గుద్దుకున్నోళ్లకు గుద్దుకున్నన్ని ఓట్లు.. పాక్ ఎన్నికల్లో రిగ్గింగ్.. వీడియో వైరల్

పాకిస్థాన్‌లో ప్రస్తుతం ఎన్నికల పోలింగ్ పూర్తయి.. కౌంటింగ్ జరుగుతోంది. ఈ క్రమంలోనే ఎన్నికల వేళ భారీగా రిగ్గింగ్ జరిగినట్లు తెలుస్తోంది. ఈ నేపథ్యంలోనే ఎన్నికల బ్యాలెట్ పేపర్లపై ఇష్టం వచ్చినట్లు ఓట్లు వేస్తున్న వీడియోలు ప్రస్తుతం సోషల్ మీడియాలో తెగ వైరల్ అవుతున్నాయి. దీంతో మాజీ ప్రధాని ఇమ్రాన్‌ఖాన్‌ నేతృత్వంలోని పాకిస్థాన్ తెహ్రీక్ ఇ ఇన్సాఫ్-పీటీఐ పార్టీకి చెందిన నేతలు.. ఆ దేశ ఆర్మీపై తీవ్ర విమర్శలు చేస్తున్నారు. ఎన్నికల్లో పాక్ సైన్యం రిగ్గింగ్ చేస్తోందని ఆందోళనలు చేశారు. దీంతో పీటీఐ పార్టీ కార్యకర్తలు, నేతలపై కాల్పులు జరిపాయి. ఈ కాల్పుల్లో పలువురు మృతి చెందగా.. వందల మంది గాయాలపాలయ్యారు.

ఓ వైపు పోలింగ్ జరుగుతుండగానే మరోవైపు.. రిగ్గింగ్ జరిగినట్లు పీటీఐ నేతలు ఆరోపించారు. ఈ ఎన్నికల్లో స్వతంత్రంగా పోటీ చేసిన పీటీఐ నేతలు గెలుస్తున్నారనే సంకేతాలు రావడంతో నవాజ్ షరీఫ్ పార్టీతో కలిసి పాక్ ఆర్మీ కుట్రలకు తెరలేపిందని సంచలన ఆరోపణలు చేశారు. ఈ క్రమంలోనే పీటీఐ నేతలు గెలవకుండా భారీ ప్రణాళిక చేస్తున్నారని.. అందుకే ఫలితాల వెల్లడి ఆలస్యం అవుతోందని పీటీఐ వర్గాలు సంచలన వ్యాఖ్యలు చేస్తున్నారు. అయితే తాజాగా వైరల్ అవుతున్న వీడియోల్లో బ్యాలెట్ పేపర్లపై తమకు ఇష్టమైన పార్టీకి ఓట్లు వేస్తున్నట్లు కనిపిస్తోంది. బ్యాలెట్ బాక్స్‌పైనే ఓట్లు గుద్దుతూ అందులో వేస్తున్న దృశ్యాలు వైరల్ అవుతున్నాయి.

ఇక ఈ వీడియోలు సోషల్ మీడియాలో వైరల్ కావడంతో నెటిజన్లు ఫన్నీగా కామెంట్లు పెడుతున్నారు. గత ఎన్నికల సమయంలో జరిగిన రిగ్గింగ్‌ రికార్డులు ఈ ఎన్నికలు అధిగమిస్తున్నారని చేస్తున్నారు. ఇలా రిగ్గింగ్ చేసి గెలిచేందుకు ఎన్నికలు, పోలింగ్, కౌంటింగ్ పెట్టటం ఎందుకు అంటూ సెటైర్లు వేస్తున్నారు. గ్రేట్ పాకిస్తాన్.. రిగ్గింగ్ పోలింగ్.. రిగ్గింగ్‌లో వరల్డ్ రికార్డు.. ప్రజాస్వామ్యం ఖూనీ అంటూ నెటిజన్లు కామెంట్లతో విరుచుకుపడుతున్నారు. అయితే ఈ రిగ్గింగ్‌పై నవాజ్ షరీఫ్, ఇమ్రాన్ ఖాన్ పార్టీల నేతల ఎవరికివారు మీవే అంటే మీవే అంటూ విమర్శలు, ప్రతి విమర్శలు చేసుకుంటున్నారు.

మరోవైపు పాకిస్థాన్‌లో గురువారం జరిగిన జాతీయ అసెంబ్లీ ఎన్నికలకు సంబంధించిన ఫలితాలు ఒక్కొక్కటిగా వెల్లడవుతున్నాయి. ఈ ఎన్నికల ఫలితాల్లో జైల్లో ఉన్న మాజీ ప్రధాని ఇమ్రాన్ ఖాన్ కు చెందిన పాకిస్థాన్ తెహ్రీక్-ఇ-ఇన్సాఫ్ మద్దతుదారులు ఎక్కువ స్థానాల్లో గెలుపొందినట్లు స్థానిక మీడియాలో కథనాలు వస్తున్నాయి. పీటీఐ వర్గాలు కూడా అవే లెక్కలు చెబుతున్నాయి. అయితే ఫలితాల వెల్లడి మాత్రం చాలా ఆలస్యం అవుతుండటం తీవ్ర విమర్శలకు తావిస్తోంది.