హిమాచల్‌ ప్రదేశ్‌లో భారీ హిమపాతం.. అటల్ టన్నెల్ వద్ద 300 మందిని రక్షించిన పోలీసులు

భారీ హిమపాతం కారణంగా హిమాచల్ ప్రదేశ్‌లో పర్యాటకులు తీవ్ర ఇబ్బందులను ఎదుర్కొంటున్నారు. రోహ్‌తంగ్‌లోని అటల్ టన్నెల్ సౌత్ పోర్టల్ (ఎస్‌పి) సమీపంలో భారీ మంచు కారణంగా చిక్కుకుపోయిన దాదాపు 300 మంది పర్యాటకులను పోలీసులు రక్షించారు. ఏటీఆర్ సౌత్ పోర్టల్ (SP) సమీపంలో మంగళవారం దాదాపు 50 వాహనాలు, ఒక హిమాచల్ రోడ్ ట్రాన్స్‌పోర్ట్ కార్పొరేషన్ (HRTC) బస్సు చిక్కుకుపోయాయి. వీటిలో దాదాపు 300 మంది పర్యాటకులు ఉన్నారని, ఈ క్రమంలో ATR నుంచి వాళ్లను ఖాళీ చేయించినట్టు కులు ఎస్పీ సాక్షి వర్మ తెలిపారు. రెస్క్యూ ఆపరేషన్‌లో తనతో పాటు మనాలీ ఎస్డీఎం, తహసీల్దార్, స్టేషన్ హౌస్ ఆఫీసర్ సహా ఇతర అధికారులు పాల్గొన్నట్టు చెప్పారు.

అంతకుముందు, జనవరి 30 నుంచి ఫిబ్రవరి 3 వరకూ హిమాచల్ ప్రదేశ్‌లోని ఎత్తైన ప్రాంతాలలో భారీ హిమపాతం, వర్షాలు కురుస్తాయని వాతావరణ శాఖ హెచ్చరికలు చేసింది. ఫలితంగా, లాహౌల్-స్పితి, కిన్నౌర్, చంబా, కులు, మండీ, సిర్మూర్, సిమ్లా జిల్లాల్లోని ఎత్తైన ప్రాంతాలు, సిమ్లా, పరిసర ప్రాంతాలలో భారీ హిమపాతం, వర్షాలు కురిసే అవకాశం ఉందని ఒక ప్రకటనలో తెలిపింది. రాష్ట్రంలోని దిగువ కొండలు, మైదానాల్లోనూ ఉరుములు, మెరుపులతో వర్షాలు పడే ఛాన్స్ ఉందని, ఎత్తైన పర్వతాల్లోని పలు ప్రాంతాల్లో ఈ కాలంలో ఈదురు గాలులను రావచ్చని అంచనా వేసింది.

‘జనవరి 30 రాత్రి నుంచి రాబోయే ఐదు లేదా ఆరు రోజుల్లో హిమాచల్ ప్రదేశ్‌లోని ఎత్తైన ప్రాంతాలలో వర్షం, కురిసే అవకాశం ఉంది. మంగళవారం రాత్రి నుంచి వర్షం మొదలవుతుంది... జనవరి 31, ఫిబ్రవరి 1 తేదీల్లో చంబా, లాహౌల్-స్పితి, కిన్నౌర్, కులు జిల్లాల్లో మోస్తరు నుంచి భారీ మంచు కురిసే అవకాశం ఉంది.. ఈ ప్రాంతాలకు ఆరెంజ్ అలర్ట్ జారీ చేశాం.. కాంగ్రా, బిలాస్‌పూర్, సిమ్లా జిల్లాల్లో ఉరుములు మెరుపులతో కూడిన వర్షం పడే అవకాశాలు ఉన్నాయి’ అని ఐఎండీ సీనియర్ శాస్త్రవేత్త సందీప్ కుమార్ శర్మ ఓ ప్రకటనలో తెలిపారు.