ప్లాస్టిక్ బాటిళ్లలో నీళ్లు తాగుతున్నారా తస్మాత్ జాగ్రత్త.. లీటర్ బాటిల్‌లో 2.4 లక్షల ప్లాస్టిక్ కణాలు

ప్లాస్టిక్ వాటర్ బాటిల్‌లలో ఉండే ప్లాస్టిక్ కణాల గురించి తాజాగా నిర్వహించిన అధ్యయనం సంచలన విషయాలను వెలుగులోకి తీసుకువచ్చింది. సాధారణంగా ఒక లీటర్ వాటర్ బాటిల్‌లో సగటున 240000 ప్లాస్టిక్ కణాలు ఉంటాయని కొత్త అధ్యయనం వెల్లడించింది. సూక్ష్యంగా పరీక్షించి చేసిన ఈ అధ్యయనం నేషనల్ అకాడమీ ఆఫ్ సైన్సెస్ జర్నల్ ప్రొసీడింగ్స్‌లో సోమవారం ప్రచురితమైంది. అయితే ప్లాస్టిక్ బాటిల్‌లో ఉండే పొడవులో 1 మైక్రో మీటర్ కంటే తక్కువ.. మానవ వెంట్రుకలో 70 వ వంతు వెడల్పు ఉండే నానో ప్లాస్టిక్ కణాలను పరీక్షించారు. గత అధ్యయనాల్లో అంచనా వేసిన ప్లాస్టిక్ కణాల కంటే వంద రెట్లు ఎక్కువ ప్లాస్టిక్ కణాలు ఆ బాటిల్ నీటిలో ఉన్నట్లు ఈ అధ్యయనంలో గుర్తించారు. 1 నుంచి 5 వేల మైక్రో మీటర్ల మధ్య మైక్రోప్లాస్టిక్‌ కణాల వరకు మాత్రమే అధ్యయనం చేశారు. కానీ ప్రస్తుతం తొలిసారి అంతకన్నా సూక్ష్మంగా ఈ అధ్యయనాన్ని నిర్వహించారు.

మైక్రో ప్లాస్టిక్ కణాల కంటే నానో ప్లాస్టిక్ కణాలు మానవ ఆరోగ్యానికి మరింత ఎక్కువ హాని కలిగిస్తాయని ఈ అధ్యయనం తెలిపింది. ఎందుకంటే నానో ప్లాస్టిక్ కణాలు శరీరంలోని మానవ కణాల లోపలికి చొచ్చుకెళ్లి అవయవాలపై ప్రభావం చూపిస్తాయని పేర్కొంది. ఈ

నానోప్లాస్టిక్‌ కణాలు కడుపులో ఉండే శిశువుల శరీరాల్లోకి కూడా చొచ్చుకుపోతాయని పరిశోధకులు గుర్తించారు. చాలా కాలం నుంచి ప్లాస్టిక్ వాటర్ బాటిల్‌లో ఉండే నానో ప్లాస్టిక్ కణాల ఉనికి గురించి అనుమానం వ్యక్తం చేస్తున్నా.. వాటిని గుర్తించే సాంకేతికత లేదు. ఈ నేపథ్యంలోనే నానో ప్లాస్టిక్ కణాల ఉనికిని గుర్తించేందుకు ఈ అధ్యయనంలో శాస్త్రవేత్తలు సరికొత్త టెక్నిక్‌ను ఉపయోగించారు. అమెరికాలోనే 3 బాగా ఫేమస్ అయిన కంపెనీలకు చెందిన 1 లీటర్ వాటర్ బాటిళ్లను 25 తీసుకున్నారు. అయితే అందులో ఒక్కొక్క బాటిల్‌లో 1.1 లక్షల నుంచి 3.7 లక్షల సూక్ష్మ ప్లాస్టిక్ కణాలను గుర్తించినట్లు తెలిపారు. అందులో 90 శాతం నానోప్లాస్టిక్ కణాలు ఉన్నట్లు వెల్లడించారు.

