ప్రపంచంలోనే ధనిక ఫ్యామిలీ.. 700 కార్లు, రూ.4 వేల కోట్ల ఇల్లు, 8 విమానాలు

దుబాయ్‌కి చెందిన అల్ న‌హ్‌య‌న్ రాజ కుటుంబం ప్ర‌పంచంలోనే ధ‌నిక కుటుంబం. దుబాయ్ అంటే చెప్పుకోవాల్సింది ఆయిల్ నిల్వలే. ఇక ఈ అల్ నహ్‌యన్ కుటుంబానికి ప్రపంచంలో ఉన్న మొత్తం ఇంధన నిల్వల్లో 6 శాతం వారి వద్దే ఉన్నాయి. ఇక ఆ కుటుంబానికి పెద్ద యూఏఈ అధ్య‌క్షుడు షేక్ మ‌హ్మ‌ద్ బిన్ జాయెద్ ఉన్నారు. ఈ మ‌హ్మ‌ద్ బిన్ జాయెద్‌ను ఎంబీజెడ్ అని కూడా పిలుస్తారు. ఇక వీరికి ఉన్న ఆస్తులు లెక్కించాలంటే కష్టమే. వ్యాపారాలు, ఆస్తులు, షేర్లు.. ఇలా చెప్పుకుంటూ పోతే చాలా పెద్ద లిస్టే ఉంది.

 ఇక ఆ మహ్మద్ బిన్ జాయెద్ కుటుంబం అబుదాబిలో ఉన్న కాస‌ర్ అల్ వ‌త‌న్ ప్రెసిడెన్షియ‌ల్ ప్యాలెస్‌లో నివ‌సిస్తోంది. వారి వ‌ద్ద ఉన్న అత్యంత పెద్ద భ‌వంతి అదే కావడం విశేషం. సుమారు 94 ఎక‌రాల విస్తీర్ణంలో నిర్మించిన ఆ భవంతి ఖరీదు రూ.4078 కోట్లు. అతిపెద్ద డోమ్ ఉన్న ఆ ఇంట్లో సుమారు 3.5 ల‌క్ష‌ల క్రిస్ట‌ల్స్‌తో చేసిన చాండ్లియ‌ర్ ఉంది. ఇక ఆ కుటుంబం వద్ద 700 ఖరీదైన కార్లు ఉన్నాయి. అందులో 5 బుగాటి వేరియంట్లు, లాంబోర్గిని రివెంట‌న్‌, మెర్సిడీజ్ బెంజ్ సీఎల్‌కే జీటీఆర్, ఫెరారి 599ఎక్స్ఎక్స్, మెక్‌లారెన్ ఎంసీ12 లాంటి అత్యంత లగ్జరీ కార్లు వారి వద్ద ఉన్నాయి. వీటితోపాటు 8 ప్రైవేటు విమానాలు కూడా ఉన్నాయి.

ఇక ఆ కుటుంబానికి దేశ, విదేశాల్లో ఆస్తులు ఉన్నాయి. ప్రపంచంలోనే అత్యంత ఖ‌రీదైన ఫుట్‌బాల్ క్ల‌బ్‌ అయిన మాంచెస్టర్ ఫుట్‌బాల్ క్లబ్‌లో వాటా కూడా ఉంది. మాంచెస్ట‌ర్ సిటీ ఫుట్‌బాల్ జ‌ట్టులో రూ.2122 కోట్ల‌ వాటా ఈ కుటుంబానికి ఉంది. ప్ర‌పంచంలో ఉన్న ఇంధ‌న నిల్వ‌ల్లో 6 శాతం ఆయిల్ రిజ‌ర్వ్స్.. మహ్మద్ బిన్ జాయెద్ కుటుంబానికి ఉన్నాయి. వీటితోపాటు ఎన్నో ఫేమ‌స్ కంపెనీల్లోనూ ఆ కుటుంబానికి షేర్ ఉంది. పాప్ సింగ‌ర్ రిహ‌న్నా బ్యూటీ బ్రాండ్ ఫెంటీ, ఎల‌న్ మ‌స్క్‌కు చెందిన స్పేస్ ఎక్స్‌లోనూ అల్ నహ్‌య‌న్ కుటుంబానికి వాటాలు ఉన్న‌ాయి.

ఇక ఆ కుటుంబం కూడా చాలా పెద్దదే. యూఏఈ అధ్య‌క్షుడు షేక్ మ‌హ‌్మద్ బిన్ జాయెద్‌కు 18 మంది సోద‌రులు, 11 మంది సోదరీమణులు ఉన్నారు. ఎమిరేట్స్‌కు చెందిన ఆ రాచ కుటుంబ పెద్ద‌కు 9 మంది పిల్ల‌లు, 18 మంది మ‌న‌వళ్లు, మ‌న‌వరాళ్లు ఉన్నారు. దుబాయ్ రాజ కుటుంబీకులకు పారిస్, లండ‌న్‌లలో ఆస్తులు ఉన్నాయి. లండ‌న్ భూస్వామి అన్న నిక్‌నేమ్ కూడా ఆ కుటుంబానికి ఉంది. బ్రిటీష్ రాజ కుటుంబం వ‌ద్ద ఉన్నంత ఆస్తి.. దుబాయ్ రాజ కుటుంబం వ‌ద్ద ఉన్న‌ట్లు తెలుస్తోంది.