30 ఏళ్లుగా మౌన వ్రతం.. అయోధ్య ప్రారంభోత్సవంతో తీరనున్న 85 ఏళ్ల బామ్మ కల

అయోధ్యలో రామ మందిర నిర్మాణం జరగాలని దశాబ్దాలుగా పోరాటం జరిగింది. అయోధ్యలో రాముడి గుడి కడితే చూడాలని ఎంతో మంది ఎదురు చూసి కన్నుమూశారు. మరికొందరు యాగాలు, వ్రతాలు, నోములు.. ఇలా ఎవరికి తోచినట్లు వారు అయోధ్యలో రాముడు కొలువుదీరాలని ఎదురుచూశారు. ఇక అయోధ్యలో రామ మందిర నిర్మాణం కోసం పోరాటం చేసిన వారు ఇప్పటికీ బతికి ఉన్నారు. అయితే ఓ 85 ఏళ్ల వృద్ధురాలు.. అయోధ్యలో రాముడి గుడి నిర్మాణం జరగాలని మౌన వ్రతం చేస్తోంది. 30 ఏళ్లుగా ఎవరితో మాట్లాడకుండా ఉంటోంది. అయోధ్యలో రామ మందిర నిర్మాణం జరుగుతుండటం.. ఈ నెల 22 వ తేదీన ప్రారంభోత్సవం చేసుకోనున్న నేపథ్యంలో ఆ బామ్మ నోరు తెరవనుంది. తన మౌన వ్రతాన్ని వీడనుంది.

జార్ఖండ్‌లోని ధన్‌బాద్‌ జిల్లాలోని కరమ్‌తాండ్‌లో ఉంటున్న 85 ఏళ్ల సరస్వతి అగర్వాల్ కథ ఇది. అయోధ్యలో రామ మందిరం నిర్మించే వరకు తాను ఎవరితోనూ మాట్లాడబోనని 30 సంవత్సరాల క్రితం శపథం చేసిన సరస్వతి మౌన వ్రతం చేపట్టింది. ఈ క్రమంలోనే జనవరి 22 వ తేదీన అయోధ్యలో రామ మందిర ప్రతిష్ఠాపన జరగనున్న వేళ ఆమె అయోధ్యకు చేరుకోనుంది. విగ్రహ ప్రతిష్ఠాపన పూర్తయిన తర్వాత 'రామ్, సీతారాం' అంటూ సరస్వతి అగర్వాల్ తన 30 ఏళ్ల మౌన దీక్షను విరమించనుంది.

శ్రీరాముడి పట్ల 3 దశాబ్దాలుగా అమితమైన భక్తిని చూపిస్తున్న సరస్వతి అగర్వాల్ తన జీవితాన్ని రామ స్మరణకే అంకితం చేసినట్లు పేర్కొంది. ఇక అయోధ్యలో రామ మందిరం నిర్మితం కావడంతో ఇక నుంచి అయోధ్యలోనే ఉండాలని నిర్ణయించుకున్నట్లు చెప్పింది. అయోధ్యలో రామాలయ నిర్మాణం పూర్తి కావడంతో తన జీవితం ధన్యమైందని తెలిపింది. ప్రాణ ప్రతిష్టలో పాల్గొనేందుకు బాల రాముడు తనను ఆహ్వానించాడని.. 30 ఏళ్లుగా తాను చేస్తున్న తపస్సు విజయవంతమైందని సంతోషం వ్యక్తం చేసింది. 30 ఏళ్ల తర్వాత నా మౌనం వీడనుందని.. ఇక అయోధ్యలోని మహంత్ నృత్య గోపాల్ దాస్ ఆశ్రమానికి వెళ్లి అక్కడే ఉండాలనుకుంటున్నట్లు తెలిపింది. అయితే ప్రస్తుతం ఆమె ఇంకా మౌన దీక్ష విరమించకపోవడంతో తన భావాలన్నింటినీ రాసి మీడియాకు అందజేసింది.

ఇక రామ భక్తురాలు అయిన సరస్వతి అగర్వాల్‌కు కూడా అయోధ్యలో జరిగే ప్రాణ ప్రతిష్ఠ కార్యక్రమంలో పాల్గొనేందుకు శ్రీరామ జన్మభూమి తీర్థ క్షేత్ర ట్రస్ట్ నుంచి ఆహ్వానం అందింది. 1992 మేలో అయోధ్యకు వెళ్లిన సరస్వతి అగర్వాల్.. రామజన్మభూమి ట్రస్ట్ అధినేత మహంత్ నృత్య గోపాల్ దాస్‌ను కలిశారు. తర్వాత కమ్తానాథ్ పర్వత ప్రదక్షిణ చేసిన తర్వాత చిత్రకూట్‌లో ఏడున్నర నెలల పాటు కల్పవాసంలో ఉండిపోయారు. రోజూ 14 కిలోమీటర్ల కమ్తానాథ్ పర్వత ప్రదక్షిణ చేశారు. ఇక 1992 డిసెంబర్ 6 వ తేదీన ఆమె తిరిగి నృత్య గోపాల్ దాస్‌ను కలిసి.. ఆ తర్వాత మౌన వ్రతం ప్రారంభించారు. అయోధ్యలో రామాలయ నిర్మాణం పూర్తయ్యాకే మౌన వ్రతం వీడాలని నిశ్చయించుకున్నారు.

సరస్వతీ అగర్వాల్ దేవ్‌కీనందన్ అగర్వాల్‌ను పెళ్లి చేసుకున్నారు. వారిద్దరూ 65 ఏళ్ల పాటు సంసార జీవితాన్ని గడిపారు. అయితే సరస్వతీ అగర్వాల్ ఎప్పుడూ పాఠశాలకు వెళ్లకపోయినా.. ఆమె భర్త చదవడం నేర్పించారు. దీంతో ఆమె రామ్ చరిత్ మానస్‌తో పాటు ఇతర గ్రంథాలను చదువుతారు. రోజుకు ఒకసారి సాత్విక ఆహారం తీసుకుంటారు. ఆమె భర్త 35 ఏళ్ల క్రితం మృతి చెందగా.. వారికి ముగ్గురు సంతానం. అయితే అయోధ్య రాముడి కోసం సరస్వతి అగర్వాల్ మౌన దీక్ష చేపట్టినప్పుడు వారంతా ఆమెకు సహకరించారు.