దావూద్ ఆస్తులు వేలం.. ఓ చిన్న ప్లాట్‌కు కళ్లుచెదిరే ధర

అండర్ వరల్డ్ డాన్ దావూద్ ఇబ్రహీం ఆస్తుల వేలం శుక్రవారం ముగిసింది. మొత్తం నాలుగు ప్లాట్‌లకు గానూ రెండింటికి ఎటువంటి బిడ్‌లు దాఖలు కాలేదు. కానీ,కేవలం రూ.15,000 రిజర్వ్ ధర ఉన్న ఒకటి కళ్లు చెదిరే ధరకు అమ్ముడుపోయింది. దీనికి ఏకంగా రూ. 2 కోట్లు పలికింది. ముంబయి పేలుళ్ల సూత్రధారి, మోస్ట్ వాంటెడ్ ఉగ్రవాది పాకిస్థాన్‌లోని కరాచీలో ఆశ్రయం పొందుతున్నట్టు భావిస్తున్నారు. ఇక, దావూద్ స్థలాన్ని శివసేన నేత, న్యాయవాది అజయ్ శ్రీవాస్తవ కొనుగోలు చేశారు. సర్వే నంబరు, మొత్తం కలిపి న్యూమరాలజీలో తనకు అనుకూలంగా ఉండే అంకెతో కూడుకున్నందున అంత మొత్తం చెల్లించినట్లు ఆయన చెప్పారు. అక్కడ సనాతన పాఠశాలను నెలకొల్పాలని భావిస్తున్నట్టు తెలిపారు.

మహారాష్ట్ర రత్నగిరి జిల్లాలోని ముంబెకె దావూద్ స్వగ్రామం. అక్కడ ఉన్న నాలుగు ప్లాట్లకు వేలం నిర్వహించారు. 1970లో ముంబయికి వచ్చే వరకు అండర్ వరల్డ్ డాన్ ఇక్కడే ఉన్నాడు. ఆ తర్వాత నేర ప్రపంచంలో అడుగుపెట్టి... డాన్‌గా ఎదిగాడు. ముంబెకేలోని దావూద్‌కు సంబంధించి నాలుగు ప్లాట్లు మొత్తం 21,275 చదరపు మీటర్ల స్థలానికి ప్రారంభ ధరను రూ.19 లక్షలుగా అధికారులు నిర్ణయించారు. ఈ నాలుగూ వ్యవసాయ భూములే. కానీ, ఇందులో రెండు పెద్ద స్థలాలను కొనుగోలు చేయడానికి ఎవరూ ముందుకు రాలేదు. అయితే, 1,730 చదరపు మీటర్ల విస్తీరం గల స్థలానికి రూ.1.56 లక్షలు నిర్ణయించగా.. రూ.3.28 లక్షలకు అమ్ముడయ్యింది.

ఇక, కేవలం 170.98 చదరపు మీటర్లు ఉన్న చిన్న స్థలానికి మాత్రం భారీ ధర దక్కింది. దీని ప్రారంభ ధరను రూ.15,440గా అధికారులు నిర్ణయిస్తే.. లాయర్ రూ.2.01 కోట్లు చెల్లించడానికి ముందుకొచ్చారు. ఇదివరకు కూడా దావూద్ ఆస్తులకు ఆయన బిడ్డింగ్ వేశారు. 2001లో షాప్ కోసం బిడ్ వేయగా.. సాంకేతిక కారణాలతో ఇప్పటికీ స్వాధీన ప్రక్రియ జరగలేదు. ఇప్పుడు దావూద్ ఇంటిని తీసుకున్న అజయ్.. అందులో సంస్థాన పాఠశాల నెలకొల్పుతానని అన్నారు. వ్యవసాయ ప్లాట్‌కు ఇంత మొత్తం ఎందుకు చెల్లించారన్న ప్రశ్నకు ఆయన స్పందిస్తూ.. ‘నేను సనాతనీ హిందువును.. మేము మా పండిట్‌జీని అనుసరిస్తాం.. సర్వే నంబర్ (ప్లాట్), న్యూమరాలజీ ప్రకారం మొత్తం నాకు అనుకూలంగా ఉండే సంఖ్య. దానిని మార్చిన తర్వాత నేను ఈ ప్లాట్‌లో సనాతన్ పాఠశాలను ప్రారంభిస్తాను.. నేను 2020లో దావూద్ ఇబ్రహీం బంగ్లా కోసం వేలంలో పాల్గొన్నాను.. సనాతన్ ధర్మ పాఠశాల ట్రస్ట్ ఏర్పాటు చేశాం.. అక్కడ సనాతన పాఠశాలను కూడా ప్రారంభిస్తాను’ అని శ్రీవాస్తవ్ చెప్పారు.

కాగా, నాలుగేళ్ల కిందట కూడా దావూద్ ఇబ్రహీం ఆస్తులను వేలం వేశారు. 2020లో దావూద్ నివాసం, ఐదు ఇతర ఆస్తుల వేలం జరిగింది. లోతేలో గల మరో ప్లాట్ మాత్రం సాంకేతిక కారణాల వల్ల వేలం జరగలేదు. 2017లో కూడా దక్షిణ ముంబైలో గల మూడు ఆస్తులు (గెస్ట్ హౌస్, హోటల్, ఇల్లు) వేలం జరిగింది.