టీడీపీకి రాజీనామా చేస్తున్నా.. ఎంపీ కేశినేని నాని

విజయవాడ ఎంపీ కేశినేని నాని సంచలన నిర్ణయం తీసుకున్నారు. ఎంపీ పదవితో పాటూ టీడీపీకి రాజీనామా చేస్తానని ప్రకటించారు. ఈ మేరకు సోషల్ మీడియాలో తన నిర్ణయాన్ని ప్రకటించారు. 'అందరికి నమస్కారం.. చంద్రబాబు నాయుడు గారు తెలుగు దేశం పార్టీ కి నా అవసరం లేదు అని భావించిన తరువాత కుడా నేను పార్టీలో కొనసాగటం కరెక్ట్ కాదు అని నా భావన . కాబట్టి త్వరలోనే ఢిల్లీ వెళ్లి గౌరవ లోకసభ స్పీకర్ గారిని కలసి నా లోకసభ సభ్యత్వానికి రాజీనామా చేసి దానిని ఆమెదింప చేయించుకుని ఆ మరుక్షణం తెలుగుదేశం పార్టీకి రాజీనామా చేస్తానని అందరికీ తెలియ చేస్తున్నాను'అంటూ తన నిర్ణయాన్ని ప్రకటించారు.

విజయవాడ ఎంపీ కేశినేని నాని ఎపిసోడ్ టీడీపీలో దుమారం రేపింది. తిరువూరు సభ విషయంలో కేశినేని బ్రదర్స్ మధ్య మొదలైన వార్.. మరింత ముదిరింది. చంద్రబాబు ఆదేశాలతో తనను టీడీపీ నేతలు కలిసి.. తిరువూరు సభకు సంబంధించిన పార్టీ కార్యక్రమాలకు దూరంగా ఉండమని చెప్పారని సోషల్ మీడియా ద్వారా తెలియజేశారు. అలాగే వచ్చే ఎన్నికల్లో విజయవాడ ఎంపీ సీటు వేరొకరికి ఇవ్వబోతున్నట్లు తనకు తెలిపారని.. తనను పార్టీ విషయంలో జోక్యం చేసుకోవద్దని పార్టీ నేతలు తెలిపారన్నారు. అధినేత ఆదేశాలను తూాచా తప్పకుండా పాటిస్తానన్నారు నాని.

అధినేత ఆదేశాలను పాటిస్తానన్న నాని మళ్లీ ట్విస్ట్ ఇచ్చారు. తాను వచ్చే ఎన్నికల్లో పోటీ చేయడం ఖాయమని ప్రకటించి బాంబు పేల్చారు. ఇండిపెండెంట్‌గా అయినా సరే గెలుస్తానని.. హ్యట్రిక్ కొట్టడం ఖాయమన్నారు. త్వరలోనే ఓ నిర్ణయం తీసుకుంటానని ప్రకటించారు. ఇవాళ్టిది రేపటికి కరెక్ట్ కాకపోవచ్చన్నారు. ఫిబ్రవరిలో తన నిర్ణయం ప్రకటిస్తానని.. సరైన సమయంలో సరైన నిర్ణయం తీసుకుంటానని వెల్లడించారు. తిరువూరులో జరిగే కార్యక్రమానికి రావొద్దని చెప్పారని.. తన అనుచరులు, నాయకులతో కలిసి నిర్ణయం తీసుకుంటాననే సంకేతాలు పంపారు.

తన అభిమానులకు క్లారిటీ ఉంది.. అధినేత చెప్పింది రామభక్త హనుమాన్‌లాగా పాటిస్తాను అన్నారు. తాను ప్రోటోకాల్ ప్రకారం వైఎస్సార్‌సీపీ ఎమ్మెల్యేలతో కలిసి కార్యక్రమాల్లో పాల్గొన్నాను అన్నారు. అక్కడితో ఆగకుండా చంద్రబాబును హిట్లర్‌తో పోలుస్తూ కేశినేని నాని సెటైర్లు పేల్చారు. బాస్ (చంద్రబాబు) ఏం చెప్తే అదే కరెక్ట్ అన్నారు. జర్మనీ నాశనం అయ్యే వరకు హిట్లర్ కూడా కరెక్టే అంటూ ఎద్దేవా చేశారు. ఇలా దూకుడు పెంచిన నాని పార్టీకి కూడా గుడ్ బై చెబుతున్నట్లు ప్రకటించారు.. ఓవైపు అధినేత ఆదేశాలను పాటిస్తానని ప్రకటించిన నాని.. ఇంతలోనే టీడీపీకి రాజీనామా చేస్తానని ప్రకటించడం ఆసక్తికరంగా మారింది.