హాస్పిటల్‌లో జూనియర్ డాక్టర్లు రీల్స్.. విచిత్రమైన శిక్షవేసిన అధికారులు

చిత్రదుర్గ జిల్లా ఆస్పత్రి ఆపరేషన్ థియేటర్‌లో ఓ డాక్టర్ ప్రీవెడ్డింగ్ షూట్ నిర్వహించి, ఉద్యోగం కోల్పోయిన ఘటన మరువకముందే.. కర్ణాటకలో అలాంటిదే మరొకటి చోటుచేసుకుంది. ప్రభుత్వ మెడికల్ కాలేజీలో జూనియర్ డాక్టర్లు రీల్స్ చేసిన వ్యవహారం వెలుగులోకి వచ్చింది. గడగ్ ఇనిస్టిట్యూట్ ఆఫ్ మెడికల్ సైన్సెస్ (జీఐఎంఎస్)లో చదువుతున్న 38 మంది విద్యార్థులు శిక్షణ మరో 20 రోజుల్లో ముగియనుంది. ఈ నేపథ్యంలో త్వరలో జరగనున్న ప్రీ గ్రాడ్యుయేషన్ కార్యక్రమం కోసం వారంతా రీల్స్ చేశారు. అయితే, ఇందుకోసం ఎటువంటి అనుమతి తీసుకోలేదు. ఈ వీడియో బయటకు రావడంతో సోషల్ మీడియాలో వైరల్ అయ్యింది.

దీనిపై జీఐఎంఎస్ అధికార యంత్రాంగం తీవ్రంగా స్పందించింది. రీల్స్ కోసం విద్యార్థులకు తాము అనుమతి ఇవ్వలేదని స్పష్టం చేసింది. ఇలాంటి వాటిని తాము ప్రోత్సహించబోమని ఉద్ఘాటించింది. నిబంధనలు ఉల్లంఘించి ఘోర తప్పిదానికి పాల్పడిన విద్యార్థులకు జరిమానా విధించడంతోపాటు శిక్షణను మరో 10 రోజులు పొడిగించినట్టు జిమ్స్ డైరెక్టర్ డాక్టర్ బసవరాజ్ వెల్లడించారు. వైరల్ అవుతోన్న వీడియో ప్రకారం హాస్పిటల్ కారిడార్‌లో విద్యార్థులు స్క్రబ్స్‌లో డ్యాన్స్ చేస్తుండగా.. మరొకరు రిపోర్టులు చూస్తున్నారు. బెడ్‌కి అడ్డంగా చక్రాలు వేసినట్లు సెలైన్ బాటిల్స్ పట్టుకుని నిలబడి ఉన్నారు. ప్రముఖ హిందీ, కన్నడ పాటలకు వీరు డ్యాన్స్ చేస్తుండటం రీల్స్‌లో కనిపిస్తోంది. దీంతో విధులను విస్మరించి బాధ్యతరహితంగా వ్యవహరించారనే విమర్శలు వ్యక్తమవుతున్నాయి.

అయితే, ఇటీవల కొద్దికాలంగా ముఖ్యంగా కోవిడ్ తర్వాత పలు సందర్భాల్లో వైద్యులు చేసిన రీల్స్ వైరల్ అయ్యాయి. అయితే, వీటిని కొందరు స్వాగతిస్తే.. మరికొందరు మాత్రం విమర్శించారు. పని ఒత్తిడి నుంచి బయటపడటానికి దోహదం చేస్తాయని వైద్యులని సమర్ధించారు. కానీ, ఇవి వైద్యుల విధుల్లో నిర్లక్ష్యమని, రోగులకు ఇబ్బంది కలిగించడమేనని విమర్శించినవారు ఉన్నారు.