ఏపీకి ప్రత్యేక హోదా కోరుతూ ఇండియా, ఇంగ్లండ్ క్రికెట్ మ్యాచ్‌లో పోస్టర్ల ప్రదర్శన,,,జైభారత్ నేషనల్ పార్టీ ఆధ్వర్యంలో ఫ్లెక్సీల ప్రదర్శన

ఏపీకి ప్రత్యేక హోదా.. ఆంధ్రప్రదేశ్‌లో చాలా రోజుల తర్వాత మళ్లీ వినిపిస్తున్న మాట ఇది. 2019 ఎన్నికల సమయంలో గట్టిగా వినిపించిన ప్రత్యేకహోదా మాట మళ్లీ 2024 ఎన్నికల సమయంలోనే అంతే బలంగా వినిపిస్తోంది. శుక్రవారం రెండు చోట్ల ఒకేసారి ప్రత్యేక హోదా కోసం డిమాండ్లు, నిరసనలు వ్యక్తమయ్యాయి. అందులో ఒకటి ఢిల్లీలో అయితే.. మరొకటి వైజాగ్‌లో. విశాఖ వేదికగా జరుగుతున్న ఇండియా, ఇంగ్లండ్ రెండో టెస్టు మ్యాచ్‌లో.

ఏపీ కాంగ్రెస్ చీఫ్‌గా బాధ్యతలు చేపట్టిన నాటి నుంచి వైఎస్ షర్మిల ప్రత్యేకహోదా గురించి ప్రస్తావిస్తూనే ఉన్నారు. రాష్ట్రవ్యాప్తంగా జరిగిన అనేక జిల్లాల సమావేశాల్లో ప్రత్యేకహోదాను అధికార వైసీపీ, విపక్ష టీడీపీ .. బీజేపీకి తాకట్టుపెట్టాయని షర్మిల విమర్శించారు. తమ స్వార్థ రాజకీయ ప్రయోజనాల కోసం జగన్, చంద్రబాబు.. ప్రధాని మోదీని ఈ విషయంలో ప్రశ్నించడం మానేశారని ఆరోపణలు చేశారు. ఇక శుక్రవారం అయితే ఏకంగా ఢిల్లీ వేదికగా ప్రత్యేకహోదా కోసం గళమెత్తారు వైఎస్ షర్మిల.

ఢిల్లీలో ధర్నా చేసిన షర్మిల.. ప్రత్యేక హోదా విషయంలో టీడీపీ, వైసీపీ ఏపీ ప్రజలను మోసం చేస్తున్నాయని విమర్శించారు. అందుకే ధర్నా చేయాల్సి వచ్చిందని అన్నారు. ప్రత్యేక హోదాతో పాటు పోలవరం. కడపలో స్టీల్ ఫ్యాక్టరీ, వైజాగ్‌లో రైల్వే జోన్, దుగరాజ పట్టణానికి పోర్ట్, వైజాగ్ నుంచి చెన్నై ఇండస్ట్రీయల్ కారిడార్ తెస్తామని హామీ ఇచ్చి ఇప్పటి వరకు నెరవేర్చలేదని బీజేపీని విమర్శించారు. వీటి సంగతి అలా ఉంచితే విశాఖ స్టీల్‌ను సైతం ప్రైవేట్ పరం చేయాలని చూస్తున్నారని మండిపడ్డారు. ఏపీలో ఒక్క ఎంపీ గానీ, ఎమ్మెల్యే గానీ బీజేపీ పార్టీకీ లేవన్న వైఎస్ షర్మిల.. కానీ రాష్ట్రాన్ని మాత్రం బీజేపీనే పాలిస్తోందని విమర్శించారు. వైసీపీ, టీడీపీలు బీజేపీకి బానిసలుగా మారాయని మండిపడ్డారు.

మరోవైపు వైజాగ్ వేదికగా జరుగుతున్న ఇండియా, ఇంగ్లండ్ క్రికెట్ మ్యాచ్‌లో కూడా ఏపీకి ప్రత్యేకహోదా ఇవ్వాలనే డిమాండ్ వినిపించింది. ఇండియా, ఇంగ్లండ్ రెండో టెస్టులో జైభారత్ నేషనల్ పార్టీకి చెందిన భీమిలి కన్వీనర్ అనిల్ కుమార్ ఆధ్వర్యంలో ప్రత్యేకహోదా నినాదాన్ని వినిపించారు. కొంతమంది అభిమానులు, విద్యార్థులు ఫ్లెక్సీలు పట్టుకుని ఏపీకి ప్రత్యేక హోదా ఇవ్వాలని డిమాండ్ చేశారు. మొత్తంగా 150 మంది వరకూ ఫ్లెక్సీని ప్రదర్శించి ప్రత్యేకహోదాను డిమాండ్ చేశారు. మొత్తంగా చాన్నాళ్లుగా తెరపై లేని ప్రత్యేక హోదా నినాదం.. ఎన్నికలు సమీపిస్తున్న తరుణంలో మళ్లీ బలంగా వినిపిస్తోంది.