారని కాబట్టి ఆ విషయంలో నన్ను కలగ చేసుకోవద్దని చంద్రబాబు గారు నాకు చెప్పమన్నారని తెలియచేసారు . అట్లాగే రాబోయే ఎన్నికలో నా స్థానంలో విజయవాడ లోకసభ అభ్యర్థిగా వేరేవారికి అవకాశం ఇవ్వాలనుకుంటున్నారు కాబట్టి ఎక్కువగా పార్టీ వ్యవహారలో నన్ను జోక్యం చేసుకోవద్దని చంద్రబాబు గారు ఆదేశించారని నాకు తెలియచేసారు. అధినేత ఆజ్ఞలను తూచా తప్పకుండా శిరసావహిస్తానని వారికి నేను హామీ ఇచ్చాను' అన్నారు కేశినేని నాని. తిరువూరు సభ విషయంలో కేశినేని బ్రదర్స్ మధ్య వివాదం రేగింది. ఈ క్రమంలో ఈ సభ నిర్వహించే బాధ్యతలు.. టీడీపీ అధిష్టానం ఇద్దరిలో ఎవరికి అప్పగిస్తారనే చర్చ జరుగుతోంది. ఈ క్రమంలో తనకు సభ బాధ్యతలు అప్పగించలేదని కేశినేని నాని తెలిపారు. అయితే ఈ సభ బాధ్యతల్ని కేశినేని నాని సోదరుడు చిన్ని (శివనాథ్‌)కు అప్పగించినట్లు తెలుస్తోంది. ఈ క్రమంలోనే ఎంపీ నాని స్పందించారు. తనను జోక్యం చేసుకోవద్దని తెలియజేశారని.. తాను కూడా అధినేత ఆజ్ఞలను పాటిస్తానని ప్రకటించారు. దీంతో విజయవాడ రాజకీయం ఆసక్తికరంగా మారింది. తిరువూరు సభకు కేశినేని నాని వెళతారా లేదా అన్న చర్చ జరుగుతోంది.

తెలుగుదేశం పార్టీలో తాను కార్యకర్తను మాత్రమే అని కేశినేని చిన్ని స్పష్టం చేశారు. చంద్రబాబు నాయుడు ముఖ్యమంత్రి అవ్వాలని మాత్రం పనిచేస్తున్నట్లు తెలిపారు. తమ నాయకుడి సభను జయప్రదం చేయడానికి తానొక కార్యకర్తలా తిరువూరు వెళ్లడం జరిగిందన్నారు. టీడీపీ కార్యకర్తలకు రాష్ట్రంలో ఎక్కడైనా తిరిగే హక్కు ఉందన్నారు. తమ నాయకుడి కోసం పార్టీ కోసం ఎక్కడైనా తిరిగే హక్కు ఉందని తెలిపారు. తమ ముందు ఉన్న ఏకైక ఎజెండా తెలుగుదేశం పార్టీ గెలవాలని.. చంద్రబాబు నాయుడు ముఖ్యమంత్రి అవ్వాలన్నారు. పార్టీలో చిన్న చిన్న మనస్పర్థలు తప్పవని.. అవన్నీ టీ కప్పులో తుఫానులా తొలగి పోవాల్సిందే అని చెప్పుకొచ్చారు.

మరోవైపు తిరువూరు టీడీపీ కార్యాలయంలో జరిగిన ఘటనపై పోలీసులు కేసు నమోదు చేశారు. తిరువూరు సెక్టార్ 1 ఎస్సై సతీష్ ఫిర్యాదు మేరకు టీడీపీ నేతలు 36 మంది కేసు నమోదు చేసి పోలీసులు దర్యాప్తు చేపట్టారు. టీడీపీ పార్టీ కార్యాలయంలో పోలీసుల విధులకు ఆటంకం కలిగించి.. ఎస్సై తలకు గాయాలు కావటంతో తిరువూరు సర్కిల్ సీఐ అబ్దుల్ నభీ ఆధ్వర్యంలో పూర్తి స్థాయి విచారణ చేపట్టారు. టీడీపీ కార్యాలయంలో ఉన్న సీసీ ఫుటేజ్ హార్డ్ డిస్క్‌ను స్వాధీనం చేసుకుని క్షుణ్ణంగా పరిశీలించి ఘటనకు బాధ్యులై వారిపై పోలీసులు కేసు నమోదు చేశారు.