నేడు చింతపల్లిలో పర్యటించనున్న షర్మిల
Andhra Pradesh Telugu | Suryaa Desk | Published : Sat, Feb 10, 2024, 01:01 PM
పీసీసీ అధ్యక్షురాలు వైఎస్‌ షర్మిల శనివారం చింతపల్లిలో పర్యటించనున్నారు. షర్మిల పర్యటనకు కాంగ్రెస్‌ నాయకులు ఏర్పాట్లు పూర్తి చేశారు. నర్సీపట్నం నుంచి వాహనంలో మధ్యాహ్నం ఆమె చింతపల్లి చేరుకుంటారు. నేరుగా చింతపల్లి డిగ్రీ కళాశాల మైదానంలో ఏర్పాటు చేసిన సభావేదిక వద్దకు బస్సులో వెళతారు. అయితే కాంగ్రెస్‌ నాయకులు తొలుత హనుమాన్‌ జంక్షన్‌ నుంచి ర్యాలీగా డిగ్రీ కళాశాలకు ఆమెను తీసుకు వెళ్లాలని భావించారు. అయితే పోలీసులు అనుమతించకపోవడంతో ఆమె సభా వేదిక వద్దకు నేరుగా వచ్చి ప్రసంగించనున్నారు. గత నెలలో చింతపల్లి వచ్చిన ముఖ్యమంత్రి జగన్మోహన్‌రెడ్డి సభ జరిగిన స్థలంలోనే షర్మిల సభను కాంగ్రెస్‌ నాయకులు ఏర్పాటు చేయడం విశేషం. షర్మిల పర్యటనకు పోలీసు అధికారులు కట్టుదిట్టమైన భద్రతను ఏర్పాటు చేస్తున్నారు. ఇప్పటికే ప్రత్యేక పోలీసు బలగాలు లంబసింగి ఘాట్‌ నుంచి చింతపల్లి, చౌడుపల్లి ప్రాంతాల్లో మోహరించాయి. ప్రధాన రహదారులు, సభా వేదిక వద్ద బాంబ్‌ స్క్వాడ్‌ బృందాలు ప్రత్యేక తనిఖీలు నిర్వహించాయి. చింతపల్లి అదనపు ఎస్పీ కె.ప్రతాప్‌ శివకిశోర్‌ పర్యవేక్షణలో ప్రత్యేక పోలీసు బలగాలు గస్తీ నిర్వహిస్తున్నాయి.
|
|