విజయవాడ మీదుగా వెళ్లే పలు రైళ్లు రద్దు

డబ్లింగ్, ట్రాక్ పునరుద్దరణ, భద్రత పనుల నేపథ్యంలో విజయవాడ డివిజన్ పరిధిలో పలు రైళ్లను దక్షిణ మధ్య రైల్వే రద్దుచేసింది. ట్రాక్‌ల భద్రతా పనులు కొనసాగుతున్నందున దాదాపు నెల రోజుల పాటు పలు రైళ్లను రద్దు చేసినట్లు సీనియర్ డివిజనల్ మేనేజర్ ఏకే త్రిపాఠి వెల్లడించారు. అలాగే, మరికొన్ని రైళ్లను దారి మళ్లించినట్లు ఆయన తెలిపారు. రెగ్యులర్ మార్గం నిడదవోలు- ఏలూరు-విజయవాడ మీదుగా నడిచే రైళ్లు.. నిడదవోలు-భీమవరం టౌన్-గుడివాడ-విజయవాడ మీదుగా నడపనున్నట్టు ఆయన చెప్పారు. జనవరి 29 నుంచి ఫిబ్రవరి 26 వరకూ పలు రైళ్లు రద్దు, దారి మళ్లించినట్టు పేర్కొన్నారు. ఈ విషయాన్ని ప్రయాణికులు గమనించాలని, దీనికి అనుగుణంగా ప్రయాణాలను ప్లాన్ చేసుకోవాలని సూచించారు.

జనవరి 29 నుంచి ఫిబ్రవరి 26 వరకూ మచిలీపట్నం ఎక్స్‌ప్రెస్, జనవరి 20 నుంచి ఫిబ్రవరి 26 వరూ గుంటూరు-విశాఖపట్నం సింహాద్రి ఎక్స్‌ప్రెస్, కాకినాడ-విశాఖపట్నం మధ్య నడిచే రైలు ఈ నెల 29 నుంచి ఫిబ్రవరి 26 వరకు రద్దు చేశారు. విజయవాడ-విశాఖ మధ్య నడిచే ఉదయ్ ఎక్స్‌ప్రెస్ రైలు జనవరి 19, 20, 22, 23, 24, 26, 27 తేదీల్లో రద్దయ్యింది. అలాగే, జనవరి 29 నుంచి ఫిబ్రవరి 26 వరకూ గుంటూరు-రాయగడ ఎక్స్ ప్రెస్ రైలును రద్దుచేసినట్టు వెల్లడించారు.

ఎర్నాకులం-పాట్నా సూపర్ ఫాస్ట్ ఎక్స్‌ప్రెస్, బెంగళూరు-గువహతి సూపర్ ఫాస్ట్ ఎక్స్‌ప్రెస్, ముంబయి-భువనేశ్వర్ కోణార్క్ ఎక్స్‌ప్రెస్‌లను దారి మళ్లించారు. జనవరి 29 నుంచి ఫిబ్రవరి 25 వరకూ ధన్‌బాద్- అలెప్పీ బోకారో ఎక్స్‌ప్రెస్, ఫిబ్రవరి 25 వరకూ టాటా-యశ్వంత్ పూర్ ఎక్స్‌ప్రెస్, జైసిడ్హ్-తాంబరం ఎక్స్‌ప్రెస్, హటియా-ఎర్నాకులం, హటియా-బెంగళూరు, టాటానగర్-బెంగళూరు వీక్లీ ఎక్స్‌ప్రెస్ రైళ్లను దారి మళ్లించారు. వీటని ఏలూరు స్టాప్ రద్దుచేసినట్టు తెలిపారు. నిడదవోలు- ఏలూరు- విజయవాడ మీదుగా నడిచే ఈ రైళ్లు.. నెల రోజుల పాటు నిడదవోలు-భీమవరం- గుడివాడ మీదుగా ప్రయాణించనున్నాయి.