భర్త జీతం వివరాలను తెలుసుకునే హక్కు భార్యకు ఉంది.. మద్రాసు హైకోర్టు

భర్త వేతనం వివరాలను తెలుసుకునే హక్కు భార్యకు ఉందని మద్రాసు హైకోర్టు సంచలన తీర్పు వెలువరించింది. విడాకులు తీసుకున్నప్పుడు భరణం కోసం తన భర్త జీతం వివరాలను తెలుసుకోవాల్సిన హక్కు ఉంటుందని స్పష్టం చేసింది. జీతం వివరాలను భార్యకు చెప్పాలని ఓ వ్యక్తిని రాష్ట్ర సమాచార కమిషన్ ఆదేశించింది. దీంతో ఈ ఉత్తర్వులను అతడు మద్రాసు హైకోర్టులో సవాల్ చేశాడు. ఈ పిటిషన్‌ను విచారించిన మద్రాస్‌ హైకోర్టు న్యాయమూర్తి జస్టిస్ జీఆర్ స్వామినాథన్.. ఎస్‌ఐసీ ఇచ్చిన ఆదేశాలను సమర్థించారు. భర్త వేతనం వివరాలను తెలుసుకునే హక్కు భార్యకు ఉందని తేల్చిచెప్పారు.

కేసు వివరాల్లోకి వెళ్తే.. మనస్పర్ధలు కారణంగా దంపతులు విడిపోవాలని నిర్ణయించుకున్నారు. విడాకులకు సిద్ధమైన భార్య.. తన భర్త జీతభత్యాలపై ఆరా తీయడం మొదలు పెట్టింది. ఇందుకు సమాచార హక్కు చట్టాన్ని ఆశ్రయించింది. దీనిపై సదరు భర్త అభ్యంతరం వ్యక్తం చేయడంతో వేతన వివరాలను అందజేయడానికి అతడు పని చేస్తున్న సంస్థ నిరాకరించింది. దీంతో ఆమె రాష్ట్ర సమాచార కమిషన్‌కు వెళ్లారు. కేసును పరిశీలించిన ఎస్ఐసీ.. భర్త జీతం వివరాలు ఇవ్వాలని ఆ సంస్థకు ఆదేశించారు. ఈ ఉత్తర్వులను సవాల్ చేస్తూ 2020లో ఆ వ్యక్తి మద్రాసు హైకోర్టులో పిటిషన్ దాఖలు చేశారు. తాజాగా, ఈ కేసు విచారణ పూర్తికావడంతో న్యాయస్థానం తీర్పును వెలువరించింది. ఎస్‌ఐసీ ఉత్తర్వుల రద్దుకు నిరాకరించిన జస్టిస్ స్వామినాథన్.. భార్య వాదనలతో ఏకీభవించారు. పిటిషనర్ల మధ్య వైవాహిక సమస్యలు ఉన్నందున భార్యకు చెల్లించాల్సిన భరణం మొత్తాన్ని పిటిషనర్ ఆదాయం నిర్ణయిస్తుందని జస్టిస్ స్వామినాథన్ తన ఉత్తర్వుల్లో పేర్కొన్నారు. ఈ విషయంలో తన భార్య థర్డ్‌ పార్టీ అని భర్త చేసిన వాదనలను తోసిపుచ్చారు.

తన భర్త వేతనం గురించి పూర్తి సమాచారం తెలియకపోతే ఆ మహిళ సరైన విధంగా భరణం కోరడం జరగదని అన్నారు. భర్త జీతం గురించి తెలుసుకునే హక్కు భార్యకు ఉందని ఈ సందర్భంగా మధ్యప్రదేశ్ హైకోర్టు 2018లో సునీత జైన్- పవన్ కుమార్ జైన్ విడాకుల కేసులో ఇచ్చిన తీర్పును జస్టిస్ స్వామినాథన్ ఉదహరించారు. భర్త అభ్యర్థనను తిరస్కరించిన న్యాయమూర్తి.. ఎస్ఐసీ ఉత్తర్వులను సమర్థించారు.