ధరణి కన్నా ల్యాండ్ టైటిల్ చట్టం 10 రెట్లు ప్రమాదకరం: సత్యకుమార్

తెలంగాణ భూముల రిజిస్ట్రేషన్ కోసం గతంలో అధికారంలో ఉన్న కేసీఆర్ ప్రభుత్వం ధరణి పోర్టల్‌ను తీసుకువచ్చింది. అయితే ధరణి పోర్టల్‌పై మొదటి నుంచి తీవ్ర విమర్శలు చేస్తున్న కాంగ్రెస్ పార్టీ.. ఆ ధరణి పోర్టల్ పారదర్శకంగా లేదని ఆరోపించింది. తాము అధికారంలోకి వస్తే ధరణి పోర్టల్ స్థానంలో భూమాత పోర్టల్ తీసుకువస్తామని ఎన్నికల వేళ హామీ ఇచ్చింది. అయితే తెలంగాణలో భూముల రిజిస్ట్రేషన్ కంటే ఏపీలో రిజిస్ట్రేషన్ విధానం చాలా బాగుందని ఇటీవల తెలంగాణ మంత్రి పొన్నం ప్రభాకర్ తెలిపారు. కానీ బీజేపీ ఏపీ నేత సత్యకుమార్ మాత్రం దీనికి భిన్నమైన వాదన చేశారు. ధరణి కన్నా ఏపీలో ఉన్న ల్యాండ్ టైటిల్ చట్టం 10 రెట్లు ప్రమాదకరమైందని ఆయన ఆరోపించారు.

ఆంధ్రప్రదేశ్ ప్రభుత్వం తీసుకొచ్చిన ల్యాండ్ టైటిల్ యాక్ట్ ధరణి కన్నా పది రెట్లు ప్రమాదకరమని బీజేపీ నేత సత్య కుమార్ సంచలన వ్యాఖ్యలు చేశారు. ల్యాండ్ టైటిల్ యాక్ట్‌తో కుంభకోణాలు జరుగుతాయని తీవ్ర ఆందోళన వ్యక్తం చేశారు. ప్రజలు తమ ఆస్తులను ల్యాండ్ టైటిల్ యాక్ట్‌లో నమోదు చేసుకోవాల్సి ఉంటుందని.. ఒకవేళ అందులో నమోదు చేసుకోకుంటే 22 ఏలోని వివాదాస్పద భూముల జాబితాలోకి భూములు చేర్చే అవకాశం ఉందని పేర్కొన్నారు. తర్వాత ప్రజలు తమ ఆస్తులను రక్షించుకునేందుకు కోర్టులో అప్పీల్ చేసుకునే అవకాశం కూడా లేకుండా పోతుందని తెలిపారు.

శనివారం హైదరాబాద్‌లో మీడియాతో మాట్లాడిన బీజేపీ జాతీయ నేత సత్యకుమార్.. వచ్చే అసెంబ్లీ ఎన్నికల్లో ఏపీలో వైసీపీకి ఓటమి తప్పదని ఆ పార్టీకి కూడా అర్థమైందని తెలిపారు. అందుకే జగన్ సర్కార్ ఇలాంటి తుగ్లక్ చర్యలకు పాల్పడుతోందని మండిపడ్డారు. ఈ సందర్భంగా దక్షిణ భారతదేశంలో బీజేపీ రోజురోజుకూ బలపడుతోందని సత్యకుమార్ ధీమా వ్యక్తం చేశారు. ఈ సారి ఎన్నికల్లో బీజేపీకి లోక్‌సభ సీట్లు భారీగా పెరుగుతాయని ఆయన ఆశాభావం వ్యక్తం చేశారు. ముఖ్యంగా తెలంగాణ, ఆంధ్రప్రదేశ్‌లో బీజేపీకి సానుకూల పవనాలు వీస్తున్నాయని పేర్కొన్నారు. అయోధ్య రామ మందిర ప్రాణ ప్రతిష్ఠలో ప్రతి హిందువు భాగస్వామ్యం అయ్యారని సత్యకుమార్ వివరించారు. మరికొన్ని గంటల్లో రామజన్మభూమిలో రామ్ లల్లా ప్రాణ ప్రతిష్ఠ జరగనుందని తెలిపారు.