లోక్‌సభ ఎన్నికల వేళ కాంగ్రెస్‌ షాకింగ్ నిర్ణయం.. ప్రచారానికి దూరంగా సునీల్ కనుగోలు

కర్ణాటక, తెలంగాణల్లో కాంగ్రెస్ పార్టీ విజయంలో కీలక పాత్ర పోషించిన వ్యూహకర్త సునీల్ కనుగోలును వచ్చే సార్వత్రిక ఎన్నికలకు మాత్రం దూరంగా ఉంచాలని నిర్ణయించింది. గతంలో కాంగ్రెస్ ‘టాస్క్ ఫోర్స్ 2024’లో భాగంగా ఆయన ఇప్పుడు హరియాణా, మహారాష్ట్ర అసెంబ్లీ ఎన్నికల ప్రచారాలపై దృష్టి సారిస్తారని ఆపార్టీ వర్గాలు తెలిపాయి. రెండేళ్ల కిందట కాంగ్రెస్ ప్రశాంత్ కిషోర్‌తో చర్చలు విఫలమైన తర్వాత ఆ పార్టీ సార్వత్రిక ఎన్నికల వ్యూహం నుంచి వైదొలగిన రెండో వ్యక్తి సునీల్ కనుగోలు.

గతేడాది కర్ణాటక, అసెంబ్లీ ఎన్నికల్లో బీజేపీ, బీఆర్ఎస్‌లను కాంగ్రెస్ ఓడించి, అధికారం చేపట్టడంతో ఈ రెండు రాష్ట్రాల్లో లోక్‌సభ స్థానాలపై ఆ పార్టీ గురిపెట్టింది. ఏది ఏమైనప్పటికీ జాతీయ ఎన్నికల్లో పార్టీకి మార్గనిర్దేశం చేసేందుకు కాంగ్రెస్ కీలక వ్యూహకర్త అందుబాటులో ఉండరనే వార్త ఒకింత ఆశ్చర్యానికి గురిచేస్తోంది. ప్రధాన కార్యదర్శి హోదాలో ఉన్న ఒక సీనియర్ నేత మాట్లాడుతూ.. లోక్‌సభ ప్రచారానికి ఆయన దూరంగా ఉండటం కొద్దిగా ఎదురుదెబ్బ అని అంగీకరించారు. కానీ, ఆయన సూచనలను ఉపయోగించగలిగితే దీర్ఘకాలిక ప్రయోజనం ఉంటుందని కాంగ్రెస్ నమ్ముతుందని చెప్పారు.

కర్ణాటక సీఎం సిద్ధరామయ్య ప్రాథమిక సలహాదారుగా ఉన్న కనుగోలు.. తెలంగాణలోని కాంగ్రెస్ కలిసి పని చేయడం కూడా కొనసాగిస్తారని విశ్వసనీయ వర్గాలు వెల్లడించాయి. గతేడాది రాజస్థాన్, మధ్యప్రదేశ్ ఎన్నికల్లో సునీల్ కనుగోలు సూచనలు, సలహాలకు ప్రాధాన్యత ఇవ్వకపోవడంతో ఆ రెండు రాష్ట్రాల్లో పార్టీ ఘోర పరాజయాన్ని మూటగట్టుకుంది. ఆ రాష్ట్రాల్లోని నాయకులు కమల్ నాథ్ లేదా అశోక్ గెహ్లాట్ ఆయన డిమాండ్లను అంగీకరించలేదు. కర్ణాటక, తెలంగాణలో విజయాలకు కారణం ప్రతి అంశంలో సునీల్‌ స్వేచ్ఛగా పనిచేశారని పార్టీ వర్గాలు పేర్కొన్నాయి.

కాంగ్రెస్ లోక్‌సభ ఎన్నికల ప్రచారం చాలా సంక్లిష్టమైంది. ప్రత్యేకించి ప్రతిపక్ష ఇండియా కూటమిలో భాగంగా మిత్రులతో సీట్ల సర్దుబాటు వంటి కొన్ని ఇబ్బందులు ఉన్నాయి. ఈ నేపథ్యంలో కనుగోలు వ్యూహాలు ఆ పార్టీకి ఎంతగానో సహకరిస్తాయి. ముఖ్యంగా ఇండియాలో మిత్రపక్షమైన డీఎంకేతో 2019 సార్వత్రిక ఎన్నికల్లో కలిసి పనిచేసిన అనుభవం ఉంది. అలాగే, 2014లో బీజేపీ ప్రచార వ్యూహంలోనూ ఉన్నారు.