అదీ ఐఫోన్ అంటే.. 16 వేల అడుగుల ఎత్తులోని విమానం నుంచి పడినా పనిచేస్తోంది

ఐఫోన్. ఈ ఫోన్ అంటే ఇష్టపడని వారు ఉండరు. జీవితంలో ఒక్కసారైనా ఐఫోన్ కొనుగోలు చేయాలని ఎదురు చూసే వాళ్లు చాలా మంది ఉంటారు. ఎందుకంటే ఐఫోన్ వాడటం గొప్ప అని భావించడం ఒకవైపు.. దాని ఫీచర్లు మరోవైపు. ఇలా ఐఫోన్ అంటే పడి చచ్చిపోయే వారు కూడా ఉంటారు. అయితే తాజాగా ఓ ఐఫోన్.. గాల్లో ప్రయాణిస్తున్న విమానం నుంచి ప్రమాదవశాత్తు జారి కింద పడిపోయింది. 16 వేల అడుగుల ఎత్తులో ప్రయాణిస్తున్న విమానం నుంచి కింద పడినా.. ఆ ఐఫోన్‌కు ఏమీ కాలేదు సరికదా చక్కగా పనిచేస్తోంది. ఇలా విమానం నుంచి పడిపోయిన ఐఫోన్ ఓ వ్యక్తికి దొరకడంతో ఆ వ్యక్తి ఆ విషయాన్ని సోషల్ మీడియాలో పంచుకోవడంతో ఈ వార్త వైరల్ అవుతోంది. ఇంతకీ ఏం జరిగిందంటే?

సీనాథన్ బేట్స్ అనే ఓ నెటిజన్ ట్విటర్‌లో పెట్టిన ఓ పోస్టుతో ఈ విషయం వెలుగులోకి వచ్చింది. రోడ్డు పక్కన ప్రయాణిస్తుండగా తనకు ఓ ఐఫోన్ దొరికిందని తెలిపాడు. అయితే ఆ ఐఫోన్లో సగం బ్యాటరీ ఛార్జింగ్తో ఏరోప్లేన్ మోడ్లో ఉందని వెల్లడించాడు. అందులో అలస్కా ఎయిర్లైన్స్‌కు సంబంధించి బ్యాగేజ్ క్లెయిమ్ వివరాలు ఉన్నట్లు తెలిపాడు. వాటికి సంబంధించిన ఫోటోలను ట్విటర్‌లో పోస్ట్ చేశాడు. అయితే ఆ ఐఫోన్ ఇటీవల గాల్లో ప్రయాణిస్తున్న అలస్కా ఎయిర్‌లైన్స్‌కు చెందిన విమానం డోర్ ఊడిపోయిన ఘటనలో కిందపడిన ఫోన్‌గా గుర్తించారు. అయితే ఆ ఫోన్ 16 వేల అడుగుల ఎత్తులో వెళ్తున్న విమానం నుంచి పడిపోయినా.. సాధారణంగానే పనిచేస్తున్నట్లు తెలిపారు. పైగా ఆ ఐఫోన్‌కు బ్యాక్‌కేస్ ఉండటంతో ఎలాంటి డ్యామేజీ కాలేదని పేర్కొన్నారు. ఆ ఫోన్‌ను పరిశీలించిన తర్వాత దాని మోడల్ ఐఫోన్ 14 ప్రో లేదా ఐఫోన్ 15 ప్రోగా భావిస్తున్నారు.

ఈ నెల 5 వ తేదీన అమెరికాలోని పోర్ట్‌లాండ్‌ నుంచి ఒంటారియోకు బోయింగ్ 737-9 మ్యాక్స్ విమానం బయలుదేరింది. అయితే విమానం టేకాఫ్ అయిన వెంటనే దాని డోర్ ఊడికింద పడిపోవడంతో ఎమర్జెన్సీ ల్యాండింగ్ చేశారు. ఈ ఘటన 16 వేల అడుగుల ఎత్తులో జరగడంతో అందులోని ప్రయాణికులు ఒక్కసారిగా తీవ్ర భయభ్రాంతులకు గురయ్యారు. ఈ క్రమంలోనే విమానంలో ప్రయాణిస్తున్న వారి ఫోన్లు, ఇతర వస్తువులు కిందపడిపోయాయి. ఘటన సమయంలో విమానంలోని 174 మంది ప్రయాణికులు, ఆరుగురు సిబ్బంది సురక్షితంగా బయటపడటం వల్ల అంతా ఊపిరి పీల్చుకున్నారు. అయితే ఆ ఘటనకు సంబంధించిన వీడియోలు సోషల్ మీడియాల్లో తెగ వైరల్ అయ్యాయి.

దీనిపై అలస్కా ఎయిర్లైన్స్తో పాటు అమెరికా నేషనల్‌ ట్రాన్స్‌పోర్టేషన్‌ సేఫ్టీ బోర్డ్‌ - ఎన్టీఎస్బీ కూడా దర్యాప్తు ప్రారంభించింది. అయితే ఈ ఘటన జరిగిన తర్వాత విమానం నుంచి పడిన రెండో ఫోన్ దొరికిందని.. కానీ ఇప్పటివరకు ఆ విమానం డోర్ మాత్రం దొరకలేదని ఎన్టీఎస్పీ వెల్లడించింది. ఈ ఘటనతో అప్రమత్తమైన అలస్కా ఎయిర్‌లైన్స్‌.. తమ వద్ద ఉన్న బోయింగ్‌ 737-9 విమాన సర్వీసులను నిలిపివేసింది. దీంతో 65 విమానాలు ఎయిర్‌పోర్టుల్లోనే నిలిచిపోయాయి. ప్రతీ విమానాన్ని పూర్తిస్థాయిలో పరిశీలించి.. భద్రతా ప్రమాణాలపై అధ్యయనం చేసిన తర్వాతే ప్రారంభిస్తామని తెలిపారు.