నన్ను కాదు ఏపీ ప్రభుత్వాన్ని అడగండి.. మేం రెడీగానే ఉన్నాం: కేంద్రమంత్రి

విశాఖ రైల్వేజోన్ ఏర్పాటుపై రైల్వే మంత్రి అశ్వినీ వైష్ణవ్‌ సంచలన వ్యాఖ్యలు చేశారు. రైల్వేజోన్‌ ఏర్పాటు విషయంలో జాప్యం గురించి తనను ఎందుకు అడుగుతున్నారని.. ఏపీ ప్రభుత్వాన్ని అడగాలన్నారు. కేంద్ర బడ్జెట్‌ సందర్భంగా.. రైల్వేజోన్‌ను ప్రస్తావించినప్పుడు స్పందించారు. రైల్వే జోనల్‌ కార్యాలయం ఏర్పాటుకు అవసరమైన 53 ఎకరాలను రాష్ట్ర ప్రభుత్వం అప్పగించకపోవడం వల్లే ప్రారంభంలో జాప్యమవుతోందని చెప్పారు. ప్రభుత్వం భూమి అప్పగించిన రోజునుంచే పనులు మొదలుపెట్టడానికి సిద్ధమని.. ఇప్పటికే డీపీఆర్‌కు ఆమోదం తెలపడం, అనుమతులు మంజూరు చేయడం పూర్తయ్యాయన్నారు.

రాష్ట్ర ప్రభుత్వం భూమి ఇవ్వకపోవడంవల్లే జోన్‌ పనుల్లో జాప్యమవుతోందన్నారు కేంద్రమంత్రి. ప్రాజెక్టు పరిస్థితి గురించి తాను ఇదివరకే చెప్పానని.. రాష్ట్ర ప్రభుత్వాల వాటా సమకూర్చనందున చాలా రైల్వే ప్రాజెక్టులు ఆగిపోయాయన్నారు. వాటి విషయంలో ఇచ్చిన మాటకు కట్టుబడి ఉండాలని రాష్ట్రాలను కోరుతున్నామన్నారు. నరేంద్ర మోదీ ప్రధానిగా బాధ్యతలు చేపట్టిన నాటినుంచి రైల్వే ప్రాజెక్టుల కోసం బడ్జెట్‌లో పెద్ద ఎత్తున కేటాయింపులు జరుపుతున్నట్లు అశ్వినీ వైష్ణవ్‌ తెలిపారు. 2009-14 మధ్యకాలంలో ఉమ్మడి ఏపీలో రైల్వే ప్రాజెక్టుల కోసం ఏటా సగటున రూ.886 కోట్ల కేటాయింపులే అయ్యాయన్నారు. 2024-25 బడ్జెట్‌లో కేవలం విభజిత ఆంధ్రప్రదేశ్‌కే రూ.9,138 కోట్లు కేటాయించారన్నారు.

ఏపీలో రైల్వేలైన్ల విద్యుదీకరణ దాదాపు 97% పూర్తయిందన్నారు. కేంద్రం రాష్ట్రంలోని రైల్వే ప్రాజెక్టులపై మొత్తం రూ.68,059 కోట్ల పెట్టుబడి పెడుతోందన్నారు. 72 స్టేషన్లను అమృత్‌ స్టేషన్లుగా ఆధునీకరిస్తున్నామన్నారు. వందేభారత్‌ రైళ్లు దక్షిణాది రాష్ట్రాల్లో అత్యధికంగా పరుగులు తీస్తున్నాయని, డిమాండ్‌ను బట్టి వీటిని పెంచుతామని తెలిపారు. విశాఖలో రైల్వేనుంచి తీసుకున్న స్థలానికి ముడసర్లోవ వద్ద ప్రత్యామ్నాయంగా కేటాయించిన స్థలాన్ని నేటికీ జీవీఎంసీ అప్పగించలేదు.