బుల్లెట్ ట్రైన్ ఏపీలో అక్కడ మాత్రమే స్టాప్.. గంటన్నరలో చెన్నై నుంచి మైసూరుకు..

చెన్నై- మైసూర్ హైస్పీడ్ రైల్ కారిడార్‌కు సంబంధించి మరో అప్‌డేట్ బయటకు వచ్చింది. ఈ మార్గాల్లో బుల్లెట్ ట్రైన్ నడపాలని 2019లో ప్రతిపాదించారు. ఈ బుల్లెట్ ట్రైన్ కారిడార్ నిర్మాణానికి సంబంధించిన భూసేకరణ పనులు తాజాగా ప్రారంభమయ్యాయి.2030లోగా ఈ హై స్పీడ్ రైల్ కారిడార్ పనులు పూర్తి చేయాలని రైల్వే అధికారులు భావిస్తున్నారు. ఈ క్రమంలోనే నేషనల్ హైస్పీడ్ రైల్ కార్పొరేషన్ లిమిటెడ్ అధికారులు ఇటీవలే ఏపీ, తమిళనాడులోని కాట్పాడి, గుడిపాల, బంగారుపేట, మాలూరు ప్రాంతాల రైతులతో సమావేశాలు నిర్వహించారు. అలాగే హెలికాప్టర్ ద్వారా ఏరియల్ సర్వే నిర్వహించారు. త్వరలోనే పలమనేరులో రైతులతో భేటీ కానున్నట్లు తెలిసింది. రైతులతో సమావేశాలు పూర్తికాగానే భూసేకరణ కోసం నోటిఫికేషన్ విడుదల చేస్తారు.

మరోవైపు చెన్నై- మైసూరు హై స్పీడ్ రైల్ ప్రాజెక్టును 435 కి.మీ మేర ప్రతిపాదించారు. చెన్నై- మైసూరు మార్గంలో 9 చోట్ల బుల్లెట్ ట్రైన్ స్టాంపింగ్‌లు ఉండాలని ప్రతిపాదించారు. తమిళనాడులోని చెన్నై, పొన్నాంమలై, అరక్కోణం.. ఏపీలోని చిత్తూరు, కర్ణాటకలోని బంగారుపేట్, బెంగళూరు, చెన్నపట్న, మండ్య, మైసూరు స్టేషన్‌లలో ఆపాలని లైన్ అలైన్‌మెంట్లో ప్రతిపాదించారు. మరోవైపు ఒకేసారి 750 మంది ప్యాసింజర్లు ప్రయాణించేలా బుల్లెట్ ట్రైన్ తయారు చేయనున్నారు. చెన్నై నుంచి మైసూరు వెళ్లడానికి ప్రస్తుతం పది నుంచి 12 గంటలు పడుతుండగా.. బుల్లెట్ ట్రైన్ అందుబాటులోకి వస్తే ఒకటిన్నర గంటలోనే గమ్యాన్ని చేరుకోవచ్చు. బుల్లెట్ ట్రైన్ అత్యధికంగా గంటకు 350 కిలోమీటర్ల వేగంతో ప్రయాణిస్తుంది.