ఏపీపీసీసీ చీఫ్ షర్మిలకు కార్యకర్త నుంచి ఊహించని ప్రశ్న,,,,దీటుగా సమాధానమిచ్చిన వైఎస్ షర్మిల

ఏపీ పీసీసీ చీఫ్ వైఎస్ షర్మిలకు చేదు అనుభవం ఎదురైంది. పీసీసీ చీఫ్‌గా నియమితులైన తర్వాత వైఎస్ షర్మిల ఆంధ్రప్రదేశ్ వ్యాప్తంగా విస్తృతంగా పర్యటిస్తున్నారు. కాంగ్రెస్‌లోని పాత తరం నేతలను కలుస్తూ హస్తం పార్టీని వదిలి వెళ్లినవారిని తిరిగి తీసుకువచ్చే ప్రయత్నం చేస్తున్నారు. అలాగే పార్టీలో జోష్ నింపడం కోసం జిల్లాల పర్యటనలు చేస్తున్నారు వైఎస్ షర్మిల, ఉదయం రచ్చబండ కార్యక్రమం, సాయంత్రం సభలతో కాంగ్రెస్ శ్రేణులను ఎన్నికలకు సమాయత్తం చేస్తున్నారు. అయితే ఈ రచ్చబండ కార్యక్రమంలో వైఎస్ షర్మిలకు ఊహించని అనుభవం ఎదురైంది. అనకాపల్లి నియోజకవర్గంలో నర్సీపట్నంలో జరిగిన రచ్చబండ కార్యక్రమంలో సామాన్యుడి నుంచి వైఎస్ షర్మిలకు ఊహించని ప్రశ్న ఎదురైంది.

నర్సీపట్నానికి చెందిన ఓ యువకుడు వైఎస్ షర్మిల కాంగ్రెస్ పార్టీలో తిరిగి చేరటంపై ప్రశ్నలు గుప్పించాడు. గతంలో జగనన్న వెంట నడిచి, ఇప్పుడు మళ్లీ కాంగ్రెస్ పార్టీలో చేరడానికి కారణం చెప్పాలంటూ ప్రశ్నించాడు. కాంగ్రెస్ జెండాను మోస్తూ వైఎస్ఆర్ వెనుక సైనికుడిలా నిలబడ్డాం. వైఎస్ఆర్ చనిపోయిన తర్వాత మీకోసం వైఎస్ఆర్సీపీ జెండాలు మోశాం. మీ పాదయాత్రలో, జగన్ పాదయాత్రలో జెండా పట్టుకుని తిరిగాం. వైఎస్ఆర్ కుటుంబం కోసం ప్రాణాలు అర్పించడానికైనా సిద్ధపడ్డాం. జగనన్న జైళ్లో ఉన్నప్పుడు మీ మాటలు నమ్మి.. కాంగ్రెస్ కుటుంబమంతా వైఎస్ఆర్‌సీపీ కుటుంబంగా మారింది. జగన్ పరిపాలనలో ఇప్పుడంతా బాగుంది, పింఛన్లు అన్నీ అందుతున్నాయి. కానీ మీరు మాత్రం.. వైఎస్ఆర్ పేరును ఛార్జిషీట్‌లో చేర్చిన పార్టీతో చేరి.. వైసీపీ పాలన బాగోలేదు. మళ్లీ కాంగ్రెస్ రావాలంటున్నారు. దీనికి మీరు సమాధానం చెప్పాలి.. అంటూ ప్రశ్నించాడు.

వైఎస్ షర్మిలను నిలదీసిన కార్యకర్త

అయితే సదరు యువకుడి ప్రశ్నకు షర్మిల సైతం తనదైన రీతిలో సమాధానమిచ్చారు. ప్రశ్నలు అడుగుతున్న వ్యక్తి నుంచి కాంగ్రెస్ కార్యకర్తలు మైక్ తీసుకునే ప్రయత్నం చేయగా వారించిన షర్మిల.. అతని ప్రశ్నకు జవాబిచ్చారు. "వైఎస్ రాజశేఖర్‌ రెడ్డి గారికి కాంగ్రెస్ పార్టీ రెండుసార్లు సీఎంగా అవకాశం ఇచ్చింది. అదీ ఆయనపై వారికి ఉన్న గౌరవం. నేను ఆ మధ్య సోనియమ్మను, రాహుల్ గాంధీని కలిసినప్పుడు..వైఎస్ఆర్ పేరును ఎఫ్ఐఆర్‌లో చేర్చడం తమకు తెలియదని చెప్పారు. రాజీవ్ గాంధీ గారి పేరును ఆయన చనిపోయిన తర్వాత బోఫోర్స్ కేసు ఎఫ్ఐఆర్‌లో చేర్చారని, ఆ బాధ నాకు తెలుసంటూ సోనియమ్మ చెప్పారు. అలాంటిది తామెలా వైఎస్ఆర్ పేరును ఎఫ్ఐఆర్‌లో పెడతామని అన్నారు. పొరపాటే తప్ప తెలిసీ చేసిన తప్పుకాదన్నారు. అలాగే వైఎస్ఆర్ గురించి వారి మాటలు విన్న తర్వాత ఆయన మీద వారికి ఎంత గౌరవం ఉందో తెలిసింది. వారు చెప్పిన మాటలు నమ్మి కాంగ్రెస్‌లో చేరా" అని షర్మిల జవాబిచ్చారు.