టీడీపీలో నుంచి వైసీపీలోకి ఫిరాయించిన ఎమ్మెల్యేలు,,,జనవరి 29 తేదీన విచారించనున్న అసెంబ్లీ స్పీకర్

అధికార, ప్రతిపక్ష తిరుగుబాటు ఎమ్మెల్యేల అనర్హత విషయంలో స్పీకర్ తమ్మినేని కీలక నిర్ణయం తీసుకున్నారు. వైఎస్ఆర్సీపీ, టీడీపీలకు చెందిన రెబల్ ఎమ్మెల్యేలు విచారణకు హాజరుకావాలని స్పీకర్ శుక్రవారం నాడు నోటీసులు జారీచేశారు. సోమవారం (జనవరి 29న) స్పీకర్ కార్యాలయంలో వీరి అనర్హత పిటిషన్లపై విచారించనున్నారు. ఈ నేపథ్యంలో రెబల్స్‌కు సభాపతి నోటీసులు పంపారు. సోమవారం ఉదయం వైఎస్ఆర్సీపీ, మధ్యాహ్నం టీడీపీ రెబెల్ ఎమ్మెల్యేలను స్పీకర్ విచారించినున్నారని ఈ మేరకు స్పీకర్ కార్యాలయ అధికారులు నోటీసులు జారీ చేశారు.

స్వయంగా వచ్చి వివరణ ఇవ్వాలని రెబెల్ ఎమ్మెల్యేలకు స్పీకర్ కార్యాలయం ఆదేశించింది. కాగా, వివరణ ఇవ్వడానికి తమకు 30 రోజుల గడువు కావాలని స్పీకరుకు వైసీపీ రెబెల్స్ ఎమ్మెల్యేలు ఇప్పటికే లేఖ రాశారు. పార్టీ మారిన నలుగురు ఎమ్మెల్యేలను అనర్హులుగా ప్రకటించాలని టీడీపీ పార్టీ విప్‌ డోలా బాలవీరాంజనేయస్వామి పిటిషన్‌ వేశారు. తమ పార్టీ నిర్ణయం మేరకే ఆ ఎమ్మెల్యేలపై అనర్హత పిటిషన్‌ ఇచ్చామని, వారిపై చర్యలు తీసుకోవాలని చంద్రబాబు తన అభిప్రాయాన్ని ఇప్పటికే స్పీకర్‌కు తెలియజేశారు.

కొద్ది రోజుల క్రితం చంద్రబాబుకు నోటీసు పంపిన స్పీకర్ కార్యాలయం.. విప్ ఇచ్చిన ఫిర్యాదుపై టీడీపీ అధ్యక్షుడిగా తన వైఖరి తెలపాలని స్పీకర్‌ కోరారు. ఈ నోటీసుకు చంద్రబాబు గురువారం సమాధానం ఇచ్చారు పార్టీ నిర్ణయం మేరకే అనర్హత పిటిషన్‌ ఇచ్చామని, ఆ మేరకు మీరు చర్యలు తీసుకోవాలన్నారు. దీంతో రం ఎమ్మెల్యేలు వల్లభనేని వంశీ, మద్దాలి గిరి, కరణం బలరాం, వాసుపల్లి గణేశ్‌లకు ఏపీ అసెంబ్లీ కార్యదర్శి శుక్రవారం నోటీసులు పంపారు.

ఇక, రాష్ట్రంలో మూడు రాజ్యసభ సీట్లు ఖాళీ కావడంతో వాటిని భర్తీ చేయడానికి ఎన్నికల సంఘం నోటిఫికేషన్ వెలువరించింది. ఖాళీ అయిన రాజ్యసభ సీట్లలో రెండు అధికార పార్టీ దక్కించుకునేందుకు పూర్తి సంఖ్యాబలం ఉంది. మరో స్థానం టీడీపీ పరం కాకుండా పావులు కదుపుతూ మూడేళ్ల కిందట విశాఖ స్టీల్ ప్లాంట్ ఉద్యమం కోసం రాజీనామా చేసిన టీడీపీ ఎమ్మెల్యే గంటా శ్రీనివాసరావుకు షాకిచ్చింది. ఆయన రాజీనామాను స్పీకర్ రెండు రోజుల కిందట ఆమోదించారు. దీనిపై ఆయన హైకోర్టు ఆశ్రయించనున్నారు. మూడేళ్ల తర్వాత ఇలాంటి నిర్ణయం తీసుకోవడం ఏంటి? అని ఆయన మండిపడ్డారు. ఇదంతా రాజ్యసభ ఎన్నికల కోసమేనని ఆరోపించారు.