అసైన్డ్‌ భూములకూ అదే ధర.. రెవెన్యూశాఖ కీలక ఉత్తర్వులు

పేదలు సాగు చేసుకోవటానికి ప్రభుత్వం గతంలో భూములు పంపిణీ చేసిన సంగతి తెలిసిందే. ఈ భూములను ప్రభుత్వ అసైన్డ్ భూములు అంటారు. వీటిని వారు సాగు చేసుకోవటానికి తప్ప.. ఇతరులకు క్రయ విక్రయాలు చేయటానికి నిబంధనలు ఒప్పుకోవు. అయితే ఇలా ఇచ్చిన భూములను కొన్నిసార్లు ప్రభుత్వాలు ప్రజాప్రయోజనాల కోసం తిరిగి ప్రజల నుంచి వెనక్కి తీసుకుంటాయి. ఈ నేపథ్యంలో పేదలకు పంపిణీ చేసిన ఎసైన్డ్‌ భూముల్ని... ప్రజా ప్రయోజనాల కోసం కానీ భూ సేకరణ నిమిత్తం కానీ వెనక్కు తీసుకునే ఇచ్చే పరిహారంపై ఏపీ రెవెన్యూ శాఖ కీలక ఉత్తర్వులు వెలువరించింది.

ఇలా భూములు తీసుకునేది ఉంటే..మార్కెట్‌ విలువ ప్రకారమే నష్టపరిహారం చెల్లిస్తామని రాష్ట్ర ప్రభుత్వం వెల్లడించింది. ఈ మేరకు ఏపీ అసైన్‌మెంట్‌ చట్టం-1977లో పలు సవరణలు చేస్తూ రెవెన్యూ శాఖ ప్రత్యేక ప్రధాన కార్యదర్శి అజయ్‌జైన్‌ శనివారం నోటిఫికేషన్‌ను జారీ చేశారు. అసైన్డ్‌ భూములు కలిగిన వారికి ఇతర భూముల యజమానులతో సమానంగానే మార్కెట్‌ విలువల్ని అనుసరించి చెల్లింపులు జరుగుతాయన్నారు. ఈ విషయంలో సంప్రదింపులకు అవకాశం లేదని చెప్పారు. భూసేకరణ చట్టం-2013 ప్రకారం.. భూముల్ని సేకరించినప్పుడు ప్రభుత్వం నిర్దేశించిన మార్కెట్‌ విలువ కంటే యజమానులు ఎక్కువ డిమాండ్‌ చేసిన సందర్భాల్లో జిల్లా కలెక్టర్‌ సంప్రదింపులు జరుపుతారన్నారు. ఇరువర్గాల వారికి ఆమోదయోగ్యమైన ధరను ప్రకటిస్తారని ఉత్తర్వుల్లో పేర్కొన్నారు. అయితే అసైన్డ్‌ భూముల విషయంలో ఇలాంటి అవకాశం లేదని ప్రభుత్వం స్పష్టం చేసింది. రాష్ట్ర ప్రభుత్వం పంపిణీ చేసిన సాగు భూములపై 20 ఏళ్లు, ఇంటి స్థలాలపై పదేళ్ల అనంతరం యాజమాన్య హక్కులు లభించే వారి జాబితాల్ని ఎమ్మార్వో ప్రకటిస్తారని చెప్పారు.

ఏమైనా అభ్యంతరాలు ఉంటే వాటిని స్వీకరించాక తుది జాబితాల్ని ప్రభుత్వం నిర్దేశించిన ఫాం-6, ఫాం-7 ద్వారా జిల్లా కలెక్టర్‌కు నివేదిస్తారని అన్నారు. కలెక్టర్ ఆమోదంతో సంబంధిత భూముల్ని జిల్లా రిజిస్ట్రార్‌ నిషిద్ధ జాబితా (22ఏ) నుంచి తప్పిస్తారని చెప్పారు. ఆ భూములు ఎవరి ఆధీనంలో ఉన్నాయి ? పట్టాదారులే భూముల్ని కలిగి ఉన్నారా ? వారసులు ఉన్నారా ? రెవెన్యూ రికార్డుల్లో ఎవరెవరి పేర్లు ఉన్నాయో... పరిశీలించాక అర్హుల జాబితాను ఎమ్మార్వో తయారు చేస్తారని రెవెన్యూ శాఖ ప్రత్యేక ప్రధాన కార్యదర్శి అజయ్‌జైన్‌ వెల్లడించారు.