షాపింగ్‌మాల్‌లో చీరల దొంగతనం,,,తెలివిగా పట్టుకున్న ఏపీ డిప్యూటీ సీఎం కూతురు

ఇటీవల కాలంలో చీరల దొంగల ముఠాలు తమ చేతివాటం ప్రదర్శిస్తున్నాయి. బృందంగా ఏర్పడిన మహిళలు పెద్ద పెద్ద షాపింగ్ మాల్స్‌లో దొంగతనాలకు పాల్పడుతున్నారు. ఖరీదైన చీరలను క్షణాల్లో మాయం చేస్తున్నారు. తాజాగా.. విజయవాడలో ఓ దొంగల ముఠా చీరల చోరీకి పాల్పడగా.. ఏపీ డిప్యూటీ సీఎం నారాయణ స్వామి కూతురు కృపాలక్ష్మి చాలా తెలివిగా వారిని పట్టుకున్నారు. పోలీసులు తెలిపిన వివరాల ప్రకారం.. విజయవాడ బందరు రోడ్డులోని గోలి హ్యాండ్లూమ్స్‌లో షాపింగ్ చేసేందుకు డిప్యూటీ సీఎం నారాయణస్వామి కూతురు కృపాలక్ష్మి వెళ్లారు. ఆమె చీరలు చూస్తుండగా.. కొందరు మహిళలు కూడా షాపింగ్‌కు వచ్చారు. చాలా హడావుడి చేస్తూ ఖరీదైన చీరలు చూపించాలని సేల్స్‌మెన్స్ కోరుతూ తమ చేతివాటం ప్రదర్శించారు. షాప్ సిబ్బంది కళ్లుగప్పి ఖరీదైన చీరలు దొంగతనం చేసేందుకు ప్రయత్నించారు. ఇలా ఐదు చీరలను గుట్టు చప్పుడు కాకుండా దాచేశారు.

అయితే షాప్ సిబ్బంది గమనించకపోయినా..అక్కడే షాపింగ్ చేస్తున్న డిప్యూటీ సీఎం నారాయణ స్వామి కూతురు కృపాలక్ష్మి మాత్రం చీరల దొంగతనాన్ని గమనించారు. వెంటనే ఆమె దొంగల ముఠాను అడ్డకునేందుకు సిద్దమయ్యారు. చీరలతో షాప్ బయటకు వచ్చేసిన మహిళలను అడ్డుకోగా.. అందరూ పరారయ్యారు. కానీ ఓ మహిళను మాత్రం కృపాలక్ష్మి పట్టుకున్నారు. అప్పటికే చీరల దొంగతనాన్ని సీసీ కెమెరా ద్వారా గుర్తించిన షాప్ యజమాని సిబ్బందిని అలర్ట్ చేసారు. వారు బయటకు వెళ్ళిచూడగా.. డిప్యూటీ సీఎం కూతురు ఓ మహిళను అడ్డుకోవడం గమనించారు. ఆ మహిళా దొంగను షాప్‌లోకి తీసుకెళ్లి పోలీసులకు సమాచారం అందించారు. సదరు చీరల దొంగను అదుపులోకి తీసుకున్న పోలీసులు ఈ గ్యాంగ్ వివరాలను సేకరించారు. ఈ సమాచారంతో మిగతా మహిళలను కూడా పోలీసులు పట్టుకున్నారు. ఇలా మొత్తం ఐదుగురు చీరల దొంగలను పట్టుకుని పోలీస్ స్టేషన్‌కు తరలించారు. తెలివిగా మహిళా దొంగలను అడ్డుకుని తనకు నష్టం జరగకుండా చూసిన డిప్యూటీ సీఎం కూతురు కృపాలక్ష్మికి షాప్ యజమాని కృతజ్ఞతలు తెలిపారు.