ఏపీ పీసీసీ చీఫ్ రాజీనామా.. వైఎస్ షర్మిలకు లైన్ క్లియర్

ఆంధ్రప్రదేశ్ కాంగ్రెస్ పార్టీ అధ్యక్ష పదవి నుంచి తప్పుకున్నారు గిడుగు రుద్రరాజు. సోమవారం రోజు ఆయన ఏపీపీసీసీ చీఫ్ పోస్టుకు రాజీనామా చేశారు. అఖిల భారత కాంగ్రెస్ కమిటీ (AICC) చీఫ్ మల్లికార్జున ఖర్గేకు ఆయన రాజీనామా లేఖను పంపించారు. కొద్దిరోజుల కిందట కాంగ్రెస్ పార్టీలో చేరిన వైఎస్ షర్మిలకు.. పీసీసీ చీఫ్‌గా బాధ్యతలు చేపట్టేందుకు మార్గం సుగమం అయినట్లయింది. మరికొద్దిరోజుల్లోనే షర్మిలను ఆ పదవిలో నియమించే యోచనలో కాంగ్రెస్ పార్టీ ఉన్నట్లు తెలుస్తోంది. పీసీసీ చీఫ్ పదవిపై షర్మిలకు ఇప్పటికే ఖర్గే స్పష్టత ఇచ్చినట్లు తెలుస్తోంది. ఈ నేపథ్యంలో హైకమాండ్ ఆదేశాల మేరకే రుద్రరాజు తప్పుకున్నారని సమాచారం.

తెలంగాణ కేంద్రంగా.. వైఎస్ఆర్ తెలంగాణ పేరిట గతంలో కొత్త పార్టీ పెట్టిన షర్మిల .. అసెంబ్లీ ఎన్నికల వేళ పోటీ చేయడం లేదని ప్రకటించి తప్పుకున్నారు. కాంగ్రెస్ పార్టీకి మద్దతు కూడా ప్రకటించారు. ఎన్నికలకు ముందు కాంగ్రెస్ పార్టీ పెద్దల్ని కలిసిన షర్మిల.. పార్టీ విలీనంపైనా చర్చలు జరిపినట్లు తెలిసింది. తర్వాత ఇటీవల ఢిల్లీకి వెళ్లిన షర్మిల .. ఖర్గే, రాహుల్ గాంధీ సమక్షంలో కాంగ్రెస్ పార్టీలో చేరడం ప్రాధాన్యం సంతరించుకుంది. వైఎస్ఆర్ తెలంగాణ పార్టీని .. కాంగ్రెస్ పార్టీలో విలీనం చేస్తున్నట్లు కూడా ప్రకటించారు.

అయితే కాంగ్రెస్‌లో చేరినప్పటికీ.. షర్మిలకు ఇప్పటివరకు ఎలాంటి బాధ్యతలు అప్పగించలేదు అధిష్టానం. ఇదివరకు తెలంగాణ రాజకీయాల్లో షర్మిల తనకంటూ ప్రత్యేక మార్క్ సృష్టించుకున్నారు. ఇప్పుడు ఏపీ రాజకీయాల్లో కూడా క్రియాశీలకంగా మారే అవకాశాలు ఉన్నాయి. కాంగ్రెస్ పార్టీ రాష్ట్ర బాధ్యతలు అప్పగిస్తారని తెలుస్తోంది. ఈ క్రమంలోనే గిడుగు రుద్రరాజు తప్పుకోగా.. త్వరలోనే షర్మిల ఆ బాధ్యతలు చేపట్టడమే తరువాయి.

ప్రస్తుతం వైఎస్ షర్మిల.. తన కుమారుడి పెళ్లి పనుల్లో తీరిక లేకుండా ఉన్నారు. పలువురు ప్రముఖులకు స్వయంగా వెళ్లి ఆహ్వాన పత్రికల్ని అందిస్తున్నారు. టీడీపీ అధినేత చంద్రబాబు నాయుడుకు కూడా షర్మిల ఇన్విటేషన్ ఇవ్వడం విశేషం. అంతకుముందు ఏపీ ముఖ్యమంత్రి వైఎస్ జగన్మోహన్ రెడ్డి ఇంటికి కూడా వెళ్లి కార్డు ఇచ్చినట్లు తెలిసింది.