వణికిపోతున్న పాకిస్థాన్.. ఎన్నికలు వాయిదా వేయాలన్న తీర్మానానికి సెనెట్ ఆమోదం

పాకిస్థాన్‌లో మరోసారి ఎన్నికలు వాయిదా పడే సంకేతాలు కనిపిస్తున్నాయి. పాకిస్థాన్‌లో సార్వత్రిక ఎన్నికలు వాయిదా వేయాలని సెనెట్‌లో ప్రవేశపెట్టిన తీర్మానానికి సభ్యులు అంగీకారం తెలపడంతో ఆ తీర్మానం ఆమోదం పొందింది. ఇప్పటికే ఓ వైపు.. ఆర్థికంగా పాక్ అధ్వాన్న స్థితిలో ఉండగా.. మరోవైపు.. రాజకీయంగా అనిశ్చితి నెలకొంది. దీనికి తోడు పాకిస్థాన్‌లో ఇటీవల భారీగా ఉగ్రవాదులను మట్టుబెడుతున్న ఘటనలు పెరిగిపోయి భద్రతా పరమైన సమస్యలు కూడా నెలకొంటున్నాయి. ఈ క్రమంలో పాకిస్థాన్ ఎన్నికలు వాయిదా పడే అవకాశాలు ఉండటం మరింత ఆందోళన కలిగిస్తోంది. అయితే దేశంలో చలి పులి భయపెడుతున్న కారణంగానే ఎన్నికలు వాయిదా వేయాలని ఈ తీర్మానాన్ని ప్రవేశపెట్టారు.

షెడ్యూల్ ప్రకారం ఫిబ్రవరి 8 వ తేదీన పాకిస్థాన్‌లో సార్వత్రిక ఎన్నికలు జరగాల్సి ఉంది. ఇప్పటికే తొలుత ఫిబ్రవరి 11 వ తేదీన ఎన్నికలు నిర్వహించాలని భావించినా ఆ తర్వాత ఆ తేదీలో మార్పు చేసి ఫిబ్రవరి 8 వ తేదీ నిర్ణయించారు. అయితే తాజాగా పాకిస్థాన్‌లో ఎన్నికలు వాయిదా వేయాలని కోరుతూ స్వతంత్ర సెనేటర్‌ దిలావర్‌ ఖాన్‌ ఎగువసభ సెనెట్‌లో ప్రవేశపెట్టారు. అయితే ఈ తీర్మానానికి శుక్రవారం పాక్‌ సెనేట్‌ ఆమోదం తెలిపింది. పాకిస్థాన్‌లో ప్రస్తుతం నెలకొన్న శీతాకాల వాతావరణం, భద్రతాపరమైన సమస్యలు, రాజకీయ అస్థితర వంటి కారణాలతోనే ఎన్నికలను వాయిదా వేయాలని ఆ తీర్మానంలో ప్రస్తావించారు.

పాకిస్థాన్‌లోని పలు ప్రాంతాల్లో చలి గాలులు తీవ్రంగా ఇబ్బంది పెడుతున్నాయని.. దాంతో ఆయా ప్రాంతాల్లో ఉన్న ప్రజలు బయటికి వచ్చి ఓటింగ్‌లో పాల్గొనడం సాధ్యం కాకపోవచ్చని దిలావర్‌ ఖాన్‌ పేర్కొన్నారు. దీనికి తోడు ప్రస్తుతం దేశంలో శాంతి భద్రతల సమస్య ఉందని.. రాజకీయ నాయకులపై దాడులు జరుగుతున్నాయని తెలిపారు. ఈ ఘటనల్లో భద్రతా సిబ్బంది బలి అవుతున్నారని ప్రస్తావించారు. అయితే ఈ ఎన్నకల వాయిదా తీర్మానానికి మాజీ ప్రధాని నవాజ్‌ షరీఫ్ పార్టీ అయిన పాకిస్థాన్‌ ముస్లిం లీగ్‌ తీవ్రంగా వ్యతిరేకించింది. ఈ తీర్మానానికి ఆమోదం లభించిన సమయంలో సభలో కేవలం 14 మంది సభ్యులు మాత్రమే ఉన్నారని స్థానిక మీడియా కథనాలు వెల్లడించాయి. అయితే మొత్తం 100 మంది ఉండాల్సిన సభలో కేవలం 14 మంది ఉండగానే తీర్మానం ఆమోదం పొందడంతో అది రాజ్యాంగ విరుద్ధమని అధికార పార్టీ అయిన నవాజ్ షరీఫ్ పార్టీ వాదిస్తోంది. ప్రతిపక్షాలైన మాజీ ప్రధాని ఇమ్రాన్ ఖాన్‌కు చెందిన పాకిస్థాన్‌ తెహ్రీక్‌-ఏ- ఇన్సాఫ్‌ (పీటీఐ), పాకిస్థాన్‌ పీపుల్స్‌ పార్టీ (పీపీపీ)లు కూడా ఈ ఎన్నికల వాయిదాను వ్యతిరేకించాయి.

అయితే ఈ సార్వత్రిక ఎన్నికలు వాయిదా వేస్తూ సెనెట్ తీసుకున్న నిర్ణయాన్ని పాకిస్థాన్‌ ఎన్నికల సంఘం కూడా వ్యతిరేకించింది. ముందుగా నిర్ణయించిన ప్రకారమే ఫిబ్రవరి 8 వ తేదీనే పాకిస్థాన్ పార్లమెంటు ఎన్నికలు జరుగుతాయని స్పష్టం చేసింది. అయితే ఫిబ్రవరి 8 వ తేదీన ఎన్నికలు జరుపుతామనే ప్రకటనకు పాక్‌ ఎన్నికల సంఘం కట్టుబడి ఉండాలని పాక్ సుప్రీంకోర్టు ఇచ్చిన స్పష్టమైన ఆదేశాలు ఉండగా.. సెనెట్‌ ఎన్నికల వాయిదా తీర్మానాన్ని ఆమోదించింది. సుప్రీం కోర్టు ఆదేశం లేకుండా ఎన్నికల తేదీలను మార్చే ప్రసక్తి లేదని పాక్‌ ఎన్నికల సంఘం స్పష్టం చేసింది. ఈ వ్యవహారంతో పాక్‌లో రాజకీయ, ఆర్థిక అస్థిరత మరింత పెరిగే అవకాశం ఉందనే ఆందోళనలు వ్యక్తం అవుతున్నాయి. అయితే ఈ వార్తలు బయటికి రావడంతో పాకిస్థాన్‌ స్టాక్‌ ఎక్సేంజ్‌ ఒక్కసారిగా 800 పాయింట్లు కుప్ప కూలింది.