సామాన్యురాలిని ప్రేమ పెళ్లి చేసుకున్న బ్రూనై యువరాజు

నిజ జీవితంలో అతడొక యువరాజు. శతాబ్దాల నాటి సంప్రదాయిక ఇస్లామిక్ సుల్తానేట్ రాకుమారుడు. అదే సమయంలో సోషల్ మీడియాలోనూ చాలా పాపులర్. ఇన్‌స్టాగ్రామ్‌లో హాలివుడ్ హీరో తరహాలో అతడికి అభిమానులు, ఫ్యాన్ ఫాలోయింగ్ ఉంది. రాజవంశపు రాకుమారుడిగా కాకుండా.. అతను ఫైటర్ జెట్‌లలో ఎగురుతూ, స్పీడ్ బోట్లను నడుపుతూ, వర్కౌట్స్ తర్వాత తన ఛాతీతో పోజులిస్తూ సోషల్ మీడియాలో వైరల్ అవుతుంటాడు. ఆసియాలోనే మోస్ట్ ఎలిజబుల్ బ్యాచిలర్. లక్షలాది మంది అమ్మాయిలకు కలల రాకుమారుడిగా మారిన అతడు రాజకుటుంబ సంప్రదాయాలకు భిన్నంగా ఓ సామాన్యురాలిని ప్రేమ పెళ్లి చేసుకున్నాడు. అతడే బ్రూనై యువరాజు ‘అబ్దుల్ మతీన్’.

యువరాజు అబ్దుల్ మతీన్ వయస్సు 32. అతడు మనసు పడిన చెలి ‘యాంగ్ మాలియా అనిషా రోస్నా’ వయసు 29 ఏళ్లు. సుల్తాన్‌ ముఖ్య సలహాదారుల్లో ఒకరి మనవరాలు అనిషా. యువరాజుకు తగినట్టే ఆమె కూడా మోస్ట్ టాలెంటెడ్. ఆమెకు కూడా ఫ్యాషన్ బ్రాండ్ ఉంది. ఒక పర్యాటక సంస్థకు సహ యజమాని కూడా. పైగా మంచి అందగత్తె. ఒక్క మాటలో చెప్పాలంటే యువరాజుకు తగిన జోడీ.

ఈ పెళ్లి వేడుకలతో చమురు సంపన్న దేశం బ్రూనైలో ఒకింత పండగ వాతావరణం నెలకొంది. మతీన్, అనీషా పెళ్లి 10 రోజుల పాటు అత్యంత వైభవంగా జరిగింది. వివాహ రిసెప్షన్, ప్రి వెడ్డింగ్ షూట్‌కు సంబంధించిన ఫోటోలు వైరల్ అవుతున్నాయి.

బ్రూనై రాజధాని బందర్‌ సెరీ బెగవాన్‌లోని ఓ బంగారు గుమ్మటపు మసీదు అనిషా, మతీన్ పెళ్లికి వేదికైంది. ఈ మసీదుకు ప్రపంచంలోనే ప్రత్యేక గుర్తింపు ఉంది. పెళ్లి తంతు, వేడుకలు జరిగిన హాల్, షాండిలియర్లు.. రాజకుటుంబపు దర్జాను ప్రస్ఫుటం చేస్తున్నాయి. మగవారికి మాత్రమే ప్రవేశానికి అనుమతి ఉన్న ఈ పెళ్లి వేడుక రాజకుటుంబం, అత్యంత సన్నిహితుల సమక్షంలో ఘనంగా జరిగింది. అతిథుల కోసం పసందైన వంటలతో విందు ఏర్పాటు చేశారు.

బ్రూనై రాజు అసన్‌ అల్‌ బోల్కియా.. ప్రపంచంలోనే అత్యధిక కాలం అధికారంలో కొనసాగుతోన్న చక్రవర్తి. ఒకప్పుడు ప్రపంచంలోనే సంపన్న వ్యక్తిగా పేరు పొందారు. సుల్తాన్ అసన్ అల్ బోల్కియాకు 10 మంది సంతానం. వీరిలో ఆరుగురు కుమార్తెలు, నలుగురు కుమారులు. నలుగురు కుమారుల్లో చివరివాడే మతీన్. మతీన్ లుక్స్‌లో రాజవంశం దర్జా కంటే హాలీవుడ్‌ స్టైలే ఎక్కువగా కనిపిస్తుంది. ఆయన యుద్ధ విమానాలు, స్పీడ్‌ బోట్స్‌ను నడుపుతారు. వర్కౌట్స్‌ తర్వాత తన ఫిట్‌బాడీ కనిపించేలా పోజులిస్తుంటారు. తండ్రితో కలిసి అధికారిక విదేశీ పర్యటనల్లోనూ ఎక్కువగా కనిపిస్తారు. ఆ సమయంలో వెస్టర్న్‌ సూట్స్‌లో కనిపిస్తుంటారు. మతీన్ పోలో క్రీడాకారుడు కూడా.

ఈ కొత్త జంట నిశ్చితార్థం తర్వాత షేర్ చేసిన ఫొటోలను చూసి అందరూ ఆశ్చర్యపోయారు. అందుకు కారణం ఉంది. బ్రూనై పూర్తిగా ఇస్లాం రాజ్యం. యువరాజు, ఆయన మనువాడిన యువతి ధరించిన మోడర్న్ దుస్తులు అందర్నీ ఆశ్చర్యానికి గురిచేశాయి. సోషల్ మీడియాలో షేర్ చేసిన మతీన్ - అనిషా పెళ్లి ఫోటోలు వైరల్‌గా మారాయి. అతడు ‘జేమ్స్ బాండ్ 007’ అంటూ యువరాజుకు అభిమాని అయిన ఓ యువతి కామెంట్ చేసింది. యువరాజు మతీన్ చాలా దయగలవాడు, డౌన్ టు ఎర్త్ అని ఆమె తెలిపింది. యువరాజుతో కలిసి తీసుకున్న ఫోటోను షేర్ చేసింది.