4 ఏళ్ల కుమారుడిని చంపిన సీఈఓ.. పోలీసులకు పట్టించిన ట్యాక్సీ డ్రైవర్

4 ఏళ్ల కుమారుడిని అతి కిరాతకంగా తల్లి హత్య చేసిన ఘటన దేశ వ్యాప్తంగా పెను సంచలనంగా మారింది. ఓ స్టార్టప్ కంపెనీకి సీఈఓ అయిన సుచన సేథ్.. కర్ణాటక రాజధాని బెంగళూరులో నివసిస్తోంది. ఈ క్రమంలోనే ఇటీవలె తన 4 ఏళ్ల కుమారుడితో కలిసి బెంగళూరు నుంచి గోవాకు చేరుకుంది. అయితే అక్కడే హోటల్ రూమ్‌లో చిన్నారిని హత్య చేసిన సుచన సేథ్.. ఎవరికీ తెలియకుండా తప్పించుకోవాలని చూసింది. ఈ క్రమంలోనే తిరిగి బెంగళూరుకు వెళ్తుండగా.. ఆమె ప్రయాణిస్తున్న టాక్సీలోని డ్రైవర్‌తో కలిసి బెంగళూరు పోలీసులు చాకచక్యంగా పట్టుకున్నారు.

39 ఏళ్ల సుచన సేథ్ బెంగళూరులోని ఓ స్టార్టప్ కంపెనీని నిర్వహిస్తోంది. ఈ క్రమంలోనే గత శనివారం గోవాకు తన కుమారుడితో కలిసి వెళ్లింది. నార్త్ గోవాలోని బనియన్ గ్రాండ్ హోటల్‌లో రూమ్ తీసుకుంది. ఆ తర్వాత ఆ బాలుడిని హత్య చేసిన సుచన సేథ్.. గుట్టుచప్పుడు కాకుండా అక్కడి నుంచి బయట పడాలని నిర్ణయించుకుంది. దీంతో విమానంలో కాకుండా గోవా నుంచి బెంగళూరుకు కారులో వెళ్లాలని నిర్ణయించుకుంది. ఈ క్రమంలోనే టాక్సీ బుక్ చేయాలని హోటల్ సిబ్బందికి సూచించగా.. వారు ఒక కారును రప్పించారు. ఆ కారులో సుచన సేథ్ గోవా నుంచి బెంగళూరు బయల్దేరింది.

అయితే రూమ్‌లోకి వచ్చేటపుడు బాలుడితో వచ్చిన సుచన సేథ్.. తిరిగి వెళ్లేటపుడు ఒంటరిగా వెళ్లడంతో హోటల్ సిబ్బందికి అనుమానం వచ్చింది. దీంతో ఆ రూంలోకి వెళ్లి చూడగా.. రక్తపు మరకలు కనిపించాయి. వెంటనే గోవా పోలీసులకు హోటల్ సిబ్బంది ఫిర్యాదు చేశారు. దీంతో రంగంలోకి దిగిన గోవా పోలీసులు.. ఆ ట్యాక్సీ డ్రైవర్‌కు కాల్‌ చేసి సుచన సేథ్‌తో మాట్లాడారు. కుమారుడు ఎక్కడ ఉన్నాడు అని అడగ్గా.. తన ఫ్రెండ్‌ దగ్గర ఉంచినట్లుల తెలిపింది. అయితే పోలీసులు అడ్రస్ అడగ్గా.. ఫేక్ అడ్రస్ ఇచ్చింది. విచారణ జరిపిన పోలీసులు ఆ అడ్రస్ నకిలీది అని తేల్చారు. వెంటనే ఆ టాక్సీ డ్రైవర్‌కు మళ్లీ ఫోన్ చేశారు. ఈసారి సుచన సేథ్‌కు అనుమానం రాకుండా స్థానిక కొంకణీ భాషలో గోవా పోలీసులు.. టాక్సీ డ్రైవర్‌తో మాట్లాడారు. దగ్గర్లో ఉన్న పోలీస్ స్టేషన్‌కు వెళ్లాలని సూచించారు.

అయితే అప్పటికే కర్ణాటకలోకి ఎంట్రీ అయిన టాక్సీని ఆ డ్రైవర్ నేరుగా ద‌గ్గ‌ర‌లో ఉన్న చిత్ర‌దుర్గ పోలీస్ స్టేష‌న్‌కు తీసుకెళ్లాడు. అప్పటికే కర్ణాటక పోలీసులకు గోవా పోలీసులు సమాచారం అందించడంతో సుచన సేథ్‌ను చిత్రదుర్గ పోలీసులు అరెస్ట్ చేశారు. ఆమె ప్రయాణిస్తున్న కారులో తనిఖీలు చేపట్టగా.. బ్యాగులో కుక్కి ఉన్న బాలుడి మృతదేహాన్ని గుర్తించారు. అనంతరం తానే హత్య చేసినట్లు పోలీసుల విచారణలో సుచన సేథ్ అంగీకరించింది. దీంతో ఈ కేసులో మరింత విచార‌ణ కోసం ఆమెను మ‌ళ్లీ గోవాకు తరలించారు.

అయితే 4 ఏళ్ల పసి బాలుడిని హత్య చేయడానికి భార్యా భర్తల మధ్య గొడవలే కారణమని గోవా పోలీసులు చేసిన ప్రాథమిక దర్యాప్తులో తేలింది. సుచన సేథ్‌కు, ఆమె భర్త వెంకట్‌ రామన్‌కు మధ్య గత కొన్ని రోజులుగా వివాదం నడుస్తోంది. ప్రస్తుతం వారి మధ్య గొడవలు రావడంతో వారు విడిగా ఉంటుండగా.. విడాకుల కేసు కోర్టులో పిటిషన్ దాఖలు చేశారు. అయితే కుమారుడిని భర్త నుంచి దూరంగా ఉంచేందుకే గోవాకు తీసుకెళ్లి అక్కడ చంపినట్లు పోలీసులు అనుమానం వ్యక్తం చేస్తున్నారు.

అయితే సుచన సేథ్ లింక్డ్‌ఇన్‌ ప్రొఫైల్‌ ప్రకారం.. బెంగళూరుకు చెందిన ఆమె కోల్‌కతాలోని యూనివర్సిటీ నుంచి ఫిజిక్స్‌లో మాస్టర్స్‌ పూర్తి చేసింది. ఆస్ట్రోఫిజిక్స్‌తో పాటు ప్లాస్మా ఫిజిక్స్‌ చదివింది. సంస్కృతంలోనూ పీజీ పట్టా అందుకుంది. తర్వాత ఆర్టిఫిషీయల్‌ ఇంటెలిజెన్స్‌, డేటా సైంటిస్ట్‌ కోర్సులు పూర్తి చేసింది. ఈ రంగంలో ఆమెకు 12 ఏళ్ల అనుభవం కూడా ఉంది. ఈ క్రమంలోనే 2020లో మైండ్‌ఫుల్‌ ఏఐ ల్యాబ్‌ అనే స్టార్టప్‌ కంపెనీని స్థాపించి.. దానికి సీఈవోగా వ్యవహరిస్తోంది. కాగా 100 బ్రిలియంట్ వుమెన్ ఇన్ ఏఐ ఎథిక్స్ ఫ‌ర్ 2021లో సుచ‌న సేథ్ అగ్రస్థానంలో ఉండటం గమనార్హం.