500 ఏళ్ల తర్వాత నెరవేరిన శపథం.. తలపాగాలు ధరించిన సూర్యవంశి ఠాకూర్‌ వంశీయులు

అయోధ్యలో దివ్య రామ మందిరం ప్రారంభోత్సవానికి ఘడియలు సమీపిస్తున్నాయి. దీంతో ఎన్నో ఏళ్ల నుంచి ఎదురు చూస్తున్న వారి కల నెరవేరబోతోంది. ఇక ప్రస్తుతం బతికి ఉన్న వారే కాకుండా వారి తండ్రులు, తాతలు కూడా అయోధ్యలో రామ మందిర నిర్మాణం కోసం కలలు కన్నారు. అయితే కొందరైతే వారి వంశ పారంపర్యంగా అయోధ్యలో రామ మందిరం ఏర్పాటు కోసం వేచి చూస్తున్నారు. ఈ క్రమంలోనే ఇప్పుడు అయోధ్యలో భవ్య రామ మందిర నిర్మాణం పూర్తి చేసుకుని.. ప్రాణ ప్రతిష్ఠకు సిద్ధం అవుతోంది. ఈ క్రమంలోనే గతంలో తాము చేసిన శపథాలు, కన్న కలలు నెరవేరుతుండటంతో వారి ఆనందానికి హద్దులు లేకుండా పోతున్నాయి. ఈ క్రమంలోనే 5 శతాబ్దాలుగా తలపాగాలు ధరించని ఓ వంశం.. ఇప్పుడు మళ్లీ వాటిని తలపై పెట్టుకున్నారు.

ఉత్తర్‌ప్రదేశ్‌లోని అయోధ్య పరిధిలో ఉన్న సరైరాశి గ్రామానికి చెందిన సూర్యవంశి ఠాకూర్‌ వంశస్థులు తాజాగా తలపాగాలు ధరించారు. అందులో వింత ఏముంది అనుకుంటున్నారా. వారి పూర్వీకులు 500 ఏళ్ల క్రితం అయోధ్యలో రామ మందిరం కూల్చివేత సమయంలో చేసిన ప్రతిజ్ఞ ఇప్పుడు నెరవేరింది. రామ మందిరాన్ని కూల్చి అక్కడ బాబ్రీ మసీదు కట్టడాన్ని నిరసిస్తూ.. తమ తలపాగాలను తీసేశారు. అయోధ్యలో రామ మందిరాన్ని కూల్చిన చోట మళ్లీ ఆలయాన్ని కట్టినప్పుడే తిరిగి తలపాగాలు ధరిస్తామని శపథం చేశారు. అయితే తాము శ్రీరాముడికి సంబంధించిన వంశంగా సూర్యవంశి ఠాకూర్‌లు చెప్పుకుంటారు.

ఇక 2019 లో అయోధ్య వివాదంపై సుప్రీంకోర్టు తీర్పుతో రామ మందిర నిర్మాణానికి లైన్ క్లియర్ కావడంతో వారు సంతోషం వ్యక్తం చేశారు. అయితే ఆ తర్వాత రామ మందిర నిర్మాణం చేపట్టి ప్రస్తుతం పూర్తి కావస్తున్న నేపథ్యంలో తమ కల నెరవేరిందని వారి ఆనందానికి అవధులు లేకుండా పోయాయి. ఈ క్రమంలోనే ఈ నెల 22 వ తేదీన అయోధ్య రామ మందిర ప్రారంభోత్సవం జరగనున్న నేపథ్యంలో మళ్లీ తమ తలపాగాలను ధరించారు. అయితే ప్రారంభోత్సవం కంటే ముందే తలపాగాలు ధరించాలని నిర్ణయించుకున్నట్లు సూర్యవంశి ఠాకూర్‌లు వెల్లడించారు.