కుదువపెట్టిన బంగారంతో వడ్డాణం.. కస్టమర్ అడిగితే ఇంటికి రమ్మని దిమ్మతిరిగే ప్రపోజల్ ఇచ్చిన బ్యాంకు మేనేజర్

కుదువపెట్టిన బంగారంతో వడ్డాణం.. కస్టమర్ అడిగితే ఇంటికి రమ్మని దిమ్మతిరిగే ప్రపోజల్ ఇచ్చిన బ్యాంకు మేనేజర్

కస్టమర్ బ్యాంకులో ఉంచిన బంగారాన్ని కాజేసి వడ్డాణం చేయించుకుందో బ్యాంకు మేనేజర్. రుణం తీర్చేసి బంగారం కోసం వచ్చిన కస్టమర్‌కు ఊహించని సమాధానం చెప్పి షాక్‌కు గురిచేసింది. ఈ ఘటన కృష్ణాజిల్లా పెనమలూరు నియోజకవర్గం గంగూరులో చోటుచేసుకుంది. అసలు సంగతిలోకి వస్తే.. గంగూరులోని యూనియన్ బ్యాంకు బ్రాంచులో దావులూరి ప్రభావతి మేనేజర్‌గా పనిచేస్తున్నారు. ఆమె సొంతూరు నూజివీడు మండలం మర్రిబంధం. అయితే అదే మర్రిబంధం గ్రామానికి చెందిన యోగేశ్వరరావు అనే వ్యక్తికి హైదరాబాద్‌లో ఉన్న యూనియన్ బ్యాంకులో అకౌంట్ ఉంది. ఈ అకౌంట్‌ను గంగూరుశాఖకు ట్రాన్స్ ఫర్ చేయించారు.

అయితే తన వద్దనున్న 380 గ్రాముల బంగారాన్ని దాచుకునేందుకు గంగూరు బ్యాంకులో లాకర్ అడిగాడు యోగేశ్వరరావు. అయితే లాకరులో బంగారం దాయటం కంటే తనఖా పెట్టి రుణం తీసుకోవటం మంచిదని ప్రభావతి యోగేశ్వరరావుకు సలహా ఇచ్చారు. బ్యాంకు మేనేజర్ ప్రభావతి సలహాతో తనవద్ద ఉన్న బంగారాన్ని తాకట్టుపెట్టి రెండు లక్షలు రుణం తీసుకున్నాడు యోగేశ్వరరావు. అలా తీసుకున్న రుణాన్ని కూడా గతేడాది నవంబర్‌లో చెల్లించేశాడు. అయితే బ్యాంకు రుణం తీర్చేసిన నేపథ్యంలో తనఖాపెట్టిన తన బంగారాన్ని తిరిగి ఇవ్వాల్సిందిగా యోగేశ్వరరావు, బ్యాంకు మేనేజర్ అయిన ప్రభావతిని కోరాడు. అయితే బంగారం తన గంగూరులోని ఇంటివద్ద ఉందన్న మేనేజర్ ప్రభావతి.. ఇంటివద్దకు వచ్చి తీసుకోవాల్సిందిగా కస్టమర్‌ను సూచించింది. మేనేజర్ మాట ప్రకారం తన ఇంటికి వెళ్లిన యోగేశ్వరరావుకు అక్కడ షాక్ తగిలింది. బంగారు నగలగురించి ప్రశ్నిస్తే.. తనను పెళ్లిచేసుకోవాలంటూ కోరింది బ్యాంకు మేనేజర్ ప్రభావతి. దీంతో మనోడు షాక్ తిన్నాడు. తనకు తన బంగారు నగలు కావాల్సిందేనంటూ తేల్చేశాడు. అయితే బంగారు నగలతో వడ్డాణం చేయిస్తానని, తనను పెళ్లిచేసుకొమ్మని మేనేజర్ ప్రభావతి మరోసారి కోరింది.

అయితే మేనేజర్ యవ్వారంతో బిత్తరపోయిన యోగేశ్వరరావుకు ఏం చేయాలో పాలుపోలేదు. దీంతో నేరుగా వెళ్లి పెనమలూరు పోలీసులను ఆశ్రయించాడు. తన సంతకాన్ని ఫోర్జరీ చేసి తన ప్రమేయం లేకుండానే మేనేజర్ ప్రభావతి బంగారు నగలు తీసుకుందంటూ కేసు పెట్టాడు. కస్టమర్ యోగేశ్వరరావు ఫిర్యాదుతో రంగంలోకి దిగిన పోలీసులు.. బ్యాంకు మేనేజర్ ప్రభావతి మీద చీటింగ్ కేసు నమోదు చేశారు. ఘటనపై దర్యాప్తు చేపట్టారు. మరోవైపు బ్యాంకు మేనేజర్ ప్రభావతికి ఇప్పటికే వివాహం జరిగింది . అయితే భర్తతో దూరంగా ఉన్నట్లు సమాచారం.