తాజాగా నిర్వహించిన ఈ అధ్యయనం నానోప్లాస్టిక్‌లను విశ్లేషించడంలో ఉన్న సమస్యలను పరిష్కరించేందుకు ఉపయోగపడుతుందని.. దీంతో నానో ప్లాస్టిక్ కణాలను తొలగించేందుకు సహాయపడుతుందని ఈ అధ్యయనం ప్రధాన రచయిత, కొలంబియా యూనివర్సిటీ కెమిస్ట్రీ గ్రాడ్యుయేట్ విద్యార్థి నైక్సిన్ కియాన్ తెలిపారు. అయితే గతంలో ఇలాంటి అధ్యయనం జరగలేదని.. కేవలం నానో ప్లాస్టిక్ కణాలు ఉంటాయని మాత్రమే ఊహించినట్లు మరో శాస్త్రవేత్త బీజాన్ యాన్ పేర్కొన్నారు. కానీ తాజా అధ్యయనం మనం ఇంతకు ముందు తెలియని విషయాలను తెలుపుతుందని చెప్పారు. ముఖ్యంగా 7 సాధారణ ప్లాస్టిక్ రకాలను గుర్తించేందుకు శాస్త్రవేత్తలు ఈ అధ్యయనాన్ని చేపట్టారు. ఇందులో ప్లాస్టిక్ బాటిల్‌లు తయారయ్యే పాలిథిలిన్ టెరెఫ్తాలేట్.. తరచు నీటిని ఫ్యూరిఫై చేసేందుకు ఫిల్టర్లలో వాడే పాలిమైడ్‌తోపాటు నీటిలో చాలా గుర్తించబడని నానోపార్టికల్స్‌ను కూడా కనుక్కున్నారు. ఇక ప్రపంచ వ్యాప్తంగా ప్రతీ సంవత్సరం 450 మిలియన్ టన్నుల కంటే ఎక్కువ ప్లాస్టిక్‌ను ఉత్పత్తి చేస్తోంది. అయితే ప్లాస్టిక్‌లో ఎక్కువ భాగం సహజంగా క్షీణించదు. ఏళ్లు గడిచే కొద్ది చిన్న చిన్న ముక్కలుగా విడిపోతుంది.

అయితే ఈ భూమి మీద ఎన్నో ప్లాస్టిక్ వస్తువుల కారణంగా ప్లాస్టిక్ కాలుష్యం ఉన్నప్పటికీ.. మానవ శరీరంలోకి వెళ్లే వాటర్ బాటిల్‌లోని ప్లాస్టిక్ కణాలపైనే శాస్త్రవేత్తలు ప్రత్యేక శ్రద్ధ పెట్టి అధ్యయనాలు చేస్తున్నారు. 2022లో ప్రచురించబడిన ఒక అధ్యయనం ప్రకారం సాధారణ పంపు నీటిలో కంటే బాటిల్ వాటర్‌లోనే మైక్రోప్లాస్టిక్‌లు ఎక్కువగా ఉన్నాయని వెల్లడించింది. ఇక 2021 లో వచ్చిన ఒక అధ్యయనం.. ప్లాస్టిక్ బాటిల్ మూత తీసి పెట్టడం వల్ల ఆ నీటిలోకి ప్లాస్టిక్ కణాలు విడుదల అవుతున్నాయని చెప్పింది. అయితే ప్రస్తుతం అధ్యయనం చేసిన శాస్త్రవేత్తల పరిశోధనలు కేవలం వాటర్ బాటిల్‌ నీటితోనే ముగియదని చెప్పారు. సాధారణ పంపు నీటిలో నానోప్లాస్టిక్‌లను గుర్తిస్తామని పేర్కొన్నారు. దీంతోపాటు పశ్చిమ అంటార్కిటికా నుంచి సేకరించిన మంచు నమూనాల్లో కూడా ప్లాస్టిక్ కణాలను పరిశోధించాలని భావిస్తున్నారు.