రైతుల ఛలో ఢిల్లీ: కాంక్రీట్‌తో సరిహద్దులకు సీల్.. 3 రోజుల పాటు ఇంటర్నెట్ బంద్

పంటలకు మద్దతు ధర కోరుతూ ఫిబ్రవరి 13న ఛలో ఢిల్లీ కార్యక్రమాన్ని రైతు సంఘాలు తలపెట్టాయి. ఈ నేపథ్యంలో రైతులను దేశ రాజధాని నగరంలోకి అడుగుపెట్టకుండా ఢిల్లీ సరిహద్దులను సీల్ చేస్తున్నారు. బారికేడ్లు ఏర్పాటుచేసి.. ఏకంగా సిమెంట్‌తో కాంక్రీట్‌, రోడ్లపై ఇనుప మేకులు దింపుతున్నారు. ఇదే సమయంలో హరియాణా ప్రభుత్వం ఏడు జిల్లాల్లో మూడు రోజుల పాటు ఇంటర్నెట్ సేవలను నిలిపివేసింది. అంబాలా, కురుక్షేత్ర, కైథాల్, జింద్, హిస్సార్, ఫతేహాబాద్, సిర్సా జిల్లాల్లో ఫిబ్రవరి 11న ఉదయం 6 గంటల నుంచి ఫిబ్రవరి 13న రాత్రి 12 గంటల వరకు ఇంటర్నెట్ను నిలిపివేయాలని తెలిపింది. ఈ మేరకు తమ ఆదేశాలను పాటించాలని హరియాణా ఇంటర్నెట్ సర్వీస్ ప్రొవైడర్లకు సూచించింది.

అయితే, వ్యక్తిగత ఎస్ఎమ్ఎస్, మొబైల్ రీఛార్జ్, బ్యాంకింగ్, వాయిస్ కాల్స్, బ్రాడ్బ్యాండ్, కార్పొరేట్- డొమెస్టిక్ లీజ్ లైన్స్కు మాత్రం మినహాయింపు ఇచ్చారు. రైతుల నిరసనలతో ఏడు జిల్లాలో ప్రభుత్వ, ప్రైవేటు ఆస్తులకు నష్టం, శాంతి భద్రతలకు విఘాతం కలిగే అవకాశం ఉందని పోలీసులు ప్రభుత్వం దృష్టికి తీసుకొచ్చినట్లు హరియాణా జాయింట్ సెక్రటరీ తన ఉత్తర్వుల్లో పేర్కొన్నారు. మొబైల్ ఫోన్స్, సోషల్ మీడియా ద్వారా వదంతులను వ్యాప్తిని నిరోధించడానికి ఈ నిర్ణయం తీసుకున్నట్లు తెలిపారు. సంయుక్త కిసాన్ మోర్చా (ఎస్కేఎమ్), కిసాన్ మజ్దూర్ మోర్చా (కేఎమ్ఎమ్) వంటి 200కు పైగా రైతు సంఘాలు ఛల్లో ఢిల్లీకి పిలుపునిచ్చాయి. పంటలకు కనీస మద్దతు ధరపై చట్టం తీసుకురావాలని, రైతులకు పింఛను, పంటబీమా, 2020 ఆందోళన సమయంలో తమపై పెట్టిన కేసులు ఎత్తివేయాలని డిమాండ్‌ చేస్తూ హరియాణా, పంజాబ్ రైతులు నిరసన చేస్తున్నారు. ఈ నేపథ్యంలో ఢిల్లీకి ట్రాక్టర్‌ మార్చ్‌ నిర్వహించాలని రైతులు నిర్ణయించారు. దీంతో అప్రమత్తమైన హరియాణా, పంజాబ్‌ పోలీసులు, గతంలో పరిస్థితులు పునరావృతం కాకుండా ముందస్తు చర్యలు చేపట్టారు. కొత్త సాగు చట్టాలకు వ్యతిరేకంగా చేపట్టిన ఆందోళనల్లో క్రియాశీలంగా పని చేసినవారిని అదుపులోకి తీసుకున్నారు. రాష్ట్రాల సరిహద్దుల్లో చెక్‌పోస్టులు ఏర్పాటుచేసి ఢిల్లీలోకి రైతులు ప్రవేశించకుండా అడ్డుకుంటున్నారు. అంతర్‌ రాష్ట్ర సరిహద్దుల్లో ఇసుకబస్తాలతో గోడలు, సిమెంట్‌ బారికేడ్లు ఏర్పాటుచేశారు. ఆందోళనలో పాల్గొనేందుకు ఢిల్లీ వెళ్లాలని ప్రయత్నిస్తే కఠిన చర్యలు తీసుకుంటామని హెచ్చరికలు జారీ చేశారు.