కాంగ్రెస్ గూటికి మరో వైసీపీ ఎమ్మెల్యే,,,,రఘువీరాను కలిసిన రామచంద్రారెడ్డి

అనంతపురం జిల్లా రాయదుర్గం ఎమ్మెల్యే, ప్రభుత్వ విప్‌ కాపు రామచంద్రారెడ్డి వైఎస్సార్‌సీపీకి గుడ్ బై చెప్పడం ఖాయమైపోయింది. అధిష్ఠానం టికెట్‌ నిరాకరించటంతో.. ఆయన ఏకంగా సీఎం క్యాంపు కార్యాలయం దగ్గర అసంతృప్తిని వ్యక్తం చేశారు. అయితే కాపు రామచంద్రారెడ్డి అనూహ్యంగా కాంగ్రెస్‌వైపు అడుగులు వేస్తున్నారు. సీడబ్ల్యూసీ సభ్యుడు ఎన్‌.రఘువీరారెడ్డిని మడకశిర మండలం నీలకంఠాపురంలోని ఆయన నివాసంలో రామచంద్రారెడ్డి, ఆయన సతీమణి భారతి, కోడలు అలేఖ్య కలిశారు.

అనంతరం గ్రామంలోని నీలకంఠాపురం దేవాలయాలను కాపు రామచంద్రారెడ్డి కుటుంబ సమేతంగా దర్శించుకున్నారు. వచ్చే ఎన్నికల్లో కళ్యాణదుర్గం నియోజకవర్గం నుంచి ఎన్నికలకు పోటీ చేస్తానని కాపు రామచంద్రారెడ్డి అంటున్నారు. తన కుటుంబంలో మరొకరు రాయదుర్గం నుంచి బరిలోకి దిగుతారని చెబుతున్నారు. ఈ భేటీ రాజకీయ ప్రాధాన్యం సంతరించుకుంది. రెండుగంటలకుపైగా వారు సుదీర్ఘంగా చర్చించారు. రామచంద్రారెడ్డి, ఆయన కుమారుడు ప్రవీణ్‌ రాయదుర్గం, కళ్యాణదుర్గం కాంగ్రెస్‌ టికెట్లు కోరుతున్నారని సమాచారం. బుధవారం ఏపీ కాంగ్రెస్‌ ఇంఛార్జ్, ఏఐసీసీ సభ్యుడు మాణికం ఠాగూర్‌తో చర్చించి కాంగ్రెస్‌లో చేరేందుకు ముహూర్తం ఖరారు చేస్తారనే ప్రచారం జరుగుతోంది. రామచంద్రారెడ్డి కాంగ్రెస్‌ వైపు ఆసక్తి చూపుతున్నారని రఘువీరారెడ్డి అంటున్నారు.

తనకు సీటు ఇవ్వకపోవడంపై ఏపీ సీఎం క్యాంపు కార్యాలయం దగ్గరే రామచంద్రారెడ్డి ఆవేదన వ్యక్తం చేశారు, ‘మీకు గుడ్‌ బై’ అంటూ సీఎం క్యాంపు కార్యాలయానికి సెల్యూట్ చేశారు. జగన్ని నమ్ముకుని వచ్చినందుకు తమ జీవితాలు నాశనం అయ్యాయని అన్నారు. వైఎస్ జగన్‌ను నమ్మి ఆ కుటుంబం వెంట నడిచామని.. ఇప్పుడు తమకు అన్యాయం చేశారన్నారు.